ଜମ୍ମୁ-କାଶ୍ମୀର ଉପ ରାଜ୍ୟପାଳଙ୍କ ବଡ ନିଷ୍ପତ୍ତି , ଏବେ କେବଳ ଜିଲ୍ଲା ମୁଖ୍ୟାଳୟରେ ନିଯୁକ୍ତି ପାଇବେ ହିନ୍ଦୁ କର୍ମଚାରୀ
କନକ ବ୍ୟୁରୋ : ଜମ୍ମୁ-କାଶ୍ମୀରରେ କିଛିଦିନ ହେବ କେବଳ ହିନ୍ଦୁ ଧର୍ମର ଲୋକଙ୍କୁ ଟାର୍ଗେଟ କରି ହତ୍ୟା କରାଯାଉଛି । ଏହାକୁ ନଜରରେ ରଖି ଜମ୍ମୁ-କାଶ୍ମୀର ଉପ ରାଜ୍ୟପାଳ ମନୋଜ ସିହ୍ନା ଏକ ବଡ ନିଷ୍ପତ୍ତି ନେଇଛନ୍ତି । ଉପ ରାଜ୍ୟପାଳଙ୍କ ନିଷ୍ପତ୍ତି ମୁତାବକ ଏହି କେନ୍ଦ୍ର ଶାସିତ ଅଞ୍ଚଳର ବିଭିନ୍ନ ସ୍ଥାନରେ ଚାକିରି କରୁଥିବା ହିନ୍ଦୁ କର୍ମଚାରୀମାନଙ୍କୁ ଏବେ ଜିଲ୍ଲା ମୁଖ୍ୟାଳୟକୁ ସ୍ଥାନାନ୍ତର କରାଯିବ । ଏନେଇ ଉପ ରାଜ୍ୟପାଳ ମନୋଜ ସିହ୍ନା ଏକ ଗୁରୁତ୍ୱପୂର୍ଣ୍ଣ ବୈଠକ ଡାକି ତୁରନ୍ତ କିଭଳି ହିନ୍ଦୁ କର୍ମଚାରୀଙ୍କୁ ଜିଲ୍ଲା ମୁଖ୍ୟାଳୟକୁ ଟ୍ରାନ୍ସଫର କରାଯାଇ ପାରିବ ତାହା ଉପରେ ବିଚାର ବିମର୍ଷ କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଏହି ବୈଠକ ପରେ ସମସ୍ତ ହିନ୍ଦୁ କର୍ମଚାରୀଙ୍କୁ ଜିଲ୍ଲା ମୁଖ୍ୟାଳୟକୁ ସ୍ଥାନାନ୍ତର କରାଯିବା ନେଇ ଚର୍ଚ୍ଚା ଜୋର ଧରିଛି । କୁହାଯାଇଛି କି ସେମାନଙ୍କ ସୁରକ୍ଷାକୁ ଦୃଷ୍ଟିରେ ରଖି ସେମାନଙ୍କୁ ତୁରନ୍ତ ଜିଲ୍ଲା ମୁଖ୍ୟାଳୟଙ୍କୁ ଟ୍ରାନ୍ସଫର କରାଯିବ । ଏହାସହ ସେହି କର୍ମଚାରୀଙ୍କୁ ସୁରକ୍ଷିତ ବାସଗୃହ ଯୋଗାଇ ଦେବାର ଦାୟୀତ୍ୱ ସ୍ଥାନୀୟ ପ୍ରଶାସନକୁ ଦିଆଯିବ ।
କହିରଖୁ କି କିଛିଦିନ ହେବ କାଶ୍ମୀରରେ କେବଳ ହିନ୍ଦୁଧର୍ମର ଲୋକମାନଙ୍କୁ ଟାର୍ଗେଟ୍ କରି ହତ୍ୟା କରାଯାଉଛି । ସରକାରୀ ଅଧିକାରୀ ରାହୁଲ ଭଟ୍ଟଙ୍କ ଠାରୁ ଆରମ୍ଭ ହୋଇଥିବା ହତ୍ୟା ଦିନକୁ ଦିନ ବୃଦ୍ଧି ପାଇବାରେ ଲାଗିଛି । ଏହାକୁ ନେଇ ଘାଟିରେ କାଶ୍ମୀର ପଣ୍ଡିତମାନେ ବାରମ୍ବାର ବିରୋଧ ପ୍ରଦର୍ଶନ ଜାରୀ ରଖିଛନ୍ତି । ଏସବୁକୁ ନଜରରେ ରଖି ପ୍ରଶାସନ କାଶ୍ମୀରରେ କାମ କରୁଥିବା ସରକାରୀ ହିନ୍ଦୁ କର୍ମଚାରୀଙ୍କ ସୁରକ୍ଷାକୁ ଦୃଷ୍ଟିରେ ରଖି ସେମାନଙ୍କୁ ଜିଲ୍ଲା ମୁଖ୍ୟାଳୟକୁ ନେଇ ଆସିବାକୁ ନିଷ୍ପତ୍ତି ନେଇଛି ।
ହେଲେ ଉପ ରାଜ୍ୟପାଳଙ୍କ ଏଭଳି ନିଷ୍ପତ୍ତିରେ ସନ୍ତୋଷ୍ଟ ନାହାଁନ୍ତି ସରକାରୀ ହିନ୍ଦୁ କର୍ମଚାରୀମାନେ । ସେମାନେ ଦାବି କରିଛନ୍ତି କି ସେମାନଙ୍କୁ କେବଳ ଜମ୍ମୁ ଟ୍ରାନ୍ସଫର କରାଯାଉ । ସେମାନେ ଘାଟିରେ କାମ କରିବାକୁ ଚାହାଁନ୍ତି ନାହିଁ ବୋଲି ସ୍ପଷ୍ଟ କରିଦେଇଛନ୍ତି ।