ମକର ସଂକ୍ରାନ୍ତିରେ ଭିଡ଼ ଏଡ଼ାଇବାକୁ ଘଟଗାଁରେ ସାଧାରଣ ଦର୍ଶନ ମନା । କାଳିଜାଇ ପୀଠ ବି ବନ୍ଦ, ଅଟ୍ରିରେ ହୋଇପାରିବନି ମକର ମେଳା
କନକ ବ୍ୟୁରୋ: କରୋନା ସଂକ୍ରମଣକୁ ଦୃଷ୍ଟିରେ ରଖି କଟକଣା ଲଗାଇଲେ ପ୍ରଶାସନ । ମକର ଉତ୍ସବରେ ଭକ୍ତଙ୍କ ଗହଳିକୁ ନଜରରେ ରଖି ଚିଲିକାର ଅଧିଷ୍ଠାତ୍ରୀ ଦେବୀ ମା’ କାଳିଜାଇ ପୀଠକୁ ବନ୍ଦ ଘୋଷଣା କରାଯାଇଛି । ପର୍ଯ୍ୟଟକ ମାନଙ୍କୁ ନେଇ ପିକନିକ ନଯିବା ପାଇଁ ଡ଼ଙ୍ଗା ଚାଳକଙ୍କୁ କୃଷ୍ଣପ୍ରସାଦ ଥାନା ଓ ତହସିଲଦାରଙ୍କ ପକ୍ଷରୁ ବାରଣ କରାଯାଇଛି । ସେପଟେ ଚଳିତ ବର୍ଷ ବନ୍ଦ ହୋଇଛି ଖୋର୍ଦ୍ଧାର ପ୍ରସିଦ୍ଧ ଅଟ୍ରି ମକର ମେଳା । ମାନସିକ କୁଣ୍ଡରେ ଗୁଆ ଖୋଜାକୁ ବାରଣ କରାଯାଇଛି । କରୋନା କଟକଣାକୁ ଦୃଷ୍ଟିରେ ରଖି ଖୋର୍ଦ୍ଧା ସବଡିଭିଜନର ସମସ୍ତ ଦେବାଳୟରେ ୧୪୪ ଧାରା ଜାରି କରିଛି ଜିଲ୍ଲା ପ୍ରଶାସନ ।
Kanak News is now on WhatsApp
Join and get latest news updates delivered to you via WhatsApp
ଏହାପୂର୍ବରୁ ଆସନ୍ତାକାଲି ଘଟଗାଁ ମା’ ତାରିଣୀ ମନ୍ଦିରରେ ଭକ୍ତଙ୍କ ପାଇଁ ସାଧାରଣ ଦର୍ଶନ ବ୍ୟବସ୍ଥା ବନ୍ଦ ରହିବ ବୋଲି ଘୋଷଣା କରାଯାଇଥିଲା । ମକର ସଂକ୍ରାନ୍ତିରେ ଶ୍ରଦ୍ଧାଳୁଙ୍କ ଗହଳିକୁ ଦୃଷ୍ଟିରେ ରଖି ଏଭଳି ନିଷ୍ପତ୍ତି ନିଆଯାଇଛି । କରୋନା କଟକଣା ଭିତରେ ଏବେ ବିନା ଭୋଗରେ ଭକ୍ତଙ୍କ ଦର୍ଶନ ଜାରି ରହିଛି । ଆସନ୍ତାକାଲି ମକର ସଂକ୍ରାନ୍ତି ପଡ଼ୁଥିବାରୁ ଦୂରଦୁରାନ୍ତରୁ ମା’ଙ୍କ ଦର୍ଶନ ପାଇଁ ଭକ୍ତଙ୍କ ଗହଳି ଲାଗିବା ସମ୍ଭାବନା ରହିଛି । ଭକ୍ତଙ୍କ ଗହଳିକୁ ଏଡ଼ାଇବା ପାଇଁ ଏହି ନିଷ୍ପତ୍ତି ନିଆଯାଇଛି । ଆସନ୍ତାକାଲି ତଥା ୧୪ ତାରିଖରେ ମନ୍ଦିର ପରିସର ଭିତରକୁ କୌଣସି ଭକ୍ତ ପ୍ରବେଶ କରିପାରିବେ ନାହିଁ । ମାତ୍ର ପ୍ରତ୍ୟେକ ଦିନ ମା’ଙ୍କ ବେଶ, ନୀତିକାନ୍ତି, ସକାଳ ଆଳତୀ, ଅନ୍ନପ୍ରସାଦ ନୀତି, ସନ୍ଧ୍ୟା ଆଳତୀ ଯଥାରୀତିରେ ସମ୍ପାଦାନ ହେବ ।
ସେହିପରି ନରସିଂହପୁର ସ୍ଥିତ ପ୍ରସିଦ୍ଧ ସିଂହନାଥ ଦେବଙ୍କ ପୀଠରେ ୧୪୪ ଧାରା ଜାରି ହୋଇଛି । ଐତିହାସିକ ବାଲି ମକରମେଳା ଆସନ୍ତାକାଲି ହେବାକୁ ଥିବାରୁ ସଂକ୍ରମଣକୁ ଆଖିରେ ରଖି ଏହି କଟକଣା ଜାରି କରାଯାଇଛି । ଆଜି ସକାଳ ୬ଟାରୁ ୧୬ ତାରିଖ ମଧ୍ୟା ୧୨ଟା ପର୍ଯ୍ୟନ୍ତ ୪ ଦିନ ଏହି କଟକଣା ବଳବତ୍ତର ରହିବ । ଏହି ସମୟରେ ମନ୍ଦିରର ସେବାୟତଙ୍କ ବ୍ୟତୀତ ଅନ୍ୟ କାହାରିକୁ ପୀଠକୁ ପ୍ରବେଶ ଉପରେ ବାରଣ କରାଯାଇଛି । ମହାନଦୀର ବକ୍ଷସ୍ଥଳରେ ଅବସ୍ଥିତ ଏହି ପୀଠକୁ ଓଡିଶୀର ଦୀର୍ଘତମ ଟି-ସେତୁ ସଂଯୋଗ କରିଥିବାରୁ ପ୍ରତ୍ୟେହ ଶହ ଶହ ଭକ୍ତଙ୍କ ସମାଗମ ହେଉଛି । ତେଣୁ ଐତିହାସିକ ବାଲି ମକରମେଳାରେ ଭିଡ ଏଡାଇବାକୁ ପ୍ରଶାସନ ପକ୍ଷରୁ ୧୪୪ ଧାରା ଜାରି କରାଯାଇଛି ।