ଜ୍ଞାନବାପି ମସଜିଦ୍ ମାମଲାରେ ସୁପ୍ରିମକୋର୍ଟଙ୍କ ନିର୍ଦ୍ଦେଶ । ଶିବଲିଙ୍ଗ ଥିବା ସ୍ଥାନକୁ ସୁରକ୍ଷିତ ରଖାଯାଉ, ନମାଜ ପଢିବାକୁ କାହାକୁ ରୋକା ନ ଯାଉ ।
କନକ ବ୍ୟୁରୋ : ସୁପ୍ରିମକୋର୍ଟରେ ଆଜି ଜ୍ଞାନବାପି ମସଜିଦ୍ ବିବାଦ ମାମଲାର ଶୁଣାଣି ହୋଇଛି । ଏହି ଶୁଣାଣି ସମୟରେ ସୁପ୍ରିମକୋର୍ଟ ବାରଣାସୀ ଜିଲ୍ଲା ପ୍ରଶାସନକୁ କଡା ନିର୍ଦ୍ଦେଶ ଦେଇଛନ୍ତି । ସୁପ୍ରିମକୋର୍ଟ କହିଛନ୍ତି ଯେଉଁ ସ୍ଥାନରେ ଶିବଲିଙ୍ଗ ରହିଥିବା ନେଇ ଦାବି କରାଯାଉଛି ତାହାକୁ ସୁରକ୍ଷିତ ରଖାଯିବା ସହ ସୁରକ୍ଷା ବ୍ୟବସ୍ଥାକୁ କଡାକଡି କରାଯାଉ ଏବଂ ମୁସଲିମ ସମ୍ପ୍ରଦାୟର ଲୋକଙ୍କ ନମାଜ ପାଠ ପ୍ରଭାବିତ ନହେଉ । ଏନେଇ ସୁପ୍ରିମକୋର୍ଟ ପକ୍ଷରୁ ଏକ ନୋଟିସ ଜାରି କରାଯାଇଛି । ଏହି ମାମଲାର ଆଗାମୀ ଶୁଣାଣି ଆସନ୍ତା ଗୁରୁବାର ହେବ ।
Kanak News is now on WhatsApp
Join and get latest news updates delivered to you via WhatsApp
ଅନ୍ୟପଟେ ମୁସଲିମ ପକ୍ଷରୁ କୁହାଯାଇଛି ଯେ, ଏହି ମାମଲାରେ ସ୍ଥାନୀୟ ଅଦାଲତ କୌଣସି ରାୟ ଦେବା ଉଚିତ ନଥିଲା । ଯେହେତୁ ଏହାକୁ ନେଇ ବିଭିନ୍ନ ପିଟିସନ ଦାୟର ହୋଇଛି ତେଣୁ ଏହା ବାବଦରେ ରାୟ ଦେବା ଉଚିତ ନୁହେଁ । ମସଜିଦ ପରିସରର କିଛି ସ୍ଥାନକୁ ସିଲ କରିବାକୁ ଅଦାଲତ ନିର୍ଦ୍ଦେଶ ଦେବା ବିଭିନ୍ନ ଆଇନର ଉଲ୍ଲଂଘନ କରୁଛି । ଆଉ ଏହା ବିରୋଧରେ ମୁସଲିମ ପକ୍ଷ ତରଫରୁ ଏକ ପିଟିସନ ସୁପ୍ରିମକୋର୍ଟରେ ଦାୟର କରାଯାଇଛି ।
ଏସବୁ ଭିତରେ ଅଲ ଇଣ୍ଡିଆ ମୁସଲିମ୍ ପର୍ସନାଲ ଲ ବୋର୍ଡ ପକ୍ଷରୁ ଏକ ବୈଠକ ଡକାଯାଇଛି । ଭର୍ଚୁଆଲରେ ହେବାକୁ ଥିବା ଏହି ବୈଠକରେ ଜ୍ଞାନବାପି ସମେତ ଟିପୁ ସୁଲତାନ ମସଜିଦ୍ ଓ ଅନ୍ୟାନ୍ୟ ମସଜିଦକୁ ନେଇ ଥିବା ମାମଲା ବାବଦରେ ଆଲୋଚନା ହେବ । ଏହାଛଡା ଆଗାମୀ କାର୍ଯ୍ୟପନ୍ଥା କଣ ରହିବ ସେନେଇ ବୈଠକରେ ଆଲୋଚନା ହେବ । ବୋର୍ଡର କହିବା ଅନୁଯାୟୀ, ଅନ୍ୟ ପ୍ରସଙ୍ଗରୁ ଧ୍ୟାନ ହଟାଇବାକୁ ବିଜେପି ମୁସଲିମ ବିରୋଧୀ ଅଭିଯାନ ଆରମ୍ଭ କରିଛି ।
ଅନ୍ୟପଟେ ବାରଣାସୀ କୋର୍ଟରେ ଜ୍ଞାନବାପି ମାମଲାର ଶୁଣାଣି ହୋଇଛି । ସର୍ଭେ ରିପୋର୍ଟ ପାଇଁ ଆଉ ୨ ଦିନର ଯେଉଁ ସମୟ କମିଶନର ମାଗିଥିଲେ ତାହାକୁ ଗ୍ରୀନ୍ ସିଗନାଲ ଦେଇଛନ୍ତି କୋର୍ଟ । ଫଳରେ ଜ୍ଞାନବାପି ସର୍ଭେ ରିପୋର୍ଟ ଆଉ ୨ ଦିନ ପରେ ହିଁ କୋର୍ଟରେ ଉପସ୍ଥାପିତ ହେବ ।