ଗତକାଲି ଗୁଜୁରାଟ କଚ୍ଛ ଠାରେ ଭାରତୀୟ ବାୟୁସେନାର ଫାଇଟର ଏୟାରକ୍ରାଫ୍ଟ ଜାଗୁଆର ବିମାନ ଦୁର୍ଘଟଣାଗ୍ରସ୍ତ ହୋଇଥିଲା । ଯାହାଫଳରେ ଜାଗୁଆରର ପାଇଟ କମ୍ପାଣ୍ଡର ସଂଜୟ ଚୌହାନଙ୍କ ମୃତ୍ୟୁ ହୋଇଛି । ସୂଚନା ମୁତାବକ ଜାମନଗରର ଏୟାରବେସ ଠାରୁ ଉଡାଣ ଭରି ରୁଟିନ ତାଲିମ ପାଇଁ ଜାଗୁଆରକୁ ନେଇ ବାହାରିଥିଲେ ପାଇଲଟ ସଂଜୟ । କିଛି ସମୟ ପରେ ବେରଜା-ରମନିୟା ଗାଁ ନିକଟରେ ଜାଗୁଆର ବିମାନ ଦୁର୍ଘଟଣାଗ୍ରସ୍ତ ହୋଇଥିଲା । ବିମାନରେ ଥିବା ପାରାଚ୍ୟୁଟକୁ ଖୋଲିବାରେ ସମର୍ଥ ହୋଇ ନ ଥିଲେ ସଂଜୟ । ଫଳରେ ଘଟଣା ସ୍ଥଳରେ ତାଙ୍କର ମୃତ୍ୟୁ ହୋଇଥିଲା । ଏୟାର ବେସ ଠାରୁ ୩୦ କିଲୋମିଟର ଦୂରତାରେ ଦୁର୍ଘଟଣାଗ୍ରସ୍ତ ହୋଇଥିବା ଜାଗୁଆର ବିମାନର ଭଗ୍ନାବଶେଷ ଖଣ୍ଡ ବିଖଣ୍ଡିତ ହୋଇ ବେରଜା-ରମନିୟା ଗାଁ ଠାରୁ କିଛି ଦୂରତାରେ ପଡିଥିଲା । ସ୍ଥାନୀୟ ଲୋକ ଏ ବିଷୟରେ ଜାଣିବା ପରେ ତୁରନ୍ତ ନିକଟସ୍ଥ ପୋଲିସ ଓ ଅନ୍ୟ ଅଧିକାରୀଙ୍କୁ ସୁଚନା ଦେଇଥିଲେ ।
Kanak News is now on WhatsApp
Join and get latest news updates delivered to you via WhatsApp
ଲୋକମାନଙ୍କ କହିବା ଅନୁସାରେ ବିମାନର ଧ୍ୱଂସାବଶେଷ ଗାଁ ନିକଟରେ ଥିବା କ୍ଷେତରେ ପଡିଥିଲା, ଯାହାଫଳରେ କ୍ଷେତରେ ଚରୁଥିବା କିଛି ଗାଇ, ଛେଳି ଓ ଗୃହପାଳିତ ପଶୁମାନଙ୍କର ମୃତ୍ୟୁ ହୋଇଥିବା ଗାଁ ଲୋକେ କହିଛନ୍ତି । ଭାରତୀୟ ବାୟୁସେନା ମୁଖ୍ୟାଳୟରୁ ଜାଗୁଆର ପାଇଲଟ କାହିଁକି ଏବଂ କେଉଁ କାରଣରୁ ଦୁର୍ଘଟଣାଗ୍ରସ୍ତ ହେଲା ସେଥିପାଇଁ କୋର୍ଟ ଅଫ ଇନକ୍ୱ୍ୟାରୀ ନିର୍ଦ୍ଦେଶ ଦିଆଯାଇଛି । ତେବେ ବିମାନଟି ଗାଁ ଉପରେ ଉଡୁଥିବା ହେତୁ ଏକ ବଡ ଧରଣର କ୍ଷୟକ୍ଷତିକୁ ଏଡାଇବାକୁ ଯାଇ ନିଜ ଜୀବନକୁ ବାଜି ଲଗାଇଦେଲେ ଲଢ଼ୁଆ ପାଇଲଟ ସଂଜୟ । ବିମାନଟି ଯେତେବେଳେ ଆକାଶରେ ଦୁର୍ଘଟଣାଗ୍ରସ୍ତ ହେଲା ସଂଜୟ ଚାହିଁଥିଲେ ସେ ସମୟରେ ବିମାନକୁ ଛାଡି ପାରାଚ୍ୟୁଟ ସହାୟତରେ ଡେଇଁ ପାରିଥାନ୍ତେ, କିନ୍ତୁ ସଂଜୟ ତାହା ନ କରି ଦୁର୍ଘଟଣାଗ୍ରସ୍ତ ବିମାନକୁ ଗାଁ ଠାରୁ ଦୁରକୁ ନେଇଯିବାରେ ସଫଳ ହୋଇଥିଲେ । ହେଲେ ନିଜ ଜୀବନକୁ ବଞ୍ଚାଇବାରେ ବିଫଳ ହୋଇଗଲେ ଏହି ଲଢ଼ୁଆ ପାଇଲଟ ।
ପାଇଲଟ ସଂଜୟ ଚୌହାନଙ୍କ ବଳିଦାନ ଏବେ ସମସ୍ତଙ୍କ ପାଇଁ ପ୍ରେରଣା ପାଲଟିଛି । ବିପଦ ମୁଖରୁ ବର୍ତ୍ତିଥିବା ଗାଁ ଲୋକଙ୍କ ଠାରୁ ଆରମ୍ଭ କରି ଦେଶବାସୀ ଏବେ ସଂଜୟଙ୍କୁ ସଲାମ କରୁଛନ୍ତି । ଲଢ଼ୁଆ ପାଇଲଟ ସଂଜୟ ଚୌହାନ ୧୯୮୯ ମସିହାରେ ଭାରତୀୟ ବାୟୁସେନାରେ ସାମିଲ ହୋଇଥିଲେ । ଭାରତୀୟ ବାୟୁସେନାର ଅଧିକାରୀଙ୍କ କହିବା ଅନୁସାରେ ୫୦ ବର୍ଷୀୟ ସଂଜୟ ତାଙ୍କ ସର୍ଭିସ କ୍ୟାରିଅରରେ ୩ହଜାର ୮ଶହ ଘଣ୍ଟା ବିମାନ ଉଡାଇବାର ଦକ୍ଷତା ରଖିଥିଲେ । ସେଥିପାଇଁ ୨୦୧୦ ମସିହାରେ ସଂଜୟଙ୍କୁ ବାୟୁସେନା ମେଡାଲ ମିଳିଥିଲା ।
ସଂଜୟ ବାୟୁସେନାରେ ଯୋଗଦେବା ପରଠାରୁ ଭାରତୀୟ ବାୟୁସେନାର ଜାଗୁଆର, ମିଗ-୨୧, ହଣ୍ଟର, ଏଚ.ପି.ଟି-୩୨, ଇସକାର, କିରନ , ଆଭ୍ରୋ-୭୪୮, ଏଏନ-୩୨, ବୋଇଂ ଭଳି ୧୭ଟି ଲଢ଼ୁଆ ବିମାନ ସହ ରାଫେଲ , ଗ୍ରିପେନ ଓ ୟୁରୋ ଭଳି ବିଦେଶୀ ବିମାନ ଉଡାବାର ଦକ୍ଷତା ରଖିଥିଲେ ଏହି ଲଢ଼ୁଆ ପାଇଲଟ । ଗାଁରେ ବସବାସ କରୁଥିବା ହଜାର ହଜାର ଲୋକଙ୍କୁ ବଞ୍ଚାଇବାରେ ସଫଳ ହୋଇଛନ୍ତି ସଂଜୟ । କିନ୍ତୁ ନିଜ ଜୀବନ ବାଜି ଲଗେଇଥିବା ସଂଜୟଙ୍କ ମୃତ୍ରୁ୍ୟ ପରେ ତାଙ୍କ ବଳିଦାନକୁ ଅଶ୍ରୁଳ ଶ୍ରଦ୍ଧାଞ୍ଜଳି ଦେଇଛନ୍ତି ରାଜନେତା ଓ ଭାରତୀୟ ଯବାନ । ଭାରତୀୟ ସେନାର ପୂର୍ବତନ ସ୍ୱତନ୍ତ୍ର ବଳ ଅଫିସର ସୁରେନ୍ଦ୍ର ପୁନିଆ ନିଜ ଟ୍ୱିଟ ମାଧ୍ୟମରେ ସଂଜୟଙ୍କୁ ରିୟଲ ହିରୋ ଭାବେ ସମ୍ବର୍ଦ୍ଧିତ କରିଛନ୍ତି । ପୁନିଆ କହିଛନ୍ତି ଯେ ସଂଜୟ ପାରାଚ୍ୟୁଟ ଖୋଲି ନଥିଲେ କାରଣ ଦୁର୍ଘଟଣାଗ୍ରସ୍ତ ବିମାନଟି ଗାଁ ଉପରେ ଉଡୁଥିଲା, ଯେଉଁଥିରେ ଗ୍ରାମବାସୀଙ୍କୁ ବିପଦ ମୁଖରୁ ବଞ୍ଚାଇ ନିଜେ ମରଣ ମୁହଁକୁ ଚାଲିଗଲେ ।