କନକ ବ୍ୟୁରୋ: ଗୃହ ରାଷ୍ଟ୍ରମନ୍ତ୍ରୀ ତୁଷାରକାନ୍ତି ବେହେରାଙ୍କ ଏହି ବୟାନ ଏବେ ଏକ ବଡ଼ ବିତର୍କ ସୃଷ୍ଟି କରିଛି । ନିଜେ ଆଇନଶୃଙ୍ଖଳା ଦାୟୀତ୍ୱରେ ଥିବା ଗୃହରାଷ୍ଟ୍ର ମନ୍ତ୍ରୀ, ଆଇନର ଗଳାବାଟ ଦେଇ କିଭଳି କ୍ଷତିପୂରଣ ଟଙ୍କା ବାଟମାରଣା ହେଉଛି ତାହା କ୍ୟାମେରା ଆଗରେ କହିଛନ୍ତି । ସେ କହିଛନ୍ତି- ପୀଡ଼ିତଙ୍କ ସହାୟତା ଟଙ୍କା ବାଟମାରଣା ହେଉଛି । ଏହା ପଛରେ ଅସାଧୁ ପୁଲିସ ଓ ଆଇନଜୀବୀଙ୍କ ହାତ ରହିଛି ଏବଂ ସେମାନଙ୍କ ମଧ୍ୟରେ ଅସାଧୁ ମେଂଟ ରହିଛି । ‘ସାକାର’ ଯୋଜନା ମାଧ୍ୟମରେ ପୀଡ଼ିତଙ୍କୁ ସହାୟତା ଯୋଗାଉଥିବା ବେଳେ ଏହି ଅସାଧୁ ମେଂଟ, ମିଛ ମାମଲାକୁ ସତ କରି ସରକାରୀ ସହାୟତାର ଲାଭ ଉଠାଉଛନ୍ତି । ଫଳରେ ନିର୍ଦ୍ଦୋଷ ବ୍ୟକ୍ତି ମାମଲାରେ ଛନ୍ଦି ହେଉଛନ୍ତି । ଅଧିକାଂଶ ଆଟ୍ରୋସିଟି ମାମଲାରେ ରାଜନୈତିକ ଉଦ୍ଦେଶ୍ୟ ପ୍ରଣୋଦିତ ଥିବା ମଧ୍ୟ କହିଛନ୍ତି ଗୃହ ରାଷ୍ଟ୍ରମନ୍ତ୍ରୀ ।
Kanak News is now on WhatsApp
Join and get latest news updates delivered to you via WhatsApp
ଗୃହ ରାଷ୍ଟ୍ରମନ୍ତ୍ରୀଙ୍କ ଏହି ବୟାନ, ବିରୋଧୀଙ୍କୁ ରାଜ୍ୟ ସରକାରଙ୍କୁ ଟାର୍ଗେଟ୍ କରିବା ପାଇଁ ଏକ ସୁଯୋଗ ଆଣି ଦେଇଛି । ରାଜ୍ୟ ସରକାର ଦଳିତ ଓ ଆଦିବାସୀ ବିରୋଧୀ । ମନ୍ତ୍ରୀଙ୍କ ମନ୍ତବ୍ୟ ଦଳିତ ଓ ଆଦିବାସୀଙ୍କ ପ୍ରତି ଅପମାନ ବୋଲି ବିଜେପି ଅଭିଯୋଗ କରିଛି । ରାଜ୍ୟ ସରକାରଙ୍କ ଅଧୀନରେ ସମସ୍ତ ପୁଲିସ କର୍ମଚାରୀ କାମ କରୁଛନ୍ତି । ଗୃହମନ୍ତ୍ରୀ ଯେଉଁ ମନ୍ତବ୍ୟ ଦେଇଛନ୍ତି ତାହା ପ୍ରମାଣିତ କରୁଛି ଯେ, ଓଡ଼ିଶା ପୁଲିସ ଉପରେ ମମନ୍ତ୍ରୀଙ୍କ ଭରସା ନାହିଁ ବୋଲି ବିରୋଧୀ ଅଭିଯୋଗ କରିଛି ।
ଏପଟେ ଆଇନଜୀବୀ ଏବଂ ପୁଲିସ୍ କର୍ମଚାରୀଙ୍କ ଉପରେ ମନ୍ତ୍ରୀ ରଖିଥିବା ମତକୁ ସହଜରେ ଗ୍ରହଣ କରି ନାହାଁନ୍ତି ଆଇନଜୀବୀ ଏବଂ ପୁଲିସ ଅଧିକାରୀ । ସେମାନଙ୍କ ମନ୍ତ୍ରୀ ତୁଷାରକାନ୍ତିଙ୍କ ମତ ସହ ଏକମତ ନଥିବା କହିଛନ୍ତି ।
ତେବେ ଓଡ଼ିଶାରେ ଆଇନଶୃଙ୍ଖଳା ଉପରେ ବିଶ୍ୱାସ ଥିବାରୁ ପୀଡ଼ିତମାନେ ସାହସ କରି ଅଭିଯୋଗ କରୁଛନ୍ତି । ଯାହା ଅନ୍ୟରାଜ୍ୟରେ ଦେଖିବାକୁ ମିଳୁନାହିଁ ବୋଲି ଗୃହ ରାଷ୍ଟ୍ରମନ୍ତ୍ରୀ ତୁଷାରକାନ୍ତି ବେହେରା ଏହି କାର୍ଯ୍ୟକ୍ରମରେ ସୂଚନା ଦେଇଛନ୍ତି ।