କନକ ବ୍ୟୁରୋ : ଦେଶରେ ଜାରି ରହିଛି ଧାର୍ମିକ ହିଂସା । ଉତ୍ତର ପ୍ରଦେଶ, ଦିଲ୍ଲୀ, ପଶ୍ଚିମବଙ୍ଗ, ଝାଡଖଣ୍ଡ ପରେ ଏବେ ଖୁଦ ପ୍ରଧାନମନ୍ତ୍ରୀଙ୍କ ନିଜ ରାଜ୍ୟ ଗୁଜୁରାଟରେ ବି ହିଂସାର ପ୍ରଭାବ ପଡିଛି । ରାଜ୍ୟର ବୋରସଦ ସହରରେ ସାଂପ୍ରଦାୟିକ ହିଂସା ଦେଖିବାକୁ ମିଳିଛି । ଏଥିରେ ୪ ଜଣ ପୋଲିସ କର୍ମୀ ଆହତ ହୋଇଛନ୍ତି । ଏନେଇ ଅହମ୍ମଦାବାଦ ମହାନିରୀକ୍ଷକ ବି.ଚନ୍ଦ୍ରଶେଖର କହିଛନ୍ତି କିଛି ଅଳ୍ପ ସଂଖ୍ୟକ ସମୁଦାୟର ଲୋକ କିଛି ଲୋକଙ୍କୁ ଘେରି ଯାଇଥିଲେ । ଏହାପରେ ଶହ ଶହ ଲୋକ ରାସ୍ତାକୁ ଓହ୍ଲାଇ ଆସିଥିଲେ । ଲୋକମାନେ ପୋଲିସ ଓ ପୋଲିସ ଗାଡି ଉପରକୁ ପଥର ମାଡ କରିବାରୁ ୪ ଜଣ ପୋଲିସ କର୍ମୀ ଆହତ ହେବା ସହ କିଛି ପୋଲିସ ଗାଡି ବି ଭାଙ୍ଗିଛି । ଏନେଇ ପୋଲିସ ଲାଠି ଚାର୍ଜ କରିବା ସହ ଲୁହବୋହା ଗ୍ୟାସ ପ୍ରୟୋଗ କରି ହିଂସାକୁ ଆୟତକୁ ଆଣିଛି ।
Kanak News is now on WhatsApp
Join and get latest news updates delivered to you via WhatsApp
ଆଗକୁ ହିଂସା ଉଗ୍ରରୂପ ନେବାର ସମ୍ଭାବନା ରଖି ରାଜ୍ୟ ରିଜର୍ଭ ପୋଲିସର ଦୁଇଟି କମ୍ପାନୀ, ୨୦୦ ପୋଲିସ କର୍ମୀଙ୍କୁ ହିଂସା ଦେଖାଦେଇଥିବା ଅଞ୍ଚଳରେ ନିୟୋଜିତ କରାଯାଇଛି । ଅନ୍ୟପଟେ ହିଂସା କରିଥିବା କିଛି ଲୋକଙ୍କ ପୋଲିସ ଗିରଫ କରିଛି ।
ବୋରସାଡ ଥାନା ସୂତ୍ରରୁ ମିଳିଥିବା ସୂଚନା ମୁତାବକ ହନୁମାନ ମନ୍ଦିର ପଛପଟେ ଏକ ଅବୈଦ୍ଧ ନିର୍ମାଣକୁ ନେଇ ଏଭଳି ହିଂସା ଦେଖିବାକୁ ମିଳିଛି ।