ବିପର୍ଯ୍ୟୟ ପରିଚାଳନା ନେଇ ଆନ୍ଧ୍ରକୁ ପାଠ ପଢାଇଲା ଓଡ଼ିଶା : ୨ ଦିନ ଜିଲ୍ଲା ଗସ୍ତରେ ଆସି ପ୍ରଶିକ୍ଷଣ ନେଲେ ଆନ୍ଧ୍ରର ୪ଜଣିଆ ଟିମ୍
ବାତ୍ୟା, ବନ୍ୟା ଭଳି ପ୍ରାକୃତିକ ବିପର୍ଯ୍ୟୟ ଓ କୋଭିଡ଼ ପରିଚାଳନାରେ ରୋଲ ମଡ଼େଲ ପାଲଟିଛି ଗଞ୍ଜାମ
କନକ ବ୍ୟୁରୋ : ଆନ୍ଧ୍ରକୁ ପାଠ ପଢାଉଛି ଓଡିଶା । ବିପର୍ଯ୍ୟୟ ପରିଚାଳନା କ୍ଷେତ୍ରରେ ଓଡିଶା ବାରମ୍ବାର ସଫଳତା ହାସଲ କରିଆସିଛି । ବନ୍ୟା, ବାତ୍ୟାଠାରୁ ଆରମ୍ଭ କରି କୋଭିଡ ପରିଚାଳନାରେ ମଧ୍ୟ ସଫଳ ହୋଇଛି ଓଡିଶା । ବିଶେଷ କରି ରୋଲ ମଡେଲ ପାଲଟିଛି ଗଞ୍ଜାମ ଜିଲ୍ଲା ପ୍ରଶାସନ । ବନ୍ୟା, ବାତ୍ୟା ଭଳି ପ୍ରାକୃତିକ ବିପର୍ଯ୍ୟୟ ଆସିବା ପୂର୍ବରୁ ପ୍ରସ୍ତୁତି ବୈଠକ, ଗ୍ରାମାଂଚଳରୁ ସଠିକ ପରିଚାଳନା ଏବଂ ବିପର୍ଯ୍ୟୟ ପରେ ପୁନରୁଦ୍ଧାର କାମ କିଭଳି କରାଯାଉଛି ସେନେଇ ପ୍ରଶିକ୍ଷଣ ନେଇଛନ୍ତି ଆନ୍ଧ୍ରରୁ ଆସିଥିବା ଟିମ୍ ।
Kanak News is now on WhatsApp
Join and get latest news updates delivered to you via WhatsApp
ଛତ୍ରପୁର ସ୍ଥିତ ସମ୍ମିଳନୀ କକ୍ଷରେ ଗଞ୍ଜାମ ଜିଲ୍ଲାପାଳ ବିଜୟ ଅମୃତା କୁଲାଙ୍ଗେଙ୍କ ସହ ଆଲୋଚନା କରିଛନ୍ତି ଆନ୍ଧ୍ରରୁ ଆସିଥିବା ଟିମ୍ । ୨ ଦିନିଆ ଗସ୍ତରେ ଆସିଥିବା ଆନ୍ଧ୍ର ଅଧିକାରୀଙ୍କ ଏହି ୪ ଜଣିଆ ଟିମରେ ଅଛନ୍ତି ଆନ୍ଧ୍ର ପ୍ରାକୃତିକ ବିପର୍ଯ୍ୟୟ ପରିଚାଳନା ବିଭାଗର ନିର୍ଦ୍ଦେଶକ ବି.ଆର. ଆମ୍ବେଦକର, କାର୍ଯ୍ୟନିର୍ବାହୀ ନିର୍ଦ୍ଦେଶକ ସି. ନାଗରାଜୁ, ବୈଜ୍ଞାନିକ ଏମ.ଏମ. ଅଲ୍ଲୀ ଓ ପ୍ରକଳ୍ପ ନିର୍ଦ୍ଦେଶକ ବି. ପ୍ରସାଦ । ଆନ୍ଧ୍ରର ଏହି ଅଧିକାରୀମାନଙ୍କୁ ଓଡିଶା ସରକାରଙ୍କ ଜିରୋ କାଜୁଆଲିଟି ଲକ୍ଷ୍ୟ ବାବଦରେ ଅବଗତ କରାଇଛନ୍ତି ଗଞ୍ଜାମ ଜିଲ୍ଲାପାଳ ।
ପ୍ରାକୃତିକ ବିପର୍ଯ୍ୟୟରେ କିଭଳି ଜଣଙ୍କର ବି ଜୀବନହାନୀ ହେବନାହିଁ ତାକୁ ଲକ୍ଷ୍ୟରେ ରଖି କାମ କରେ ପ୍ରଶାସନିକ କଳ । ତିତଲି, ଫନି, ହୁଡହୁଡ ଆଦି ବାତ୍ୟା ଦେଖିଛନ୍ତି ଗଞ୍ଜାମବାସୀ । ବିଶେଷ କରି ଚିକିିଟି, ରଙ୍ଗେଇଲୁଣ୍ଡା, ଛତ୍ରପୁର, ଗଞ୍ଜାମ ଓ ଖଲିକୋଟରେ ବାତ୍ୟା କିମ୍ବା ବନ୍ୟା ଆସିଲେ ସମୁଦ୍ରକୂଳିଆ ଅଞ୍ଚଳରେ କଚ୍ଚା ଘରେ ରହୁଥିବା ଲୋକଙ୍କୁ ସୁରକ୍ଷିତ ସ୍ଥାନକୁ କିଭଳି ପ୍ରାଥମିକତା ଦେଇ ସ୍ଥାନାନ୍ତର କରାଯାଏ ସେନେଇ ପଚାରି ବୁଝିଛନ୍ତି ଆନ୍ଧ୍ର ପ୍ରତିନିଧି ।