ହ୍ୱାଇଟ ହାଉସରେ ଦୀପାବଳି ଉତ୍ସବ । ଦୀପ ଲଗାଇ ଆମେରିକା ରାଷ୍ଟ୍ରପତି ଜୋ ବାଇଡେନ କହିଲେ, ଶୁଭ ଦୀପାବଳି ।
କନକ ବ୍ୟୁରୋ : କେବଳ ଭାରତରେ ନୁହେଁ ବିଦେଶରେ ବି ପାଳନ ହୋଇଛି ଦୀପାବଳୀ । ଆମେରିକା, କାନାଡା ଭଳି ଦେଶରେ ମଧ୍ୟ ଦୀପାବଳିର ଧୂମ ଦେଖିବାକୁ ମିଳିଛି । ଆମେରିକା ଓ କାନାଡାରେ ରହୁଥିବା ପ୍ରବାସୀ ଭାରତୀୟ ଦୀପାବଳିକୁ ବେଶ ଧୁମଧାମରେ ପାଳନ କରିଛନ୍ତି । ସେହିଭଳି ଆମେରିକା ରାଷ୍ଟ୍ରପତି ଜୋ ବାଇଡେନ ମଧ୍ୟ ପ୍ରବାସୀ ଭାରତୀୟଙ୍କ ସହ ମିଶି ହ୍ୱାଇଟ ହାଉସରେ ଦୀପାବଳି ଉତ୍ସବ ପାଳନ କରିଛନ୍ତି । ପତ୍ନୀ ଜିଲ ବାଇଡେନ ଓ ଉପରାଷ୍ଟ୍ରପତି ତଥା ଭାରତୀୟ ବଂଶୋଦ୍ଭବ କମଳା ହାରିସଙ୍କ ସହ ମିଶି ଜୋ ବାଇଡେନ ପାଳିଛନ୍ତି ଦୀପାବଳି । ସୋମବାର ରାତିରେ ହ୍ୱାଇଟ ହାଉସରେ ଦୀପାବଳି ସେଲିବ୍ରେସନ ପାଇଁ ସ୍ୱତନ୍ତ୍ର କାର୍ଯ୍ୟକ୍ରମର ଆୟୋଜନ ହୋଇଥିଲା । ଯେଉଁ କାର୍ଯ୍ୟକ୍ରମରେ ଅନେକ ଭାରତୀୟ କର୍ମଚାରୀ ସାମିଲ ହୋଇଥିଲେ । ବାଇଡେନ କହିଥିଲେ, ପୂର୍ବ ସରକାର ଅପେକ୍ଷା ଆମ ସରକାରରେ ଅଧିକରୁ ଅଧିକ ଭାରତୀୟ ବଂଶୋଦ୍ଭବ ସାମିଲ ହୋଇଛନ୍ତି । ଆମେରିକୀୟ ସଂସ୍କୃତି ସହ ଦୀପାବଳି ଯୋଡି ହେଉଥିବାରୁ ସମସ୍ତଙ୍କୁ ଶୁଭକାମନା ।
Kanak News is now on WhatsApp
Join and get latest news updates delivered to you via WhatsApp
ଦୀପାବଳି ପାଇଁ ଶୁଭେଚ୍ଛା ଜଣାଇବା ସହ କହିଛନ୍ତି, ବିଶ୍ୱରେ ବସବାସ କରୁଥିବା ୧୦୦ କୋଟିରୁ ଅଧିକ ହିନ୍ଦୁ, ଜୈନ, ଶିଖ, ବୌଦ୍ଧ ଧର୍ମର ଲୋକଙ୍କୁ ମୋର ଶୁଭକାମନା । ଆମେରିକାର ସରକାରରେ ଭିନ୍ନ ଭିନ୍ନ ସଂସ୍କୃତି ସହ ଜଡିତ ବ୍ୟକ୍ତି ସ୍ଥାନ ପାଇଛନ୍ତି । ଉପରାଷ୍ଟ୍ରପତି କମଳା ହାରିସ ଏହି ପଦରେ ପହଞ୍ଚିଥିବା ପ୍ରଥମ ଅଶ୍ୱେତ ମହିଳା । ଆମେରିକାର ବିକାଶରେ ଭାଗିଦାରୀ ସାଜିବା ସହ ସହଯୋଗର ହାତ ବଢାଇଥିବାରୁ ସମସ୍ତଙ୍କୁ ଧନ୍ୟବାଦ ।
ସେହିଭଳି ଆମେରିକା ଉପରାଷ୍ଟ୍ରପତି କମଳା ହାରିସ କହିଛନ୍ତି, ହ୍ୱାଇଟ ହାଉସ ସାଧାରଣ ଲୋକଙ୍କ ଘର ପାଲଟିଛି । ଆମେରିକାର ପ୍ରଥମ ମହିଳା ତଥା ଜୋ ବାଇଡେନଙ୍କ ପତ୍ନୀ ଏଭଳି ଏକ ମାହୋଲ ସୃଷ୍ଟି କରିଛନ୍ତି ଯେ, ଆମେରିକାର ଯେକୌଣସି ନାଗରିକ ବିନା ଦ୍ୱିଧାରେ ନିଜ ସଂସ୍କୃତି ଓ ଉତ୍ସବ ଏଠାରେ ସେଲିବ୍ରେଟ କରିପାରିବ ।