କନକ ବ୍ୟୁରୋ : ହିମାଚଳ ପ୍ରଦେଶ ବିଧାନସଭା ପାଇଁ ନିର୍ବାଚନ ତାରିଖ ଘୋଷଣା ହୋଇସାରିଥିବା ବେଳେ ଖୁବଶୀଘ୍ର ଗୁଜରାଟ ପାଇଁ ମଧ୍ୟ ତାରିଖ ଘୋଷଣା ହେବ । ଏହାର ମଧ୍ୟରେ ଆମ୍ ଆଦମୀ ପାର୍ଟି ଓ ବିଜେପି ମଧ୍ୟରେ କଥା କଟାକଟି ଜୋର ଧରିଛି । ଏହି କ୍ରମରେ ଆମ୍ ଆଦମୀ ପାର୍ଟିର ନେତା ତଥା ଦିଲ୍ଲୀର ଉପ ମୁଖ୍ୟମନ୍ତ୍ରୀ ମନୀଷ ସିସୋଦିଆ ଏକ ନୂଆ ଖୁଲାସା କରିଛନ୍ତି । ସେ ଅଭିଯୋଗ କରିଛନ୍ତି କି ଦିଲ୍ଲୀର ଆପ୍ ବିଧାୟକଙ୍କୁ କିଣିବାକୁ ବିଜେପି ଷଡଯନ୍ତ୍ର କରୁଛି । ଏହି ମାମଲାରେ ଗୃହମନ୍ତ୍ରୀ ଅମିତ୍ ଶାହାଙ୍କୁ ଗିରଫ କରାଯାଉ ବୋଲି ସେ ଦାବି କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ମନୀଷ ସିସୋଦିଆ କହିଛନ୍ତି କି ଦିଲ୍ଲୀର ୪୩ ଜଣ ଆମ୍ ଆଦମୀ ପାର୍ଟିର ବିଧାୟକଙ୍କୁ କିଣିବାକୁ ବିଜେପି ୧୦୭୫ କୋଟି ଟଙ୍କା ରଖିଛି । ଏନେଇ ସେ ପ୍ରଶ୍ନ କରିଛନ୍ତି କି, ବିଜେପି ପାଖରେ ଏତେ ଟଙ୍କା କେଉଁଠୁ ଆସିଲା ? ହଜାର ହଜାର କୋଟି ଟଙ୍କା ବିନିମୟରେ ବିଧାୟକ କିଣିବାକୁ ବିଜେପି ଯୋଜନା କରୁଛି ବୋଲି ସେ ଅଭିଯୋଗ କରିବା ସହ ଏହି ମାମଲାରେ ତଦନ୍ତ ହେଉ ବୋଲି ସେ ଦାବି କରିଛନ୍ତି ।
ସିସୋଦିଆ କହିଛନ୍ତି କି, ‘ମୁଁ ଅନେକ ଦିନ ହେବ ଏହି ଅଭିଯୋଗ ଆଣୁଛି । ବିଜେପି ତରଫରୁ ମୋତେ କିଣିବାକୁ ବି ଅଫର ମିଳିଥିଲା’ । ସେ ସିଧା ସଳଖ ଗୃହମନ୍ତ୍ରୀ ଅମିତ ଶାହା ଏହି ବିଧାୟକ କିଣା ଷଡଯନ୍ତ୍ରରେ ସାମିଲ ଥିବା ଅଭିଯୋଗ କରିଛନ୍ତି । ଏହା ଉପରେ ଇଡି କିମ୍ବା ସିବିଆଇ ତଦନ୍ତ କରନ୍ତୁ ବୋଲି ସେ ଦାବି କରିଛନ୍ତି ।