ଗୁଳିମାଡର କାରଣ ଖୋଜୁଛି କ୍ରାଇମବ୍ରାଂଚ: ‘୨ଘଂଟାରେ ୫୦ ପ୍ରଶ୍ନ’
କନକ ବ୍ୟୁରୋ: ସ୍ୱାସ୍ଥ୍ୟମନ୍ତ୍ରୀ ନବ ଦାସଙ୍କୁ କାହିଁକି ଗୁଳି ମାରିଲେ ଏଏସଆଇ ଗୋପାଳ ଦାସ । ଗୁଳି ମାରିବା ପଛର କାରଣ କଣ? ଏହାର କାରଣ ଖୋଜୁଛି କ୍ରାଇମବ୍ରାଂଚ । ଗତକାଲି ରାତିରେ ପାଖାପାଖି ୨ଘଂଟା ଜେରା କରିବା ପରେ ଆଜି ପ୍ରାୟ ୩ରୁ ୪ଘଂଟା ଜେରା କରାଯାଇଛି । ଏଡିଜି ଅରୁଣ ବୋଥ୍ରା ନିଜେ ଗୋପାଳଙ୍କୁ ପଚରାଉଚୁରା କରୁଛନ୍ତି । ଏଥିସହ ଗୋପାଳଙ୍କ ହେଣ୍ଡ ସ୍ୱାବ ନିଆଯାଇଛି । ହେଲେ, ଏପର୍ଯ୍ୟନ୍ତ ଗୁଳିମାଡର କାରଣ କଣ ସ୍ୱଷ୍ଟ ହୋଇନି ।
Kanak News is now on WhatsApp
Join and get latest news updates delivered to you via WhatsApp
ଗୁଳି ମାଡ କରିଥିବା ଏଏସଆଇ ଗୋପାଳ କୃଷ୍ଣ ଦାସ, ମନ୍ତ୍ରୀ ନବ ଦାସଙ୍କୁ କାହିଁକି ଗୁଳି ମାରିଲେ? ତାହା ଜାଣିବାକୁ ଓଡିଶାବାସୀ ଜାଣିବାକୁ ଚାହିଁ ରହିଥିବାବେଳେ, କାରଣ ଖୋଜୁଛି କ୍ରାଇମବ୍ରାଂଚ । ଗୋପାଳଙ୍କୁ ସୁନ୍ଦରଗଡ ରିଜର୍ଭ ପୋଲିସ କାର୍ଯ୍ୟାଳୟରେ ପଚରାଉଚୁରା କରାଯାଉଛି । ଏଡିଜି ଅରୁଣ ବୋଥ୍ରା ନିଜେ ଗୋପାଳ ଦାସଙ୍କୁ ଜେରା କରୁଛନ୍ତି । ସୂଚନା ଅନୁସାରେ ରବିବାର ରାତିରେ ପାଖାପାଖି ୨ଘଂଟା ପଚରାଉଚୁରା କରିଥିଲେ । ଦ୍ୱିତୀୟ ଦିନରେ ବି ୩ରୁ ୪ଘଂଟା ପଚରାଉଚୁରା କରିଛନ୍ତି । ପ୍ରଥମ ଦିନରେ ପ୍ରାୟ ୫୦ରୁ ଅଧିକ ପ୍ରଶ୍ନ ପଚାରିଥିଲେ ବୋଥ୍ରା ।
କ୍ରାଇମବ୍ରାଂଚ କରିଥିବା ସମ୍ଭାବ୍ୟ ପ୍ରଶ୍ନ..
– କାହିଁକି ନବ ଦାସଙ୍କୁ ଗୁଳି କଲେ?
– ସ୍ୱାସ୍ଥ୍ୟମନ୍ତ୍ରୀଙ୍କ ସହ କିଛି ବ୍ୟକ୍ତିଗତ ଶତ୍ରୁତା ଥିଲା କି?
– ମନ୍ତ୍ରୀଙ୍କ ଉପରେ ପୁରୁଣା ରାଗ ଥିଲା କି?
– କେଉଁ କଥାକୁ ନେଇ ମନ୍ତ୍ରୀଙ୍କ ଉପରେ ରାଗିଥିଲେ?
– ହତ୍ୟା ପାଇଁ ପୂର୍ବରୁ ଯୋଜନା କରିଥିଲେ କି?
– ଯଦି ହଁ, ହତ୍ୟା ଯୋଜନାରେ ଆଉ କିଏ ତାଙ୍କୁ ସହଯୋଗ କରିଥିଲେ କି?
– ମନ୍ତ୍ରୀଙ୍କୁ ହତ୍ୟା କରିବା ପାଇଁ କିଏ ଉସକେଇଥିଲା କି?
– ହତ୍ୟା ପଛରେ ରାଜନୈତିକ କିମ୍ବା ବ୍ୟବସାୟିକ ସଂପୃକ୍ତି ଅଛି କି?
– ସମସ୍ତଙ୍କ ସାମ୍ନାରେ ଗୁଳି ମାରିବା ପଛରେ କ’ଣ କାରଣ?
– ମାନସିକ ରୋଗ ପାଇଁ କେବେଠୁ ଔଷଧ ସେବନ କରୁଛନ୍ତି?
କେବଳ ଏତିକି ନୁହେଁ, ଘଟଣାସ୍ଥଳକୁ ଯାଇ ଯାଂଚ କରିଛି କ୍ରାଇମବ୍ରାଂଚ । ଯେଉଁଠି ଗୁଳିକାଣ୍ଡ ହୋଇଥିଲା ସେହି ସ୍ଥାନର ପାରିପାଶ୍ୱର୍ିକ ସ୍ଥିତିର ଅନୁଧ୍ୟାନ କରିଛି । ଏଥିସହ ଗୋପାଳଙ୍କ ହେଣ୍ଡ ସ୍ୱାବ୍ ନିଆଯାଇଛି । ସେ ପିନ୍ଧିଥିବା ପୋଲିସ ପୋଷାକକୁ ମଧ୍ୟ ନେଇଛି କ୍ରାଇମବ୍ରାଂଚ । ସେହିିପରି ନବ ଦାସଙ୍କ ପୋଷାକକୁ ମଧ୍ୟ କ୍ରାଇମବ୍ରାଂଚ ନେଇଛି । ଏସବୁ ଏସଏଫଏଲକୁ ପଠାଯିବ ।
ଅନ୍ୟପଟେ ନବ ଦାସଙ୍କୁ ଗୁଳିମାଡ ପରେ ରାଜ୍ୟର ଆଇନଶୃଂଖଳା ସ୍ଥିତିକୁ ନେଇ ପ୍ରଶ୍ନ ଉଠାଇଛନ୍ତି ବିରୋଧୀ ଏବଂ କ୍ରାଇମବ୍ରାଂଚ ତଦନ୍ତ ବଦଳରେ ସିବିଆଇ କିମ୍ବା ବିଚାରବିଭାଗୀୟ ତଦନ୍ତ କରିବାକୁ ଦାବି କରିଛନ୍ତି । ତେବେ ତଦନ୍ତ ଉପରେ ଭରଷା ରଖନ୍ତୁ ବୋଲି କହିଛି ଶାସକ ଦଳ ।
କ୍ରାଇମବ୍ରାଂଚ ଗୁଳିମାଡ ଘଟଣାର ତଦନ୍ତ କରୁଥିବାବେଳେ, ସେପଟେ ଝାରସୁଗୁଡାରେ ବରିଷ୍ଠ ଅଧିକାରୀମାନଙ୍କ ସହ ଉଚ୍ଚସ୍ତରୀୟ ବୈଠକ କରିଛନ୍ତି ଗୁଇନ୍ଦା ବିଭାଗ ମୁଖ୍ୟ ସଞ୍ଜିବ ପଣ୍ଡା । ଅନ୍ୟପଟେ ବ୍ରଜରାଜନଗର ଥାନାରେ ଗୋପାଳଙ୍କ ବିରୋଧରେ ମାମଲା ରୁଜୁ ହୋଇଛି । ଆଇପିସି ୩୦୭ ଓ ଆର୍ମସ ଆକ୍ଟରେ ମାମଲା ରୁଜୁ କରିଛି ପୋଲିସ । ଆଉ ତାଙ୍କୁ ଗିରଫ କରିବା ସହ ରିମାଣ୍ଡରେ ଆଣି ଅଧିକ ତଥ୍ୟ ହାସଲ କରିବାକୁ ଯୋଜନା କରିଛନ୍ତି କ୍ରାଇମବ୍ରାଂଚ ।