ଗୁଳିମାଡର ରହସ୍ୟ କ’ଣ? ବୋଥ୍ରା ଖୋଲିବେ ଭିତିରି କଥା?
କନକ ବ୍ୟୁରୋ: ସ୍ୱାସ୍ଥ୍ୟ ମନ୍ତ୍ରୀଙ୍କୁ ଗୁଳିମାଡ ଘଟଣାରେ ବିରୋଧୀ ଷଡଯନ୍ତ୍ରର ଗନ୍ଧ ବାରୁୁଥିବାବେଳେ, ସିବିଆଇ ତଦନ୍ତ ପାଇଁ ଦାବି କରିବା ଭିତରେ ବି ଅନୁସନ୍ଧାନ ଜାରି ରଖିଛି କ୍ରାଇମବ୍ରାଂଚ । ପ୍ରଥମ ଥର ପାଇଁ ରାଜ୍ୟରେ ଜଣେ ପୋଲିସ ଅଧିକାରୀଙ୍କ ଗୁଳିରେ ଜଣେ ମନ୍ତ୍ରୀଙ୍କ ମୃତ୍ୟୁ ହୋଇଥିବାରୁ ଏହି ମାମଲା ବେଶ ସମ୍ବେଦନଶୀଳ ହୋଇପଡିଛି । ଗୁଳିମାଡ ପଛର ରହସ୍ୟ ଉପରୁ ପରଦା ହଟାଇବା କ୍ରାଇମବ୍ରାଂଚ ପାଇଁ ବଡ ଚ୍ୟାଲେଞ୍ଜ ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ବଲାଙ୍ଗୀରର ପାର୍ସଲ ବୋମା ମାମଲା ହେଉ କି ନୟାଗଡର ପରୀ ମାମଲା, ତଦନ୍ତ କରି ରହସ୍ୟ ଉନ୍ମୋଚନ କରିଥିବା କ୍ରାଇମବ୍ରାଂଚ ଏଡିଜି ଅରୁଣ ବୋଥ୍ରାଙ୍କ ପାଇଁ, ସ୍ୱାସ୍ଥ୍ୟମନ୍ତ୍ରୀଙ୍କୁ ଏଏସଆଇ ଗୁଳିମାଡ କରିବା ମାମଲାର ସତ ପଦାକୁ ଆଣିବା ବଡ ଚ୍ୟାଲେଞ୍ଜ ହୋଇପାରେ । କାରଣ, ଅଭିଯୁକ୍ତ ଜଣଙ୍କ ନିଜେ ପୋଲିସ ହୋଇଥିବାରୁ ତାଙ୍କୁ ଆଇନ ବ୍ୟବସ୍ଥାରେ ଥିବା ଗଳାବାଟ ବେଶ୍ ଜଣା । ତେଣୁ ସେ ସେହି ଗଳାବାଟର ସୁଯୋଗ ନେଇ ହୁଏତ ତଦନ୍ତକାରୀ ଟିମକୁ ବାଟବଣା କରିବାକୁ ଉଦ୍ୟମ କରିପାରନ୍ତି । ଖସିବାକୁ ମିଛ ନାଟକ ବି କରିପାରନ୍ତି । ଏସବୁ ଭିତରେ, ଗୁଳିମାଡ ପଛରେ ରାଜନୈତିକ ଷଡଯନ୍ତ୍ର ଥିବା ବିରୋଧୀ ଅଭିଯୋଗ ଆଣିବା ପରେ ସନ୍ଦେହ ଆହୁରି ବଢ଼ି ଯାଇଛି ।
ଅଭିଯୁକ୍ତ ଗୋପାଳଙ୍କୁ ଗିରଫ କରାଯାଇଥିଲେ ବି ତାଙ୍କୁ ଦୋଷୀ ସାବ୍ୟସ୍ତ କରିବା, ଗୁଳିମାଡ ପାଇଁ ଦଣ୍ଡିତ କରିବା ବଡ ଚ୍ୟାଲେଞ୍ଜ । ଏହାକୁ କୋର୍ଟରେ ପ୍ରମାଣିତ କରିବାକୁ ପଡିବ? ଏଥିସହ ଯଦି ଯୋଜନା ବଦ୍ଧ ହତ୍ୟାକାଣ୍ଡ ହୋଇଥାଏ, ତା
ହେଲେ ତାଙ୍କ ପଛରେ ଆଉ କିଏ ତାହା ବାହାର କରିବା, କ୍ରାଇମବ୍ରାଂଚ ପାଇଁ ବଡ ଚ୍ୟାଲେଞ୍ଜ ହେବ । ନଜର ପକାନ୍ତୁ କ୍ରାଇମବ୍ରାଂଚ ପାଇଁ କଣ ହୋଇପାରେ ଚ୍ୟାଲେଞ୍ଜ..
– ଏଏସଆଇ ତାଙ୍କ ସର୍ଭିସ ବନ୍ଧୁକରୁ ମନ୍ତ୍ରୀଙ୍କୁ ଗୁଳି କରିଛନ୍ତି
– ଗୁଳିମାଡ ପଛରେ ଭିତିରି କଥା କଣ?
– ବ୍ୟକ୍ତିଗତ କାରଣରୁ ଗୁଳିମାଡ ନା ଆଉ କିଛି ରହସ୍ୟ?
– ରାଜନୈତିକ, ବ୍ୟବସାୟିକ ଷଡଯନ୍ତ୍ର ଅଛି କି ନାହିଁ ?
– ଗୁଳି ମାରିବା ସମୟରେ କିପରି ଥିଲା ମାନସିକ ସ୍ଥିତି?
ପୂରା ରହସ୍ୟ ଉପରୁ ପରଦା ହଟାଇବା ପାଇଁ କ୍ରାଇମବ୍ରାଂଚ ଗୋପାଳଙ୍କୁ ରିମାଣ୍ଡରେ ଆଣିବାକୁ ଯୋଜନା କରୁଛି । କିନ୍ତୁ ଗୁଳିକାଣ୍ଡ ପଛରେ ଯଦି ବ୍ୟକ୍ତିଗତ କାରଣ ନଥାଇ, ରାଜନୈତିକ କି ବ୍ୟବସାୟିକ କାରଣ ଥିବ ତାକୁ ପଦାକୁ ଆଣିବାକୁ ସକ୍ଷମ ହେବ ତ କ୍ରାଇମବ୍ରାଂଚ?