ଚାଲିଲା ଆଇନର ଯୁଦ୍ଧ ! ନିର୍ବାଚନରେ ଟଙ୍କା କାରବାର ନେଇ ମୁଖ୍ୟମନ୍ତ୍ରୀଙ୍କ ପାଇଁ କୋର୍ଟ ଗଲେ ଗଂଜାମ ଜିଲ୍ଲାପାଳ
କନକ ବ୍ୟୁରୋ : ବିଜେଡିର ନିର୍ବାଚନୀ ପାଣ୍ଠି ଅନିୟମିତତା ନେଇ ପୁଣି ପ୍ରଶ୍ନ ଉଠାଇଲା ଭାରତୀୟ ଜନତା ପାର୍ଟି । ବିଶେଷ କରି ଭୁବନେଶ୍ୱର ୟୁନିଟ-୧ରେ ଥିବା ଏକ ନନ୍ ପର୍ସନାଲ ଆକାଉଂଟରୁ ବିଜେଡିର ଏକ କରେଂଟ୍ ଆକାଉଂଟକୁ ଏକାଧିକଥର ଲକ୍ଷଲକ୍ଷ ଟଙ୍କା ଟ୍ରାନ୍ସଫର ହୋଇଥିବାବେଳେ ଏ ବାବଦରେ ବିଜୁ ଜନତା ଦଳ କାହିଁକି ଚୁପ ରହିଛି ବୋଲି ପ୍ରଶ୍ନ କରିଛି ବିଜେପି । ୧୦୦୯୧୮୦୫୫୭୩ ଆକାଉଂଟ ନମ୍ବର ଭୁବନେଶ୍ୱର ମୁଖ୍ୟ ବ୍ରାଂଚ ନାଁରେ ରହିଛି । ସେହିପରି ଭୁବନେଶ୍ୱର ଏସବିଆଇ ମୁଖ୍ୟ ବ୍ରାଂଚକୁ ଚିଠି ଲେଖି କେଉଁସବୁ ତଥ୍ୟ ମଗାଯାଇଥିଲା ସେନେଇ ବିଜେଡି ସ୍ପଷ୍ଟ କରିବା ଉଚିତ ବୋଲି ସାମ୍ବାଦିକ ସମ୍ମିଳନୀରେ ଦାବି କରିଛି ଭାରତୀୟ ଜନତା ପାର୍ଟି ।
Kanak News is now on WhatsApp
Join and get latest news updates delivered to you via WhatsApp
ଆଜି ପୂର୍ବାହ୍ନରେ ସଚିବାଳୟରେ ବିଜେଡି ସାଂସଦ ପ୍ରତାପ ଦେବ ଦଳର ନିର୍ବାଚନୀ ପାଣ୍ଠି କାରବାର ନେଇ ଗଣମାଧ୍ୟମକୁ ସ୍ପଷ୍ଟୀକରଣ ଦେଇଥିଲେ । ବିଜେଡିର ୟୁନିଟ-୧ର ମୁଖ୍ୟ ବ୍ରାଂଚରେ ଗୋଟିଏ କରେଂଟ୍ ଆକାଉଂଟ୍ ରହିଥିବା ଦର୍ଶାଇଥିଲେ । ଅନ୍ୟପଟରେ ବୁଦ୍ଧନଗରରରେ ଥିବା ଏସବିଆଇର ଅନ୍ୟଏକ ବ୍ରାଂଚରେ ଦଳର ରହିଥିବା ଆକାଉଂଟରୁ ନବୀନ ପଟ୍ଟନାୟକଙ୍କୁ ୧୦ ଲକ୍ଷ, ଭୁବନେଶ୍ୱର କିଷାନଙ୍କୁ ୫ ଲକ୍ଷ ଟଙ୍କା ସହ ଅନ୍ୟାନ୍ୟ ପ୍ରାର୍ଥୀମାନଙ୍କୁ କିଭଳି ଟଙ୍କା ଦିଆଯାଇଛି ସେନେଇ ତଥ୍ୟ ରଖିଥିଲେ । ମୁଖ୍ୟମନ୍ତ୍ରୀ ତାଙ୍କ ସତ୍ୟପାଠରେ ବିଜେଡି ଦଳ ତରଫରୁ ୧୩ ଲକ୍ଷ ୧୦ ହଜାର ୬୨୫ ଟଙ୍କା ଆରଟିଜିଏସ ଚେକ୍ ମାଧ୍ୟମରେ ପାଇଥିବା ଦର୍ଶାଇଥିବାବେଳେ, ପ୍ରତାପ ଦେବ ପାର୍ଟି ତରଫରୁ ମୁଖ୍ୟମନ୍ତ୍ରୀଙ୍କୁ ୧୦ ଲକ୍ଷ ଟଙ୍କା ଦିଆଯାଇଥିବା କହିଥିଲେ ।
ସେପଟେ ୨୦୧୪ ସାଧାରଣ ନିର୍ବାଚନରେ ବିଜେଡି ଦଳ ଓ ପ୍ରାର୍ଥୀଙ୍କ ସତ୍ୟପାଠରେ ବିରାଟ ତାରତମ୍ୟ ସାମନାକୁ ଆସିଛି । କୁଚିଣ୍ଡାର ବିଜେଡି ପ୍ରାର୍ଥୀ ଭୁବନେଶ୍ୱର କିସାନ ନିର୍ବାଚନ କମିଶନଙ୍କୁ ୨୦୧୪ ମସିହା ମେ ୮ ତାରିଖରେ ଦଳ ୫ ଲକ୍ଷ ଟଙ୍କା ଦେଇଥିବା ଦର୍ଶାଇଛି । ମାତ୍ର , ଭୁବନେଶ୍ୱର କିସାନ ନିର୍ବାଚନ କମିଶନଙ୍କ ପାଖରେ ଦାଖଲ କରିଥିବା ସତ୍ୟପାଠରେ ସେ ଦଳ ପକ୍ଷରୁ କୌଣସି ଟଙ୍କା ପାଇନଥିବା ଦର୍ଶାଇଛନ୍ତି । ସେହିପରି ନବରଙ୍ଗପୁର ସାଂସଦ ଇଂ, ବଳଭଦ୍ର ମାଝୀଙ୍କୁ ଦଳ ସାଢ଼େ ୭ ଲକ୍ଷ ଟଙ୍କା ଦେଇଥିବା ଦର୍ଶାଇଥିବାବେଳେ ସେ ଦଳ ପକ୍ଷରୁ କୌଣସି ଟଙ୍କା ପାଇନଥିବା ଦର୍ଶାଇଥିଲେ । ଅନ୍ୟପଟରେ ତତ୍ୱପ୍ରକାଶ ଶତପଥୀ ଓରଫ ପପୁ ପମପମ ସେତିକିବେଳେ ଚମ୍ପୁଆ ନିର୍ବାଚନ ମଣ୍ଡଳୀରୁ ଲଢିବା ପାଇଁ ଦଳ ତରଫରୁ ୫ ଲକ୍ଷ ଟଙ୍କା ପାଇଥିବା ଦଳ ଦର୍ଶାଇଥିବାବେଳେ ସେ ତାହାକୁ ତାଙ୍କ ସତ୍ୟପାଠରେ ଦର୍ଶାଇଛନ୍ତି ।
ଅନ୍ୟପଟେ ମୁଖ୍ୟମନ୍ତ୍ରୀଙ୍କ ପାଇଁ ଗଂଜାମର ଜିଲ୍ଲାପାଳ ହାଇକୋର୍ଟରେ ଆବେଦନ କରିଛନ୍ତି ଯେ ଚାଲିିଥିବା ମାମଲା ଖାରଜ କରାଯାଉ । ମୁଖ୍ୟମନ୍ତ୍ରୀଙ୍କ ସାମ୍ବିଧାନିକ ପଦ ମର୍ଯ୍ୟାଦାରେ ଏଭଳି ଏକ ମାମଲା ଆଂଚ୍ ଆଣିଛି ବୋଲି ଏହି ପିଟିସନରେ ଗଂଜାମର ଜିଲ୍ଲାପାଳ ତଥା ରିଟର୍ନିଂ ଅଫିସର ପ୍ରେମ୍ ଚନ୍ଦ୍ର ଚୌଧୁରୀ ଦର୍ଶାଇଛନ୍ତି ।
ହାଇକୋର୍ଟରେ ଦାଖଲ ହୋଇଥିବା ଗଂଜାମ ଜିଲ୍ଲାପାଳଙ୍କ ଏହି ସତ୍ୟପାଠଟି ଜାରି ରହିଥିବା ବିଜେଡିର ନିର୍ବାଚନ ପାଣ୍ଠି ବିବାଦକୁ ଆଉ ଗୋଟିଏ ପାଦ ଆଗକୁ ନେଇଛି । ଗଂଜାମର ଜିଲ୍ଲାପାଳ ପ୍ରେମ୍ ଚନ୍ଦ୍ର ଚୌଧୁରୀ କୋର୍ଟକୁ କହିଛନ୍ତି- ଏହା ଏକ ନିର୍ବାଚନ ବିବାଦ ହୋଇନଥିବାରୁ ଗୋଟିଏ ବର୍ଷ ପରେ ଏହାକୁ ପୁଣି ଥରେ ଯୁକ୍ତିଯୁକ୍ତ ନୁହେଁ । ଆର୍ଥିକ କାରବାର ସଂପର୍କିତ ସମସ୍ତ ତଥ୍ୟ ନିର୍ବାଚନ କମିଶନଙ୍କୁ ଦିଆସରିଥିବା ବେଳେ ଏବଂ କମିଶନ ଏହାକୁ ଗ୍ରହଣ କରିସାରିଥିବା ବେଳେ ତୃତୀୟ ପକ୍ଷର କଥାରେ ଏହାକୁ ପୁଣିଥରେ ଆରମ୍ଭ କରିବା ଉଚିତ ହେବ ନାହିଁ ।
ମୁଖ୍ୟମନ୍ତ୍ରୀ ଏକ ସାମ୍ବିଧାନିକ ପଦବୀରେ ରହିଥିବାରୁ ଏବଂ ଆବେଦନକାରୀ ସିଧାସଳଖ ଏସଂପର୍କରେ ଗଣମାଧ୍ୟମକୁ ଯାଉଥିବାରୁ ପଦମର୍ଯ୍ୟାଦାକୁ କ୍ଷୁର୍ଣ୍ଣ କରୁଛି । ଏ ସମସ୍ତ ଅଭିଯୋଗ ମିଥ୍ୟା ଓ ଭିତିହୀନ ବୋଲି ଜିଲ୍ଲାପାଳ ଜଣାଇଛନ୍ତି । ଆବେଦନକାରୀ ମୁଖ୍ୟମନ୍ତ୍ରୀ ନିର୍ବାଚନମଣ୍ଡଳୀର ପ୍ରାର୍ଥୀ ବା ଭୋଟର ନୁହନ୍ତି । ତେଣୁ ଆବେଦନକାରୀଙ୍କ ଏହି ମାମଲା ଗ୍ରହଣଯୋଗ୍ୟ ନୁହେଁ ବୋଲି ଜିଲ୍ଲାପାଳ ଦର୍ଶାଇଛନ୍ତି ।