ପାଣି ପାରିହେଲେ ପାଠପଢା ପ୍ରସଙ୍ଗ : ଅସ୍ତରଙ୍ଗା ଚିତ୍ରେଶ୍ୱରୀ-ତେଲିକୁଦ ନଦୀବନ୍ଧ ରାସ୍ତା ନିର୍ମାଣକୁ ନେଇ ବ୍ଲକ୍ ପ୍ରଶାସନ ଓ ଜଳସମ୍ପଦ ବିଭାଗ ମୁହାଁମୁହିଁ
କନକ ବ୍ୟୁରୋ : କାକଟପୁର କାଦୁଆ ନଦୀ ପାଣି ଦେଇ ଛାତ୍ରଛାତ୍ରୀ ସ୍କୁଲ୍ ଯିବା ମାମଲାରେ ନୂଆ ମୋଡ଼ । ଏହି ଘଟଣା କନକ ନ୍ୟୁଜ୍ ପ୍ରସାରଣ କରିବା ପରେ ଚିତେଶ୍ୱର-ତେଲିକୁଦ ନଦୀବନ୍ଧ ରାସ୍ତା କାହାର ତାକୁ ନେଇ ବ୍ଲକ୍ ପ୍ରଶାସନ ଓ ଜଳସମ୍ପଦ ବିଭାଗ ମୁହାଁମୁହିଁ ହୋଇଛନ୍ତି । ଆଣ୍ଠୁଏ ପାଣିରେ ପିଲାମାନେ ସ୍କୁଲ ଯାଉଥିବା ବେଳେ ଦାୟିତ୍ୱ ଖସାଇବାକୁ ଦୁଇ ବିଭାଗ ପରସ୍ପର ଉପରେ ଦୋଷ ଲଦିଛନ୍ତି । କାକଟପୁର ବିଡ଼ିଓ ଏ ନେଇ ଜଳସମ୍ପଦ ବିଭାଗକୁ ଚିଠି ଲେଖିବା ପରେ ଜଳସମ୍ପଦ ବିଭାଗର ସହକାରୀ ନିର୍ବାହୀ ଯନ୍ତ୍ରୀ ସ୍ଥିତି ଅନୁଧ୍ୟାନ କରି ରାସ୍ତା ନିର୍ମାଣ ଦାୟିତ୍ୱ ବ୍ଲକର ବୋଲି ଜଣାଇଛନ୍ତି । ଏହାପରେ ଚିତ୍ରେଶ୍ୱରୀ ସ୍କୁଲ ଛାତ୍ର ଛାତ୍ରୀ ଜଳସମ୍ପଦ ବିଭାଗ ଅଧୀକ୍ଷକଙ୍କୁ ଘେରି ନିଜ ଦାବି ରଖିଛନ୍ତି । ସମସ୍ୟାର ସମାଧାନ ନହେଲେ ଆନ୍ଦୋଳନ କରାଯିବ ବୋଲି ଛାତ୍ରଛାତ୍ରୀ ଚେତାବନୀ ଦେବା ପରେ ଏହାକୁ ନେଇ ପ୍ରଶାସନିକ ସ୍ତରରେ ତତ୍ପରତା ପ୍ରକାଶ ପାଇଛି । ପାଣି ଦେଇ ଛାତ୍ରଛାତ୍ରୀ ସ୍କୁଲ ଯିବା ଘଟଣା ପ୍ରଥମ କନକ ନ୍ୟୁଜ ପ୍ରସାରିତ କରିଥିଲା ।
Kanak News is now on WhatsApp
Join and get latest news updates delivered to you via WhatsApp
ସୂଚନାଯୋଗ୍ୟ ନଦୀ ଭିତରେ ଘାଇ, ଆଉ ଘାଇ ମୁହଁରେ ପଶି ଅଂଟାଏ ଉଚ୍ଚର ପାଣି ପାର ହେଲେ ସ୍କୁଲ ଯାଆନ୍ତି କାକଟପୁର ଛାତ୍ରଛାତ୍ରୀ । ଆଉ କିଛି ବାଟ ନାହିଁ । ଦିନେ କି ଦୁଇ ଦିନ ନୁହଁ, ବର୍ଷ ତମାମ ଏଭଳି ସ୍ଥିତି । ଘାଇ ମୁହଁରେ ଅଂଟାଏ ପାଣିରେ ପଶି ସ୍କୁଲ ଯାଆନ୍ତ ଛାତ୍ରଛାତ୍ରୀ । ପାଣି ପାର ହେଲେ ପାଠପଢା । ସ୍କୁଲକୁ ଆଉ ରାସ୍ତା ନାହିଁ । ବର୍ଷା ଦିନେ କାଦୁଆ ନଦୀରେ ପାଣି ଉବୁଟୁବୁ । ଆଉ ତାରି ଭିତରେ ପଶି ନିଇତି ଯିବାକୁ ପଡିଥାଏ ସ୍କୁଲ୍ । ଟିକେ ଗୋଡ ଖସିଲେ କଥା ସରିଲା । ପ୍ରତିଦିନ ନଦୀ ପାର ହୋଇ ଚିତ୍ରେଶ୍ୱରୀ ମାଧ୍ୟମିକ ସ୍କୁଲକୁ ଆସନ୍ତି ତେଲିକୁଦ ଗାଁର ୬ଟି ୱାର୍ଡର ୫୦ରୁ ଅଧିକ ଛାତ୍ରଛାତ୍ରୀ । ଖରାଦିନେ ପାଣି କମ୍ ଥିବାରୁ କେମିତି କେମିତି କାମ ଚଳିଯାଏ । ହେଲ ବର୍ଷାଦିନେ ଅବସ୍ଥା ସାଂଘାତିକ । ନଦୀ ବନ୍ଧ ଖାଇଯାଇଥିବା ବେଳେ ଏବେ ତିନି ତିନିଟି ଘାଇ ସୃଷ୍ଟି ହୋଇଛି । ଯାହା ମଧ୍ୟ ଦେଇ ସ୍କୁଲ ଯାଉଛନ୍ତି ଛୋଟ ଛୋଟ ପିଲାମାନେ । ତେବେ କନକ ନ୍ୟୁଜରେ ଖବର ପ୍ରକାଶ ପରେ ଏବେ ବ୍ଲକ୍ ପ୍ରଶାସନ ଓ ଜଳସମ୍ପଦ ବିଭାଗ ମୁହାଁମୁହିଁ ହୋଇଛନ୍ତି ।