ଆର୍ମି ଭର୍ତ୍ତି ରାଲି ପାଇଁ ବର୍ଷରେ ଗୋଟିଏ ଥର ଆବେଦନ କରିପାରିବେ ଆଶାୟୀ, କମନ ଏଣ୍ଟ୍ରାନ୍ସ ଟେଷ୍ଟ ସମେତ ଆସୁଛି ନିୟମ
କନକ ବ୍ୟୁରୋ : ଭାରତୀୟ ସେନାର ନିଯୁକ୍ତି ପ୍ରକ୍ରିୟାରେ ବଡ ପରିବର୍ତ୍ତନ ହେବାକୁ ଯାଉଛି । ଏବେ ଅଶାୟୀମାନେ ବର୍ଷକୁ କେବଳ ଗୋଟିଏ ଥର ନିଯୁକ୍ତି ରାଲି ପାଇଁ ଆବେଦନ କରିପାରିବେ । କେବଳ ସେତିକି ନୁହେଁ ଏବେ ଶାରିରୀକ ପରୀକ୍ଷା ପୂର୍ବରୁ କମନ ଏଣ୍ଟ୍ରାନ୍ସ ଟେଷ୍ଟ ହେବ । କମନ୍ ଏଣ୍ଟ୍ରାନ୍ସ ଟେଷ୍ଟରେ ଯୋଗ୍ୟ ବିବେଚିତ ହେଲେ ପ୍ରାର୍ଥୀଙ୍କୁ ଶାରିରୀକ ଓ ମେଡିକାଲ ପରୀକ୍ଷା ପାଇଁ ଚୟନ କରାଯିବ ।
Kanak News is now on WhatsApp
Join and get latest news updates delivered to you via WhatsApp
ଏକ ଜାତୀୟ ଗଣମାଧ୍ୟମର ସୂଚନା ମୁତାବକ ରାଜସ୍ଥାନର ଉପ ମହାନିର୍ଦ୍ଦେଶକ (ସେନା ନିଯୁକ୍ତି) ବ୍ରିଗେଡିୟର ଜଗଦୀପ ଚୌହାନ କହିଛନ୍ତି କି ଆଶାୟୀମାନେ ନିଯୁକ୍ତି ରାଲିରେ ଭାଗ ନେବା ପାଇଁ ବର୍ଷକୁ ମାତ୍ର ଗୋଟିଏଥର ଆବେଦନ କରିପାରିବେ । ଏହାସହ ପୂର୍ବରୁ ପ୍ରଥମେ ଶାରିରୀକ ପରୀକ୍ଷା ଓ ପରେ କମନ ଏଣ୍ଟ୍ରାନ୍ସ ପରୀକ୍ଷା ହେଉଥିବା ବେଳେ ଏବେଠାରୁ ପ୍ରଥମେ କମନ୍ ଏଣ୍ଟ୍ରାନ୍ସ ପରୀକ୍ଷା ଓ ପରେ ଫିଜିକାଲ ଓ ମେଡିକାଲ ପରୀକ୍ଷା କରାଯିବ ।
ସେନା ନିଯୁକ୍ତି ରାଲିରେ ଭାଗନେବା ପାଇଁ ଆଶାୟୀଙ୍କୁ ପ୍ରତିବର୍ଷ ଫେବୃଆରୀ ୧୬ ତାରିଖରୁ ମାର୍ଚ୍ଚ ୧୫ ତାରିଖ ମଧ୍ୟରେ ଆବେଦନ କରିବାକୁ ପଡିବ । ନୂଆ ନିଯୁକ୍ତିି ପ୍ରଣାଳୀର ପ୍ରଥମ ପର୍ଯ୍ୟାୟରେ ଅଧିସୂଚନା, ଅନଲାଇନ୍ ପଞ୍ଜିକରଣ, ଆଡମିଟ କାର୍ଡ, ଅନଲାଇନ ସାଧାରଣ ପ୍ରବେଶ ପରୀକ୍ଷା, ପରୀକ୍ଷା ଫଳ ଓ କଲ୍-ଅପ୍ ସାମିଲ ରହିବ ।
ସେହିଭଳି ଦ୍ୱତୀୟ ପର୍ଯ୍ୟାୟରେ ଆଡମିଟ୍ କାର୍ଡ, ବାୟୋମେଟ୍ରିକ ଭେରିଫିକେଶନ, ଫିଜିକାଲ ଫିଟନେସ୍ ଟେଷ୍ଟ, ଫିଜିକାଲ ମେଜରମେଣ୍ଟ ଟେଷ୍ଟ, ମେଡିକାଲ ପରୀକ୍ଷା ଓ ପରେ ଫାଇନାଲ ମେରିଟ୍ ଲିଷ୍ଟ ଜାରି କରାଯିବ ।
ସମ୍ପୂର୍ଣ୍ଣ ପ୍ରକ୍ରିୟା ଆଧାରରେ ପ୍ରଥମେ ନିଯୁକ୍ତି ପାଇଁ ଅଧିସୂଚନା ଜାରି କରାଯିବ । ଏହାପରେ ଆଶାୟୀମାନଙ୍କୁ ଅନଲାଇନ ପଞ୍ଜିକରଣ କରିବାକୁ ପଡିବ । ଏହାପରେ ବିଭାଗ ତରଫରୁ ଆଡମିଟ୍ କାର୍ଡ ଜାରି କରାଯିବ । ଏହାପରେ ବିଭାଗ ତରଫରୁ ସ୍ଥିର କରାଯାଇଥିବା ସ୍ଥାନରେ ଆଶାୟୀମାନଙ୍କୁ ସାଧାରଣ ପ୍ରବେଶିକା ପରୀକ୍ଷା ଦେବାକୁ ପଡିବ । ଏହି ସାଧାରଣ ପ୍ରବେଶିକା ପରୀକ୍ଷାର ଫଳାଫଳ ପ୍ରକାଶ ପାଇବା ପରେ ପ୍ରାର୍ଥୀମାନଙ୍କ ପାଇଁ ଫିଜିକାଲ ଫିଟନେସ୍ ଟେଷ୍ଟ ଓ ମେଡିକାଲ ଟେଷ୍ଟ ଦେବାକୁ ପଡିବ ।
କେନ୍ଦ୍ର ଶାସନ କ୍ଷମତାରେ ଥିବା ଏନଡିଏ ସରକାର ଗତବର୍ଷ ସେନାର ୩ଟି ବିଭାଗରେ ନିଯୁକ୍ତି ପାଇଁ ଅଗ୍ନିପଥ ଯୋଜନା ଘୋଷଣା କରିଥିଲେ । ଏହାପରେ ଚଳିତ ବର୍ଷ ଅଗ୍ନିପଥ ଯୋଜନାରେ ନିଯୁକ୍ତି ନିୟମର ବଡ ପରିବର୍ତନ କରାଯାଇଛି । ଏହି ପରୀକ୍ଷାରେ ଭାଗନେବା ପାଇଁ ଯୋଗ୍ୟତା ପରୀକ୍ଷାର ନିୟମରେ ବଡ ପରିବର୍ତ୍ତନ କରିଛନ୍ତି । ଏବେ ଅଗ୍ନିପଥ ଯୋଜନାରେ ଆଇଟିଆଇ ଓ ପଲିଟେକନିକ୍ ପାସ କରିଥିବା ପିଲାମାନେ ଆବେଦନ କରିପାରିବେ । କେବଳ ସେତିକି ନୁହେଁ ଏଥିରେ ଏବେ ଟ୍ରେନିଂ ଟାଇମ ବି କମ କରାଯାଇଛି । ଏତେ ସବୁ ପରିବର୍ତ୍ତନ ପରେ ଏବେ ଅଧିକରୁ ଅଧିକ ଆଶାୟୀମାନେ ସେନାରେ ନିଯୁକ୍ତି ପାଇପାରିବେ ବୋଲି ଆଶା କରାଯାଉଛି ।