ଅଙ୍ଗନୱାଡି ଚାକିରି ପାଇଁ ଲାଞ୍ଚ ମାଗି ଅଡ଼ୁଆରେ ଧାମନଗର ସିଡିପିଓ : ଟଙ୍କା ମାଗୁଥିବାର ଅଡିଓ କ୍ଲିପ ଭାଇରାଲ; ଜିଲ୍ଲାପାଳଙ୍କ ଦ୍ୱାରସ୍ଥ ହେଲେ ସୁଷମା ପ୍ରଧାନ
କନକ ବ୍ୟୁରୋ : ଲାଞ୍ଚ ଦିଅ ଚାକିରି ନିଅ । ଅଙ୍ଗନବାଡ଼ି ଚାକିରି ଦେବା ନାଁରେ ଜଣେ ଆବେଦନକାରୀଙ୍କୁ ଧାମନଗର ସିଡିପିଓ ଲାଞ୍ଚ ମାଗିବାର ଅଡ଼ିଓ ଏବେ ଭାଇରାଲ ହେଉଛି । ଅଧିକ ମାର୍କ ରଖି ଅଙ୍ଗନବାଡ଼ି ଚାକିରି ପାଇଁ ଆବେଦନ କରିଥିବା ଯୁବତୀ ଜଣଙ୍କ ଟଙ୍କା ଦେଇନପାରିବାରୁ ନିଯୁକ୍ତିରୁ ବଞ୍ଚିତ ହୋଇଥିବା ଅଭିଯୋଗ କରିଛନ୍ତିି ।
![](https://cdn-icons-png.flaticon.com/512/2504/2504957.png)
Kanak News is now on WhatsApp
Join and get latest news updates delivered to you via WhatsApp
ସୂଚନା ଅନୁସାରେ ଭଦ୍ରକ ଧାମନଗର ବ୍ଲକ ଧୂଷୁରୀ ପଛାଲୋ ପ୍ରଧାନସାହିର ଅଙ୍ଗନବାଡ଼ି କର୍ମୀ ପାଇଁ ଗତ ୨୦୧୯ରେ ବିଜ୍ଞପ୍ତି ପ୍ରକାଶ ପାଇଥିଲା । ଏହି ଗାଁର ସୁଷମା ପ୍ରଧାନଙ୍କ ସହିତ ସୁମନ ପ୍ରିୟଦର୍ଶନୀ ମଳିକ ଓ ଅନ୍ୟ ତିନିଜଣ ଆବେଦନ କରିଥିଲେ । ତେବେ ଚୟନ ପ୍ରକ୍ରିୟାକୁ କେନ୍ଦ୍ରକରି ଆରମ୍ଭ ହୋଇଥିଲା ବିବାଦ । ଏହି ବିବାଦ ପରେ ଆବେଦନକାରୀ ମାନେ ହାଇକୋର୍ଟଙ୍କ ଦ୍ୱାରସ୍ତ ହୋଇଥିଲେ । ହାଇକୋର୍ଟ ଭଦ୍ରକ ଉପଜିଲ୍ଲାପାଳଙ୍କୁ ମାମଲାର ବିଚାର ପାଇଁ ନିର୍ଦ୍ଦେଶ ଦେଇଥିଲେ । ସେତେବେଳେ ଅଙ୍ଗନବାଡ଼ି ଚାକିରି ପାଇଁ ଶିକ୍ଷାଗତ ଯୋଗ୍ୟତା ମାଟ୍ରିକ ଥିବା ବେଳେ ଏବେ +୨ ଯୋଗ୍ୟତା ଥିବା ପ୍ରାର୍ଥୀଙ୍କୁ ନିଯୁକ୍ତି ନେଇ ସରକାର ନିୟମ କରିଛନ୍ତି ।
ତେବେ ଗତ ଦୁଇ ଦିନ ତଳେ ଧାମନଗର ସିଡିପିଓ ନମିତା ଦାସ, ସୁଷମା ପ୍ରଧାନଙ୍କୁ ଫୋନ କରି ତୁମର ଅଧିକ ମାର୍କ ଥିବାରୁ ନିଯୁକ୍ତି ପାଇଁ ଯୋଗ୍ୟ ବୋଲି କହିବା ସହ ନିଯୁକ୍ତି ପୂର୍ବରୁ କିଛି ଟଙ୍କା ମାଗିଥିବା ଅଭିଯୋଗ ହୋଇଛି । ଯାହାର ଅଡ଼ିଓ ଏବେ ଭାଇରାଲ ହେଉଛି । ସୁଷମା ଗରିବ ପରିବାରର ହୋଇଥିବାରୁ ଟଙ୍କା ଦେଇପାରିବେନି ବୋଲି କହିବାରୁ ସେ ଚାକିରି ପାଇପାରିବେନି ବୋଲି ସିଡିପିଓ କହିଥିଲେ । ଏନେଇ ଭଦ୍ରକ ଜିଲ୍ଲାପାଳଙ୍କ ଦ୍ୱାରସ୍ଥ ହୋଇ ନିରପକ୍ଷ ତଦନ୍ତ ପାଇଁ ଲିଖିତ ଅଭିଯୋଗ କରିବା ପରେ ଜିଲ୍ଳାପାଳ ତଦନ୍ତ ନିର୍ଦ୍ଦେଶ ଦେଇଛନ୍ତି ।