ଭାରତରେ ଖେଳାଯିବ ବିଶ୍ୱକପ, ଆସିବ ତ ପାକିସ୍ତାନ? ଜାଣନ୍ତୁ ଆଇସିସିକୁ କଣ କହିଲା ପିସିବି?
କନକ ବ୍ୟୁରୋ : ଅକ୍ଟୋବରରେ ଭାରତରେ ହେବାକୁ ଥିବା ଦିନିକିଆ ବିଶ୍ୱକପରେ ଭାଗ ନେବ ତ ପାକିସ୍ତାନ? କ୍ରିକେଟପ୍ରେମୀଙ୍କ ମନରେ ଏବେ ଏଭଳି ପ୍ରଶ୍ନ ଉଠିବା ଆରମ୍ଭ ହୋଇଛି । କାରଣ ପାକିସ୍ତାନରେ ଏସିଆ କପ୍ ଆୟୋଜନ ହେଲେ ଭାରତ ପାକିସ୍ତାନକୁ ଯିବ ନାହିଁ ବୋଲି ବିସିସିଆଇ ସ୍ପଷ୍ଟ କରିଛି । ସୁରକ୍ଷା ସମ୍ବନ୍ଧୀୟ କାରଣରୁ ବିସିସିଆଇ ଏଭଳି ନିଷ୍ପତ୍ତି ନେଇଛି । ତେବେ ବିସିସିଆଇର ଏଭଳି ନିଷ୍ପତ୍ତି ପରେ ପାକିସ୍ତାନ ବିଶ୍ୱକପ ଖେଳିବାକୁ ଭାରତ ଆସିବ କି ନାହିଁ ତାହା ଏବେ ସବୁଠୁ ବଡ ପ୍ରଶ୍ନ ପାଲଟିଛି । ଏସବୁ ଭିତରେ ଆଇସିସିର ଅଧ୍ୟକ୍ଷ ଓ ସିଇଓ ଏବେ ପାକିସ୍ତାନ ଗସ୍ତରେ ଯାଇ ଭାରତ ହେବାକୁ ଥିବା ଦିନିକିଆ ବିଶ୍ୱକପରେ ପିସିବି ନିଜ ଟିମ୍ ପଠାଇବ କି ନାହିଁ ସେନେଇ ନିର୍ଭରଯୋଗ୍ୟ ପ୍ରତିଶ୍ରୁତି ଚାହୁଁଛନ୍ତି । କେବଳ ଏତିକି ନୁହେଁ ବିଶ୍ୱକପରେ ନିଜ ମ୍ୟାଚ୍ ପାଇଁ ହାଇବ୍ରିଡ ମଡେଲ ଲାଗୁ କରିବା ଉପରେ ପାକିସ୍ତାନ ଯେପରି ଜୋର ନଦେବ ତାହା ନିଶ୍ଚିତ କରୁଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ପାକିସ୍ତାନ ଗଣମାଧ୍ୟମରେ ପ୍ରକାଶିତ ରିପୋର୍ଟ ଅନୁଯାୟୀ, ଆଇସିସିକୁ ପିସିବି ପକ୍ଷରୁ ସ୍ପଷ୍ଟ କରାଯାଇଛି ଯେ, ବିଶ୍ୱକପ ଖେଳିବାକୁ ପାକିସ୍ତାନ ଟିମକୁ ଭାରତ ପଠାଇବାକୁ ପିସିବି ଚାହୁଁଛି । କିନ୍ତୁ ଏ ବାବଦରେ ସରକାରଙ୍କ ନିଷ୍ପତ୍ତି ପାଳନ କରାଯିବ । ଯଦି ପାକିସ୍ତାନ ସରକାର ରାଜି ହୁଅନ୍ତି ତେବେ ବିଶ୍ୱକପ ଖେଳିବାକୁ ପାକ୍ ଦଳ ଭାରତ ଯିବ । କିନ୍ତୁ ଯଦି ସରକାର ରାଜି ନ ହୁଅନ୍ତି ତେବେ ପାକିସ୍ତାନ ଟିମ୍ ହାଇବ୍ରିଡ ମଡେଲରେ ଅନ୍ୟ କୌଣସି ନିରପେକ୍ଷ ସ୍ଥାନରେ ବିଶ୍ୱକପ ଖେଳିପାରେ । କିନ୍ତୁ ଏହି ହାଇବ୍ରିଡ୍ ମଡେଲ କଣ ଯାହାକୁ ନେଇ ଆଇସିସି ଏତେ ଚିନ୍ତିତ ।
ଚଳିତବର୍ଷ ସେପ୍ଟେମ୍ବରରେ ପାକିସ୍ତାନରେ ଏସିଆ କପ୍ ଆୟୋଜନ ହେବାର ଅଛି । କିନ୍ତୁ ଏସିଆ କପ୍ ଖେଳିବାକୁ ପାକିସ୍ତାନକୁ ଟିମ୍ ଇଣ୍ଡିଆ ଯିବ ନାହିଁ ବୋଲି ବିସିସିଆଇ ପକ୍ଷରୁ ସ୍ପଷ୍ଟ କରାଯାଇଛି । ଯେଉଁଥିପାଇଁ ପାକିସ୍ତାନ ଏବେ ହାଇବ୍ରିଡ ମଡେଲ ଉପରେ ଜୋର ଦେବା ଆରମ୍ଭ କରିଛି । ଏହି ହାଇବ୍ରିଡ ମଡେଲ ଅନୁଯାୟୀ ଏସିଆ କପର ଅନ୍ୟ ସବୁ ମ୍ୟାଚ୍ ପାକିସ୍ତାନରେ ଖେଳାଯିବ କିନ୍ତୁ ଭାରତ ନିଜ ମ୍ୟାଚ୍ ଅନ୍ୟ ଦେଶ କିମ୍ବା ନିରପେକ୍ଷ ସ୍ଥାନରେ ଖେଳିବ । ଏହି ମଡେଲକୁ ମଧ୍ୟ ବିସିସିଆଇ ସମେତ ଅନ୍ୟ କ୍ରିକେଟ ବୋର୍ଡ ସମର୍ଥନ କରୁନାହାନ୍ତି । କାରଣ ଏହାଦ୍ୱାରା ଟ୍ରାଭେଲିଂରେ ଖେଳାଳୀଙ୍କର ଅଧିକ ସମୟ ଯିବ । ଯେଉଁଥିପାଇଁ ଅନ୍ୟ ଦେଶ କିମ୍ବା ନିରପେକ୍ଷ ଭେନ୍ୟୁରେ ଏସିଆ କପ ଆୟୋଜନ ହେଉ ବୋଲି ଚାହୁଁଛି ବିସିସିଆଇ । କିନ୍ତୁ ଆୟୋଜକ ଅଧିକାର ହରାଇଲେ ଏସିଆ କପରେ ଭାଗ ନେବନି ବୋଲି ପାକିସ୍ତାନ ଧମକ ଦେଉଛି । ଯେଉଁଥିପାଇଁ ହାଇବ୍ରିଡ ମଡେଲ ଲାଗୁ କରିବାକୁ ପିସିବି ପକ୍ଷରୁ ଜୋର ଦିଆଯାଉଛି ।
ପିସିବିର ଏହି ହାଇବ୍ରିଡ ମଡେଲ ଏବେ ଆଇସିସି ଓ ବିସିସିଆଇକୁ ଚିନ୍ତାରେ ପକାଇଛି । ବିଶ୍ୱକପ୍ ପୂର୍ବରୁ ପିସିବି ଏହି ହାଇବ୍ରିଡ୍ ମଡେଲ ବିକଳ୍ପ ଏସିଆ କପ୍ ପାଇଁ ଦେଇଛି । କିନ୍ତୁ କୌଣସି କ୍ଷେତ୍ରୀୟ ଦେଶ ସମୂହର ଟୁର୍ଣ୍ଣାମେଣ୍ଟ ପାଇଁ ଯଦି ହାଇବ୍ରିଡ ମଡେଲକୁ ଆପଣାଯାଏ ତେବେ ବିଶ୍ୱକପରେ ମଧ୍ୟ ଏହି ମଡେଲ ଲାଗୁ କରିବାକୁ ଆଇସିସି ଉପରେ ଚାପ ପକାଇପାରେ ପିସିବି । ହାଇବ୍ରିଡ ମଡେଲରେ ବିଶ୍ୱକପ ଖେଳାଗଲେ ଏହାର ରୋମାଞ୍ଚ ସେତେଟା ଅଧିକ ରହିବନି । ଆଉ ବିଶ୍ୱକପରେ ଏଭଳି ସ୍ଥିତି ଉପୁଜୁ ତାହା ଚାହୁଁନି ଆଇସିସି ।