ଇ-ଶ୍ରମ ପୋର୍ଟାଲ ପଞ୍ଜିକରଣରୁ ଆସିଲା ସାଂଘାତିକ ତଥ୍ୟ, ଦେଶରେ ୯୪ ପ୍ରତିଶତ ଶ୍ରମିକଙ୍କ ମାସିକ ଆୟ ୧୦ ହଜାର ଟଙ୍କାରୁ କମ
କନକ ବ୍ୟୁରୋ : କେନ୍ଦ୍ର ସରକାର ବିକାଶର ବାହାବା ନେଉଛନ୍ତି ତ କିଛି ଆଞ୍ଚଳିକ ଦଳଙ୍କ ଦ୍ୱାରା ଶାସିତ ରାଜ୍ୟ ସରକାରମାନେ ମାଗଣା ଯୋଜନା ମାଧ୍ୟମରେ ଭୋଟବ୍ୟାଙ୍କ ପ୍ରସ୍ତୁତ କରିବାରେ ବ୍ୟସ୍ତ ଅଛନ୍ତି । ହେଲେ ଦେଶର ବାସ୍ତବ ଚିତ୍ର ଏବେ ପଦାରେ ପଡିଛି । ଦେଶର ୬୦ ପ୍ରତିଶତରୁ ଅଧିକ ଲୋକ ଦୈନିକ ଶ୍ରମ ଉପରେ ସେମାନଙ୍କର ରୋଜଗାରକୁ ନିର୍ଭର କରୁଥିବା ବେଳେ ସେମାନଙ୍କର ମାସିକ ଆୟର ଖୁଲାସା କରିଛି ଇ-ଶ୍ରମ ପୋର୍ଟାଲ । ଇ-ଶ୍ରମ ପୋର୍ଟାଲରେ ପଞ୍ଜିକରଣ କରିଥିବା ଶ୍ରମିକମାନଙ୍କ ମଧ୍ୟରୁ ୯୪ ପ୍ରତିଶତ ଶ୍ରମିକଙ୍କର ମାସିକ ଆୟ ୧୦ ହଜାର ଟଙ୍କା ତଳେ ରହିଛି । ଏହି ପୋର୍ଟାଲରେ ପଞ୍ଜିକରଣ କରିଥିବା ଦେଶର ୨୭.୬୯ କୋଟି ଅସଂଗଠିତ ଶ୍ରମିକଙ୍କ ମଧ୍ୟରୁ ୭୪ ପ୍ରତିଶତ ଶ୍ରମିକ ଏସସି, ଏସଟି ଓ ଓବିସି ବର୍ଗର । ଅର୍ଥାତ ଏବେ ବି ଦେଶରେ ରିଜରର୍ଭେସନର ଆବଶ୍ୟକତା ଥିବା ଏହି ତଥ୍ୟ କହୁଛି ।
Kanak News is now on WhatsApp
Join and get latest news updates delivered to you via WhatsApp
ସୂଚନା ମୁତାବକ ୨୦୨୧ ନଭେମ୍ବର ମାସ ପର୍ଯ୍ୟନ୍ତ ମାସିକ ୧୦ ହଜାରରୁ କମ ରୋଜଗାର କରୁଥିବା ଶ୍ରମିକଙ୍କ ହାର ଥିଲା ୯୨.୩୭ ପ୍ରତିଶତ । ଏହି ସମୟରେ ମାତ୍ର ୮ କୋଟି ଶ୍ରମିକ ଇ-ଶ୍ରମ ପୋର୍ଟାଲରେ ସେମାନଙ୍କ ନାମ ପଞ୍ଜିକରଣ କରିଥିଲେ । ହେଲେ ଏପ୍ରିଲ ୨୦୨୨ ଅର୍ଥାତ ୫ ମାସ ମଧ୍ୟରେ ଏହି ଶ୍ରମ ପୋର୍ଟାଲରେ ୨୭.୬୯ କୋଟି ଶ୍ରମିକ ପଞ୍ଜିକରଣ କରିଥିବା ବେଳେ ୧୦ ହଜାରରୁ ମାସିକ କମ୍ ରୋଜଗାର କରୁଥିବା ଶ୍ରମିକଙ୍କ ହାର ୯୨.୩୭ ପ୍ରତିଶତରୁ ବୃଦ୍ଧି ପାଇ ୯୪ ପ୍ରତିଶତରେ ପହଂଚିଛି ।
ଏଭଳି ଖୁଲାସା ପରେ ଏବେ ବିଶେଷଜ୍ଞମାନେ ଗ୍ରହଣ କରିଛନ୍ତି କି ଦେଶରେ ଅସମାନତା ହାର କମିବା ପରିବର୍ତ୍ତେ ଦିନକୁ ଦିନ ବୃଦ୍ଧି ପାଇବାରେ ଲାଗିଛି । ସରକାରୀ ସୂଚନା ମୁତାବକ ଏବେ ଅସଂଗଠିତ କ୍ଷେତ୍ରରେ କାମ କରୁଥିବା ମୋଟ ଶ୍ରମିକଙ୍କ ସଂଖ୍ୟା ୩୮ କୋଟିରୁ ଅଧିକ । ହେଲେ ଏପର୍ଯ୍ୟନ୍ତ ୨୭.୬୯ ପ୍ରତିଶତ ଶ୍ରମିକ ସେମାନଙ୍କ ନାମ ପଞ୍ଜିକରଣ କରିଛନ୍ତି । ଏନେଇ କେନ୍ଦ୍ର ସରକାର ତୁରନ୍ତ ପଞ୍ଜିକରଣ ସାରିବାକୁ ବିଭାଗକୁ ନିର୍ଦ୍ଦେଶ ଦେବା ସହ ଏନେଇ ଏକ ବ୍ୟାପକ ଡାଟାବେସ୍ ପ୍ରସ୍ତୁତ କରିବା ଲକ୍ଷ୍ୟରେ ଅଛନ୍ତି କେନ୍ଦ୍ର ସରକାର ।