ଲମ୍ପଟ ଶିକ୍ଷକଙ୍କୁ ୯୦ବର୍ଷ ସଜା। ଜେଲ୍ ଦଣ୍ଡ ଶୁଣାଇଲେ ପୋକ୍ସୋ କୋର୍ଟ।
କନକ ବ୍ୟୁରୋ: ଜଣେ ଅଭିଯୁକ୍ତକୁ ୯୦ବର୍ଷ ଜେଲଦଣ୍ଡ, ଏକଥା ଶୁଣିଲା ବେଳକୁ ଆଶ୍ଚର୍ଯ୍ୟ ଲାଗୁଛି । ଭାବୁଥିବେ ଜଣେ ଲୋକ ଏତେ ବର୍ଷ ଜେଲ ଦଣ୍ଡ ଭୋଗିବେ କେମିତି । କିନ୍ତୁ ୬୨ବର୍ଷୀୟ ଲମ୍ପଟ ଶିକ୍ଷକ ଦେବାନନ୍ଦ ପଟେଲଙ୍କୁ ଏହି ଦଣ୍ଡାଦେଶ ଦେଇଛନ୍ତି, ସୁନ୍ଦରଗଡ ଅତିରିକ୍ତ ଜିଲ୍ଲା ଦୌରାଜଜ୍ ତଥା ସ୍ୱତନ୍ତ୍ର ପୋକ୍ସୋ କୋର୍ଟ । କୋର୍ଟ ଅଭିଯୁକ୍ତ ବିରୋଧରେ ଲାଗିଥିବା ବିଭିନ୍ନ ଦଫାକୁ ବିଚାର କରି ପ୍ରାୟ ନବେ ବର୍ଷ ଦଣ୍ଡାଦେଶ ଦେଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଅଭିଯୁକ୍ତ ଦେବାନନ୍ଦ ପଟେଲଙ୍କ ବିରୋଧରେ ସେ ଶିକ୍ଷକ ଥିବା ସ୍କୁଲର ଏକାଧିକ ଛାତ୍ରୀଙ୍କୁ ଯୌନ ନିର୍ଯାତନା ଦେଇଥିବା ଅଭିଯୋଗ ହୋଇଥିଲା । ତାଙ୍କ ବିରୋଧରେ ଲିଖିତ ଭାବେ ପ୍ରାୟ ୧୧ଜଣ ଛାତ୍ରୀ ଅଭିଯୋଗ କରିଥିଲେ । ୨୦୧୫ ନଭେମ୍ବର ମାସରେ ଏନେଇ ଜଣେ ଛାତ୍ରୀଙ୍କ ଅଭିଭାବକ ଥାନାର ଦ୍ୱାରସ୍ଥ ହୋଇଥିଲେ । ତାପରେ ଦେବାନନ୍ଦଙ୍କୁ ଗିରଫ କରିଥିଲା ପୋଲିସ । କିନ୍ତୁ ମାମଲା ବିଚାରାଧିନ ରହିଥିଲା । ଆଉ ଏବେ ମାମଲାର ବିଚାର କରି କୋର୍ଟ ଦଣ୍ଡାଦେଶ ଶୁଣାଇଛନ୍ତି । କୋର୍ଟ ଦେଇଥିବା ଦଣ୍ଡାଦେଶ ଅନୁସାରେ,
ପୋକ୍ସୋ ଆକ୍ଟର ସେକ୍ସନ ୬ରେ ୧୦ ବର୍ଷ
ଆଇପିସି ସେକ୍ସନ ୩୭୬(୨)(ବି) ରେ ୧୦ବର୍ଷ
ଆଇପିସି ସେକ୍ସନ ୩୭୬(୨)(ଏଫ)ରେ ୧୦ବର୍ଷ
ଆଇପିସି ସେକ୍ସନ ୩୭୬(୨)(ଆଇ)ରେ ୧୦ବର୍ଷ
ଆଇପିସି ସେକ୍ସନ ୩୭୬(୨)(ଏନ)ରେ ୧୦ବର୍ଷ
ଏସସି-ଏସଟି ଆକ୍ଟର ସେକ୍ସନ ୩(୨)(ଭି)ରେ ୭ବର୍ଷ
ଏସସି-ଏସଟି ଆକ୍ଟର ସେକ୍ସନ ୩(୨)(ଭିଆଇଆଇ)ରେ ୭ବର୍ଷ
ପୋକ୍ସୋ ଆକ୍ଟର ଅଣ୍ଡର ସେକ୍ସନ ୧୦ରେ ୧୦ବର୍ଷ
ଏମିତି ଆଉ କେତେକ ଦଫାର ଦଣ୍ଡକୁ ମିଶାଇ ଅଭିଯୁକ୍ତ ଦେବାନନ୍ଦଙ୍କୁ ମୋଟ ୯୦ବର୍ଷ ଦଣ୍ଡାଦେଶ ଦେଇଛନ୍ତି ବିଚାରପତି । ତେବେ ଆମ ଦେଶର ଆଇନ ବ୍ୟବସ୍ଥା ଅନୁସାରେ ଅଭିଯୁକ୍ତ ସର୍ବାଧିକ ୧୦ବର୍ଷ ସଜା କାଟିବେ ।
ଅଭିଯୁକ୍ତ ଦେବାନନ୍ଦ ୨୦୧୫ ଡିସେମ୍ବର ମାସରୁ ଏପର୍ଯ୍ୟନ୍ତ ଜେଲରେ ଅଛନ୍ତି । ଅର୍ଥାତ ଆଉ ତିନି ବର୍ଷ କିଛି ମାସ ଜେଲରେ ରହିବେ । ଏଥିସହ ୪୭ହଜାର ଟଙ୍କା ଜରିମାନା ଦେବେ । ଅନ୍ୟପଟେ ପୀଡିତା ଛାତ୍ରୀଙ୍କୁ ୨୮ଲକ୍ଷ ଟଙ୍କା ଅନୁକମ୍ପା ମୂଳକ ସହାୟତା ରାଶି ପ୍ରଦାନ ପାଇଁ ଜିଲ୍ଲା ଆଇନ ସେବା ପ୍ରାଧିକକରଣକୁ କୋର୍ଟ ନିର୍ଦ୍ଦେଶ ଦେଇଛନ୍ତି ।