ମୁମ୍ବାଇକୁ ଡରାଇଲା ଜୀକା ଭାଇରସ୍ । ଚିହ୍ନଟ ହେଲେ ସଂକ୍ରମିତ ହେଇଥିବା ବ୍ୟକ୍ତି । ଆଲର୍ଟରେ ଅନ୍ୟ ସବୁ ରାଜ୍ୟ ।
କନକ ବ୍ୟୁରୋ: ମୁମ୍ବାଇକୁ ଡରାଇଲେ ଜୀକା ଭାଇରସ୍ । ଦେଶରେ କରୋନା ଭାଇରସ୍ ପ୍ରଭାବ ସାମାନ୍ୟ କମିଥିବାବେଳେ, ଏବେ ମୁମ୍ବାଇରେ ଜୀକା ଭାଇରସର ଭୟ ଦେଖିବାକୁ ମିଳିଛି । କାହିଁକି ନା, ମୁମ୍ବାଇର ଜଣେ ବ୍ୟକ୍ତି ଜୀକା ଭାଇରସ୍ ପଜିଟିଭ୍ ଥିବା ଚିହ୍ନଟ ହେଇଛନ୍ତି । ଖାଲି ସେତିକି ନୁହେଁ, ମୁମ୍ବାଇରେ ଏହି ଭାଇରସ ଚିହ୍ନଟ ହେବା ପରେ ଅନ୍ୟ ରାଜ୍ୟର ମଧ୍ୟ ଚିନ୍ତା ବଢିଯାଇଛି ।
Kanak News is now on WhatsApp
Join and get latest news updates delivered to you via WhatsApp
ଜୀକା ଭାଇରସ୍ ହେଉଛି ଏମିତି ଏକ ଭାଇରସ, ଯାହାଦ୍ୱାରା କି ଜ୍ୱର ଆସିବା ସହିତ ତ୍ୱଚା ଲାଲ ହେଇଯାଏ । ଏହାସହିତ ମୁଣ୍ଡ ମଧ୍ୟ ପ୍ରବଳ ଜୋରରେ ବିନ୍ଧିଥାଏ । ଜୀକା ଭାଇରସରେ ସଂକ୍ରମିତ ହେଲେ ଜଣେ ଗର୍ଭବତୀ ଲୋକଠୁ ଏହା ଶିଶୁକୁ ମଧ୍ୟ ବ୍ୟାପିଥାଏ ।
ମିଳିଥିବା ସୂଚନା ମୁତାବକ, ମୁମ୍ବାଇର ଚମ୍ବୁର ଅଞ୍ଚଳରେ ରହୁଥିବା ଜଣେ ବ୍ୟକ୍ତି ଏହି ଭାଇରସରେ ପଜିଟିଭ୍ ଥିବା ଜଣାପଡିଛି । ବର୍ତ୍ତମାନ ତାଙ୍କ ସ୍ୱାସ୍ଥ୍ୟାବସ୍ଥା ଭଲ ଥିବାବେଳେ, ଡାକ୍ତରମାନେ ତାଙ୍କ ଉପରେ ନଜର ରଖିଛନ୍ତି । ତେବେ ମଶା ଦ୍ୱାରା ଅନ୍ୟକୁ ବ୍ୟାପୁଥିବା ଏହି ଭାଇରସ୍ ଡେଙ୍ଗୁ ଭଳି ଅଟେ ।
ମଶାଦ୍ୱାରା ବ୍ୟାପୁଥିବା ଏହି ଜୀକା ଭାଇରସ୍ ୧୯୪୭ ମସିହାରେ ପ୍ରଥମେ ୟୁଗାଣ୍ଡାରେ ଦେଖିବାକୁ ମିଳିଥିଲା । ସେତେବେଳେ ଏହା ଅନେକଙ୍କ ଜୀବନ ନେଇଥିଲା । ବିଶେଷକରି ଗର୍ଭବତୀ ସ୍ତ୍ରୀ ଲୋକମାନେ ଏହି ଭାଇରସର ଶିକାର ହେଇଥାନ୍ତି । ଗର୍ଭବତୀ ସ୍ତ୍ରୀ ଲୋକଙ୍କଠୁ ଏହା ଗର୍ଭସ୍ଥ ଶିଶୁକୁ ମଧ୍ୟ ବ୍ୟାପିଥାଏ ।