ପ୍ରତିଷ୍ଠା ଦିବସରେ ବିଜେଡିର ଭବିଷ୍ୟତ ନେଇ ନବୀନଙ୍କ ଇସାରା ପରେ ବଢିଲା ଚର୍ଚ୍ଚା । ଦଳୀୟ ନେତା କହିଲେ, ଓଡିଶାବାସୀ ବାଛିବେ ବିଜେଡିର ଉତ୍ତରାଧିକାରୀ
ବିରୋଧୀ କହିଲେ ନବୀନଙ୍କ ପରେ ବୁଡିଯିବ ଦଳ
କନକ ବ୍ୟୁରୋ: ବିଜେଡି ପ୍ରତିଷ୍ଠା ଦିବସରେ ବିଜେଡି ସୁପ୍ରିମୋ ନବୀନ ପଟ୍ଟନାୟକଙ୍କ ବୟାନ ରାଜନୀତି ମହଲରେ ଚର୍ଚ୍ଚା ସୃଷ୍ଟି କରିଛି । ଦଳ ତାଙ୍କ ଉପରେ ଆଉ ନିର୍ଭରଶୀଳ ନୁହେଁ ବୋଲି କହିବା ପରେ ବିଜେଡିର ପରବର୍ତ୍ତୀ ପୀଢିକୁ ନେଇ କିଛି ନୂଆ ଇସାରା ମିଳିଛି । ପ୍ରକୃତରେ ଏହି ବୟାନ ପଛରେ କିଛି ରାଜନୈତିକ ଉଦ୍ଦେଶ୍ୟ ରହିଛି କି । ଆଉ ବିଜେଡିର ପରବର୍ତ୍ତୀ ଉତ୍ତରାଧିକାରୀ କିଏ ହେବ ସେ ପ୍ରସଙ୍ଗକୁ ଏବେ ଅଧିକ ଖୋରାକ ଯୋଗାଇଛି । ନବୀନଙ୍କ ବୟାନ ପରେ ଦଳର ହେବିୱେଟ୍ ନେତା ଏହି ପ୍ରସଙ୍ଗରେ ମାପିଚୁପି ବୟାନ ରଖିଛନ୍ତି । କହିଛନ୍ତି ଚୂଡାନ୍ତ ନିଷ୍ପତି ନେବେ ନବୀନ ।
Kanak News is now on WhatsApp
Join and get latest news updates delivered to you via WhatsApp
ଦଳ ତାଙ୍କ ଉପରେ ନିର୍ଭରଶୀଳ ନୁହେଁ, ବିଜେଡି ସୁ୍ପ୍ରିମୋ ନବୀନ ପଟ୍ଟନାୟକଙ୍କ ଏହି ମନ୍ତବ୍ୟ ରାଜନୈତିକ ମହଲରେ ହଟଚମଟ ସୃଷ୍ଟି କରିଛି । ନବୀନଙ୍କ ଉତ୍ତରାଧିକାରୀ କିଏ ହେବ ଏହାକୁ ନେଇ ଦୀର୍ଘ ଦିନ ଧରି ଆଲୋଚନା ଚାଲିଥିବା ବେଳେ ଦଳର ପ୍ରତିଷ୍ଠା ଦିବସରେ ସୁପ୍ରିମୋଙ୍କ ଏହି ଇସାରା, ବେଶ ଗୁରୁତ୍ୱ ରଖୁଛି । ତେବେ ନବୀନ କେଉଁ ଆଡକୁ ଇସାରା ଦେଇଛନ୍ତି, ପ୍ରକୃତରେ ଏହା କି ସନ୍ଦେଶ ଦେଉଛି, ତାକୁ ନେଇ ଉଭୟ ଶାସକ ଓ ବିରୋଧୀ ଦଳ ମଧ୍ୟରେ ଅଙ୍କକଷା ଆରମ୍ଭ ହୋଇଛି ।
ତେବେ ବିଜୁ ଜନତା ଦଳର ଭବିଷ୍ୟତକୁ ନେଇ ଯେତେବେଳେ ଚର୍ଚ୍ଚା ବଢ଼ୁଛି, ସେତେବେଳେ ନବୀନଙ୍କ ବୟାନ ଖୁବ୍ ପ୍ରାସଙ୍ଗିକ ହୋଇପଡିଛି । ପ୍ରତିଷ୍ଠା ଦିବସରେ ନବୀନଙ୍କ ଇସାରା, ରାଜ୍ୟ ରାଜନୀତିର ବାତାବରଣକୁ ସରଗରମ କରିଦେଇଛି । ୨୨ବର୍ଷ ଧରି ଦଳର ଅପ୍ରତିଦ୍ୱନ୍ଦୀ ନେତା ରହି ଆସିଛନ୍ତି ନବୀନ । ୨୦ ବର୍ଷ କାଳ ତାଙ୍କରି ନେତୃତ୍ୱରେ ଓଡିଶାର ଶାସନ ଭାର ରହିଛି ବିଜେଡି ହାତରେ । ତେଣୁ ଦଳର ଭବିଷ୍ୟତକୁ ନେଇ ଉକ୍ରଣ୍ଠା ବଢିବାରେ ଲାଗିଛି ।