ଶୀତ ଦିନରେ ଅନ୍ନଦାତାଙ୍କ ସଂକଟ ବଢାଇଲା ବର୍ଷା । ମଣ୍ଡିରେ ଧାନ ଭିଜାଇଲା ଅଦିନିଆ ମେଘ । ସମ୍ବଲପୁର, ବରଗଡ, କଳାହାଣ୍ଡିରୁ ଆସିଲା ବିକଳ ଚିତ୍ର
ଜଗତସିଂହପୁରରେ କ୍ଷେତ ଭିତରେ ଆଣ୍ଠୁଏ ଉଚ୍ଚର ପାଣି
କନକ ବ୍ୟୁରୋ: କିଏ କହୁଛି ଚାଷୀଙ୍କ ଆୟ ଦୁଇଗଣ ହେବ, ତ ଆଉ କିଏ କହୁଛି ଚାଷୀଙ୍କୁ ବୀମା ଟଙ୍କା ମିଳିବ । ହେଲେ ପ୍ରକୃତରେ ଚାଷୀ ପାଉଛନ୍ତି କ’ଣ ତାହା କାହାରିକୁ ଅଛପା ନାହିଁ । ଗୋଟିଏ ମାସ ପୂର୍ବରୁ ଯେଉଁ ଚାଷୀ, ଧାନ ବିକ୍ରି କରିବା ପାଇଁ ଆନ୍ଦୋଳନ କରୁଥିଲା, ସେହି ଚାଷୀ ଆଜି ଧାନକୁ କେମିତି ସାଇତି ରଖିବ ସେ ଚିନ୍ତାରେ ସନ୍ତୁଳି ହେଉଛି । କୋହଳ ପାଗକୁ ଝିପି ଝିପି ବର୍ଷରେ ଆଖି ଆଗରେ ନଷ୍ଟ ହେବାକୁ ବସିଛି ଗୋଟିଏ ବର୍ଷର ପରିଶ୍ରମ ।
Kanak News is now on WhatsApp
Join and get latest news updates delivered to you via WhatsApp
ବିକ୍ରି ଅପେକ୍ଷାରେ ପଡ଼ି ରହିଥିବା ଏହି ଧାନକୁ ଦେଖିଲେ ଯେ କେହି ବି ଅନୁମାନ କରିପାରିବ ଏହି ସବୁ ଧାନର ମୂଲ୍ୟ କ’ଣ ହେବାକୁ ଯାଉଛି ଏବଂ ଏଥିରୁ ଚାଷୀ କେଉଁ ଲାଭ ପାଇବ । ମଣ୍ଡିରେ ହିଁ ଭିଜି ଯାଇଛି କ୍ୱିଂଟାଲ କ୍ୱିଂଟାଲ ଧାନ । ଗୋଟିଏ କିମ୍ବା ଦୁଇଟି ମଣ୍ଡି ନୁହେଁ ବରଗଡ଼ ଜିଲ୍ଲାର ଏକାଧିକ ମଣ୍ଡିରେ ସମାନସ୍ଥିତି । ବରଗଡ଼ ଜିଲ୍ଲାରେ ଏବେ ପ୍ରାୟ ୯ଲକ୍ଷରୁ କ୍ୱିଂଟାଲ ଧାନ ମଣ୍ଡିଗୁଡ଼ିକରେ ବିକ୍ରି ଅପେକ୍ଷାରେ ରହିଛି, ଏବଂ ବର୍ଷା ଯୋଗୁଁ ଅନେକ ସ୍ଥାନରେ ଧାନ ନଷ୍ଟ ହେବାକୁ ବସିଲାଣୀ ।
ଆଉ ଇଏ ହେଉଛି ସମ୍ବଲପୁର ଜିଲ୍ଲାର ଚିତ୍ର । ବର୍ଷାରେ ଭିଜି ଯାଇଛି ଅମଳ ହୋଇଥିବା ଧାନ । ଦରଭିଜା ଧାନକୁ କେମିତି ବିକ୍ରି କରିବ ସେ କଥା ଭାବିଲା ବେଳକୁ ଚାଷୀର ଅକଲଗୁଡୁମ୍ । ଆଉ କୌଣସି ଉପାୟ ନପାଇ ଶେଷରେ ଅମଳ ହୋଇ ସାରିଥିବା ଧାନକୁ ଶୁଖାଇ, ଅନ୍ତତଃ ଖର୍ଚ୍ଚ ବାହାର କରିବାକୁ ଚେଷ୍ଟା କରୁଛି ସମ୍ବଲପୁର ଜିଲ୍ଲାର ଚାଷୀ ।
ଖୋଲା ଆକାଶ ତଳେ, ଜରିପାଲ ଭରସାରେ ପଡ଼ି ରହିଥିବା ଚାଷୀର ଏହି ପରିଶ୍ରମର ଫଳକୁ ଦେଖିଲେ ହୁଏତ କେହି ବି କହିବେନି ଯେ- ଚାଷ କାମ ଯାହାର କେଡେ ସୁଖ ତାହାର । ମିଲର୍ ଓ ଯୋଗାଣ ବିଭାଗର ଟାଳଟୁଳ ନୀତି ଆଗରେ ଛନ୍ଦି ହୋଇ ରହିଛନ୍ତି କଳାହାଣ୍ଡି ଜିଲ୍ଲା ଜୟପାଟଣା ଅଂଚଳର ଚାଷୀ । ବିମଳା ମଣ୍ଡିରେ ବର୍ତମାନ ୩ହଜାର ୫ଶହ କ୍ୱିଂଟାଲ ଧାନ ପଡ଼ି ରହିଛି । ଆଉ ଧାନକୁ ଜଗି ରହି ମଣ୍ଡି ଆଗରେ ପଡ଼ି ରହିଛନ୍ତି ଚାଷୀ । ଏପଟେ ଅଦିନିଆ ବର୍ଷା ବଢ଼ାଇ ଦେଇଛି ଚାଷୀର ଚିନ୍ତା ।
ଏପଟେ ଜଗତସିଂହପୁର ଜିଲ୍ଲାରେ ମେଘୁଆ ପାଗ ସହ ଝିପିଝିପି ବର୍ଷା ଯୋଗୁଁ ଚିନ୍ତାରେ ଚାଷୀ । ଅଦିନିଆ ବର୍ଷା ଯୋଗୁଁ ବିଲରେ ହିଁ ଫସଲ ନଷ୍ଟ ହେବାର ଆଶଂକା ଦେଖାଦେଇଛି । କିଛି ଚାଷୀ ଧାନ ଆଣି ଖଳାରେ ରଖିଥିବା ବେଳେ ଆଉ କିଛି ଚାଷୀଙ୍କ ଧାନ ବିଲରେ ପଡି ରହିଛି । ଏଭିଳି ସ୍ଥିତରେ ଧାରକରଜ କରି ଚାଷ କରିଥିବା ଜଗତସିଂହପୁର ଚାଷୀ ମୁଳ ଫେରି ପାଇବ ନାହିଁ ତାକୁ ନେଇ ସନ୍ଦେହ ସୃଷ୍ଟି ହୋଇଛି । ଆଉ ଏସବୁ ଭିତରେ ପାଣିପାଗ ବିଭାଗର ଆକଳନ ଚାଷୀର ଚିନ୍ତା ଦୁଇଗୁଣିତ କରିଦେଇଛି ।