କନକ ବ୍ୟୁରୋ : ୟୁକ୍ରେନ- ରୁଷ ଯୁଦ୍ଧ ଧୀରେ ଧୀରେ ଆଣବିକ ଯୁଦ୍ଧ ଆଡକୁ ଗତି କରୁଥିବା ଆଶଙ୍କା ବଢ଼ୁଛି । ଯୁଦ୍ଧରେ ଆଶାନୁରୂପ ସଫଳତା ମିଳୁନଥିବାରୁ ପୁଟିନ ସେନା ହତାଶ ହୋଇ ୟୁକ୍ରେନ ଉପରେ ଆଣବିକ ବୋମା ପକାଇପାରେ ବୋଲି ଆଶଙ୍କା କରିଛି ଆମେରିକା । ଆଉ ଏହାର ମୁକାବିଲ ପାଇଁ ରଣନୀତି ପ୍ରସ୍ତୁତ କରିଛି ହ୍ୱାଇଟହାଉସ । ଅନ୍ୟପଟେ ଯୁଦ୍ଧ ସଂକଟ ଭିତରେ ଆଜି ପୋଲାଣ୍ଡ ଗସ୍ତରେ ଆସିଛନ୍ତି ଆମେରିକା ରାଷ୍ଟ୍ରପତି ଜୋ ବାଇଡେନ୍ ।
Kanak News is now on WhatsApp
Join and get latest news updates delivered to you via WhatsApp
ୟୁକ୍ରେନ ଉପରେ ରୁଷ୍ ଆକ୍ରମଣ ଲମ୍ବି ଚାଲିଥିବା ବେଳେ ଯେଉଁ ସଫଳତା ପାଇଁ ରୁଷ୍ ସେନା ଆଶା ରଖିଥିଲା, ୟୁକ୍ରେନର କଡ଼ା ମୁକାବିଲା ଯୋଗୁଁ ତାହା ସମ୍ଭବ ହୋଇପାରି ନାହିଁ । ଫଳରେ ରୁଷ୍ ରାଷ୍ଟ୍ରପତି ପୁଟିନଙ୍କ ହତାଶା ବଢ଼ୁଛି । ତେଣୁ ଯୁଦ୍ଧରେ ନିଜର ଦବଦବା ବଢ଼ାଇବାକୁ ରୁଷ୍ ଛୋଟ ଧରଣର ଆଣବିକ ଅସ୍ତ୍ର ବ୍ୟବହାର କରିପାରେ ବୋଲି ଆଶଙ୍କା କରିଛି ଆମେରିକାର ଗୁଇନ୍ଦା ବିଭାଗ । ଏପରି ସ୍ଥିତିରେ କ’ଣ କରାଯିବ, ସେନେଇ ଆମେରିକା ପକ୍ଷରୁ ପ୍ରସ୍ତୁତି କରାଯାଇଛି । ୟୁକ୍ରେନ ଉପରେ ଯଦି ରୁଷ୍ ପକ୍ଷରୁ ଛୋଟ ଧରଣର ଆଣବିକ ବୋମା ବ୍ୟବହାର ହୁଏ, ଏହାର ମୁକାବିଲା ପାଇଁ ଏକ ଟାଇଗର ଟିମ ଗଠନ କରିଛନ୍ତି ଆମେରିକା ରାଷ୍ଟ୍ରପତି । ସପ୍ତାହକୁ ତିନିଥର ଏହି ଟିମ ରାଷ୍ଟ୍ରପତି ଜୋ ବାଇଡେନଙ୍କ ସହ ଆଲୋଚନା କରୁଛନ୍ତି ।
ୟୁକ୍ରେନ ଅଧିକାରୀଙ୍କ କହିବା ଅନୁସାରେ ଗତ ସପ୍ତାହରେ ମାରିଓପୋଲ ସହରରେ ଥିଏଟର ହଲ ଉପରେ ରୁଷ୍ ଯେଉଁ ଆକ୍ରମଣ କରିଥିଲା, ଏଥିରେ ୩ ଶହ ଜଣଙ୍କ ମୃତ୍ୟୁ ଘଟିଛି । ଅନ୍ୟପଟେ ମାରିଓପୋଲ ସହ କିଭ୍ ସହରରେ ରୁଷ୍ ଓ ୟୁକ୍ରେନ ସେନା ମଧ୍ୟରେ ଜୋରଦାର ଲଢ଼େଇ ଚାଲିଛି । କିଭ୍ ସହର ବାହାରେ ଥିବା ଏକ ତେଲ ଡିପୋକୁ ନଷ୍ଟ କରିଦେଇଥିବା ରୁଷ୍ ଦାବି କରିଛି । ଅନ୍ୟପଟେ ବ୍ରିଟେନ କହିଛି ଯେ, କିଭ୍ ଠାରୁ ୩୫ କିଲୋମିଟର ଦୂରରେ ଥିବା ସହରକୁ ପୁଣି ନିଜ କବଜାକୁ ନେଇଛି ୟୁକ୍ରେନ ସେନା ।
ଚଳିତ ଯୁଦ୍ଧକୁ ଏକ ନୂଆପ୍ରକାର ଯୁଦ୍ଧ ବୋଲି ବିଶେଷଜ୍ଞ କହୁଥିବା ବେଳେ ଏହାର ଆଉ ଏକ ପ୍ରମାଣ ମିଳିଛି । ଉଭୟ ଦେଶ ମଧ୍ୟରେ ଲଢ଼େଇ ଚାଲିଥିବା ବେଳେ ଯୁଦ୍ଧ ବନ୍ଦୀ ଅଦଳବଦଳ ହୋଇଛି । ୧୦ ୟୁକ୍ରେନ ସୈନିକଙ୍କ ବଦଳରେ ମୁକ୍ତି ପାଇଛନ୍ତି ୧୦ ରୁଷ୍ ସୈନିକ । ଏନେଇ ୟୁକ୍ରେନ ଉପ-ପ୍ରଧାନମନ୍ତ୍ରୀ ସୂଚନା ଦେଇଛନ୍ତି । ତେବେ ଯୁଦ୍ଧ ଯୋଗୁଁ ବିଭିନ୍ନ ସହରରେ ହଜାର ହଜାର ଲୋକ ଫସିଛନ୍ତି । ସେହିପରି ଯୁଦ୍ଧ ଯୋଗୁଁ ପ୍ରାୟ ୩୦ ଲକ୍ଷ ଲୋକ ୟୁକ୍ରେନ ଛାଡ଼ିସାରିଲେଣି । ଅନ୍ୟପଟେ ରୁଷ୍ ବିରୋଧରେ ରଣନୀତିକୁ ଜୋର କରିଛି ଆମେରିକା । ବେଲଜିୟମରେ ନାଟୋ ସଦସ୍ୟଙ୍କ ସହ ବୈଠକ କରିସାରିଛନ୍ତି ବାଇଡେନ । ଏହାପରେ ପୋଲଣ୍ଡରେ ଆଗାମୀ ରଣନୀତି ସ୍ଥିର କରିବେ ଆମେରିକା ଓ ୟୁରୋପୀୟ ରାଷ୍ଟ୍ର ।