ଓଡ଼ିଶା ପରିବା ବଜାରରେ କାହାର କବଜା? ବିଧାନସଭାରେ ଉତ୍ତର ଓ ବାସ୍ତବ ସ୍ଥିତି ଭିନ୍ନ
କନକ ବ୍ୟୁରୋ: ଓଡିଶା ବିଭିନ୍ନ ପରିବା ଉତ୍ପାଦନରେ ଅଗ୍ରଣୀ ଥିବା ନେଇ ବିଧାନସଭାରେ ରାଜ୍ୟ କୃଷି ମନ୍ତ୍ରୀ ସୂଚନା ଦେଉଥିବାବେଳେ ବାସ୍ତବ ତଥ୍ୟ କିଛି ଭିନ୍ନ କଥା କହୁଛି । କନ୍ଦମୂଳ, ବାଇଗଣ, କୋବି ଭଳି ପରିବା ଉତ୍ପାଦନରେ ଓଡିଶା ଦେଶରେ ଆଗୁଆ କୁହାଯାଉଥିବାବେଳେ, ଏବେ ବି ବିଭିନ୍ନ ପରିବା ପାଇଁ କେମିତି ବାହାର ରାଜ୍ୟ ଉପରେ ନିର୍ଭର କରିବାକୁ ପଡୁଛି ତାହା ସାମନାକୁ ଆସିଛି ।
Kanak News is now on WhatsApp
Join and get latest news updates delivered to you via WhatsApp
ଏଥର ଶୀତ ଅଧିବେଶନରେ କୃଷିମନ୍ତ୍ରୀ ରଣେନ୍ଦ୍ର ପ୍ରତାପ ସ୍ୱାଇଁ ଏକ ଅଣତାରକା ପ୍ରଶ୍ନର ଉତ୍ତରରେ ଦେଇଥିବା କିଛି ତଥ୍ୟ ଉପରେ ପ୍ରଥମେ ନଜର ପକାନ୍ତୁ…
ପରିବା ଉତ୍ପାଦନରେ ଓଡ଼ିଶା
- କନ୍ଦମୂଳ ଉତ୍ପାଦନରେ- ନମ୍ବର ୧
- ବାଇଗଣ ଓ ବନ୍ଧାକୋବିରେ- ନମ୍ବର ୨
- ଭେଣ୍ଡି ଓ ଟମାଟୋରେ- ନମ୍ବର ୫
- ଫୁଲକୋବି ଉତ୍ପାଦନରେ- ନମ୍ବର ୬
- ଲାଉ ଉତ୍ପାଦନରେ ଓଡି଼ଶା- ନମ୍ବର ୮
ହେଲେ ରାଜଧାନୀ ଭୁବନେଶ୍ୱରର ୧ ନମ୍ବର ପରିବା ହାଟରେ ଦାମ ପଚାରିବାରୁ ଜଣାପଡିଛି ଯେ, ଦେଶୀ ଟମାଟୋ ସ୍ଥାନୀୟ ବଜାରରେ ଉପଲବ୍ଧ ନାହିଁ । ରାଜଧାନୀବାସୀଙ୍କ ଚାହିଦା ମେଣ୍ଟାଇବାକୁ ରାୟପୁର ଓ ନାସିକରୁ ଆସୁଛି ଟମାଟୋ । କୋଲକାତା ଓ ରାୟପୁରରୁ ଆସୁଛି ବାଇଗଣ, ମଧ୍ୟପ୍ରଦେଶରୁ ବନ୍ଧାକୋବି, ପଶ୍ଚିମବଙ୍ଗ ଓ ଆନ୍ଧ୍ରପ୍ରଦେଶରୁ ଅମୃତଭଣ୍ଡା, ରାଜସ୍ଥାନ, ନାଗପୁରରୁ ଗାଜର ଭଳି ବିଭିନ୍ନ ରାଜ୍ୟରୁ ବିଭିନ୍ନ ପ୍ରକାର ପରିବା ଆସୁଛି ।
କେବଳ ଡିସେମ୍ବର ୧୫ରୁ ମାର୍ଚ୍ଚ ୧୫ ମଧ୍ୟରେ ସ୍ଥାନୀୟ ଉତ୍ପାଦନ ଓଡିଶାବାସୀଙ୍କ ପରିବା ଚାହିଦା ପୂରଣ କରିପାରୁଛି । ଗତ ୧୦ ବର୍ଷ ମଧ୍ୟରେ ରାଜ୍ୟରେ ପରିବା ଉତ୍ପାଦନ ମଧ୍ୟ ମାତ୍ର ୪.୧୪ ପ୍ରତିଶତ ବଢିଛି । ପରିବା ଉତ୍ପାନକୁ ପ୍ରୋତ୍ସାହିତକରିବା କିମ୍ବା ଉତ୍ପାଦନକୁ ସାଇତି ରଖିବା ଭଳି ବ୍ୟବସ୍ଥା କରୁନାହାନ୍ତି ସରକାର । ଆଉ ଯେତିକି ପରିବା ଉତ୍ପାଦନ ହେଉଛି ତାର ଲାଭ ମଧ୍ୟ ସ୍ଥାନୀୟ ଗ୍ରାହକ କିମ୍ବା ଚାଷୀ କାହାରିକୁ ମିଳୁନାହିଁ । ଚାଷୀ କମ୍ ମୂଲ୍ୟରେ ବିକୁଥିବାବେଳେ ଗ୍ରହାକ ଅଧିକ ଦାମରେ କିଣୁଛି ।
କୁହାଯାଉଛି ବାହାର ରାଜ୍ୟରୁ ଆସୁଥିବା ପରିବା ନେଇ ମାର୍କେଟ ଫି ନଥିବାରୁ ବିଧିବଦ୍ଧ ଭାବରେ କେତେ ପରିବା ବଜାରକୁ ଆସୁଛି ତାର ହିସାବ ସରକାରଙ୍କ ପାଖରେ ରହୁନାହିଁ । କିନ୍ତୁ ଏକଥା ସତ ଯେ, ରାଜଧାନୀ ସମେତ ରାଜ୍ୟର ଅଧିକାଂଶ ବଜାରରେ ବାହାର ରାଜ୍ୟ ପରିବାର କବଜା ରହିଛି ।