କିଏ ନେଇଗଲା ଠାକୁରଙ୍କ ଦାନ ସୁନା । ଅଧିକୃତ ଅଧିକାରୀଙ୍କ ବଦଳରେ ସେବକ ଓ ପଦାଧିକାରୀଙ୍କ ପାଖରେ ରହିଛି ଅଳଙ୍କାର ।
କନକ ବ୍ୟୁରୋ: ଠାକୁରଙ୍କୁ ମିଳୁଥିବା ଦାନ ସୁନା ଆଉ ଏହାର ରକ୍ଷଣାବେକ୍ଷଣ ଉପରେ ଏକ ବଡ ଅସଙ୍ଗତି ସାମ୍ନାକୁ ଆସିଛି । ବର୍ଷ ୨୦୨୦ ପାଇଁ ସାଧାରଣ ଓ ସାମାଜିକ କ୍ଷେତ୍ର ପାଇଁ ଉଦ୍ଦିଷ୍ଟ ଅଡିଟ୍ ରିପୋର୍ଟରେ ଦର୍ଶାଯାଇଛି ଯେ, ଦାନ ଆକାରରେ ମିଳିଥିବା ବହୁ ପରିମାଣର ସୁନା ସ୍ଥିରିକୃତ ଅଧିକାରୀଙ୍କ ନିକଟରେ ରହିବା ବଦଳରେ, ସେବକ ଓ ଅନ୍ୟ ପଦାଧିକାରୀଙ୍କ ନିକଟରେ ରହିଥିଲା । ମୋଟ ସୁନାର ୩୮ ପ୍ରତିଶତ ଅର୍ଥାତ୍ ପ୍ରାୟ ୯ କେଜି ସୁନା ଓ ୪୯ ପ୍ରତିଶତ ଅର୍ଥାତ୍ ୧୩୯ କେଜି ରୂପା ମନ୍ଦିର ଦାୟିତ୍ୱରେ ଥିବା ନିର୍ବାହୀ ଅଧିକାରୀଙ୍କ ନିକଟରେ ନଥିଲା । ଏହାକୁ ଅତ୍ୟନ୍ତ ଅନିୟମିତ ବୋଲି ନିଜ ରିପୋର୍ଟରେ ସିଏଜି ଦର୍ଶାଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଏତେ ବିପୁଳ ପରିମାଣର ଅଳଙ୍କାର କିଭଳି ଅନ୍ୟ ବ୍ୟକ୍ତି ବିଶେଷଙ୍କ ନିକଟରେ ରହିଲା, ତାକୁ ନେଇ ପ୍ରଶ୍ନ ଉଠିଛି । ମା’ ଶାରଳା ମନ୍ଦିର କ୍ଷେତ୍ରରେ ଯଦିଓ ନିର୍ବାହୀ ଅଧିକାରୀ ଏକକ ତତ୍ତ୍ୱାବଧାରକ ଭାବେ ପ୍ରାଧିକୃତ ଥିଲେ ତଥାପି ସାଢେ ୫ କେଜିରୁ ଅଧିକ ସୁନା ୯୩ କେଜିରୁ ଅଧିକ ରୂପା ସେବକ ଏବଂ ନିର୍ବାହୀ ଅଧିକାରୀଙ୍କ ବ୍ୟତୀତ ପଦାଧିକାରୀଙ୍କ ହେପାଜତରେ ଥିଲା । ଯେହେତୁ ନିର୍ବାହୀ ଅଧିକାରୀ ଅଳଙ୍କାର ଗୁଡିକର ଦାୟିତ୍ୱ ନେବାରେ ବିଫଳ ହେଲେ, ଏହା ପରିବର୍ତ୍ତେ ଅନଧିକୃତ ବ୍ୟକ୍ତିବିଶେଷଙ୍କୁ ତତ୍ତ୍ୱାବଧାରକ ଭାବେ ଅନୁମତି ଦେଇଦେଲେ । ପରବର୍ତୀ ସମୟରେ ଏନେଇ କାରଣ ଦର୍ଶାଅ ନୋଟିସ୍ ମଧ୍ୟ ଜାରି ହୋଇଥିଲା ।
ସେହିଭଳି ମା ଉଗ୍ରତାରା ମନ୍ଦିର କ୍ଷେତ୍ରରେ ସମସ୍ତ ସୁନା ଓ ରୂପା ସେବକ ଏବଂ ପଦାଧିକାରୀଙ୍କ ନିକଟରେ ରହିଥିଲା । ବଡ କଥା ହେଉଛି, ଠାକୁରଙ୍କ ସୁନା ଚୋରୀ ନେଇ ତିନୋଟି ମାମଲା ରୁଜ୍ଜୁ ହୋଇଥିଲା । ଯେଉଁଥିରେ ଠାକୁରଙ୍କର ଅଧିକାଂଶ ଅଳଙ୍କାର ଚୋରୀ ହୋଇଥିବା ଦର୍ଶାଯାଇଥିଲା । ଏହାସତ୍ୱେ ବି ଅଳଙ୍କାର ଗୁଡିକୁ ଅନଧିକୃତ ବ୍ୟକ୍ତିଙ୍କ ଅଧୀନରେ ହିଁ ରଖାଯାଇଥିଲା । ଶ୍ରୀ ଗୋରଖନାଥ ମନ୍ଦିର କ୍ଷେତ୍ରରେ ବି ସମାନ ସ୍ଥିତି ସୃଷ୍ଟି ହୋଇଥିଲା ।
ବଡ କଥା ହେଉଛି, ଆଖଣ୍ଡଳମଣୀ ମନ୍ଦିର କ୍ଷେତ୍ରରେ ଅଳଙ୍କାର ଥିବା କୋଷାଗାର ଆଇରନ୍ ଚେଷ୍ଟ ଚାବି ହଜିବା ଏକ ବିବାଦୀୟ ଦିଗକୁ ସାମ୍ନାକୁ ଆଣିଛି । ଆଇରନ୍ ଚେଷ୍ଟର ଦୁଇଟି ଚାବି ଅଧିକୃତ ଅଧିକାରୀଙ୍କ ନିକଟରୁ ମିଳିବା ବଦଳରେ ଅନଧିକୃତ ବ୍ୟକ୍ତିଙ୍କ ନିକଟରୁ ମିଳିଥିଲା । ଯାହା ରେକର୍ଡ ଅନୁଯାୟୀ ସୁନା ସାମଗ୍ରୀର ଉପଲବ୍ଧତା ଉପରେ ସନ୍ଦେହ ସୃଷ୍ଟି କରିଥିଲା । ପ୍ରାୟ ୫ କୋଟି ଟଙ୍କାର ସୁନା ଓ ରୁପା ଅଳଙ୍କାର ଅନଧିକୃତ ବ୍ୟକ୍ତିଙ୍କ ନିକଟରେ ରହିବା ଏହାର ନିରାପତା ଉପରେ ସନ୍ଦେହ ସୃଷ୍ଟି କରିଥିଲା । ମା’ ଚଣ୍ଡୀ ମନ୍ଦିରରେ ୫୭୯ ଗ୍ରାମ ସୁନା ଏବଂ ୫୨ କେଜି ରୁପାର ଅସଙ୍ଗତି ଲକ୍ଷ୍ୟ କରାଯାଇଥିଲା । ଯାହାର କୈାଣସି ସନ୍ତୋଷଜନକ ଉତର ଏଯାଏଁ ମିଳିନଥିବା ଜଣାପଡିଛି । କିଭଳି ଠାକୁରଙ୍କ ଦାନ ସଂପତି ଅନ୍ୟ ବ୍ୟକ୍ତିବିଶେଷଙ୍କ ନିକଟକୁ ଯାଉଛି ତାହା ଉପରେ ଏକ ବଡ ଧରଣର ବିବାଦ ସୃଷ୍ଟି କରିଛି ସିଏଜିଙ୍କ ଏହି ରିପୋର୍ଟ ।