ହାତୀ ଆସିଲେ ବାଜିବ ସାଇରନ୍ : ପ୍ରାୟ ୧ କିଲୋମିଟରରୁ ଅଧିକ ଦୂରତା ପର୍ଯ୍ୟନ୍ତ ଶୁଭିବ ଶବ୍ଦ
କନକ ବ୍ୟୁରୋ : ହାତୀ ଆସିଲେ ବାଜିବ ସାଇରନ୍ । ଅନୁଗୁଳ ବନ୍ତଳା ବନାଞ୍ଚଳରେ ସାଇରନ୍ ମେସିନ୍ ଲଗାଇଲା ବନ ବିଭାଗ । ତଳଗଡ଼ ଗାଁରେ ପରୀକ୍ଷାମୂଳକ ଭାବେ ଏହି ଯନ୍ତ୍ରକୁ ଲଗାଯାଇଛି । ଏହା ମାଧ୍ୟମରେ ହାତୀର ଗତିବିଧିକୁ ଲୋକେ ସହଜରେ ଜାଣି ପାରିବା ସହ ସଚେତନ ହୋଇପାରିବେ । ଏହି ଯନ୍ତ୍ରରେ ଏକ ସିମ୍ ରହିଛି । ଉଭୟ ମେସେଜ୍, କଲ ଓ ଇଣ୍ଟରନେଟର ସଂଯୋଗରେ ଏହା ନିୟନ୍ତ୍ରଣ ହେବ । ଫରେଷ୍ଟର, ରେଞ୍ଜ ଅଫିସର ଓ ଡିଏଫଓଙ୍କ ପାଖରେ ଏହାକୁ ପରିଚାଳନା କରିବାର ବ୍ୟବସ୍ଥା ରହିଛି ।
Kanak News is now on WhatsApp
Join and get latest news updates delivered to you via WhatsApp
ହାତୀର ଗତିବିଧି ଦେଖିବା ମାତ୍ରେ ସ୍ଥାନୀୟ ବନ କର୍ମଚାରୀ ଏହି ନମ୍ବରକୁ ମେସେଜ୍ ପଠାଇବେ । ମେସେଜ୍ ପାଇବା ମାତ୍ରେ ସାଇରନ୍ ବାଜିବା ଆରମ୍ଭ ହେବ । ପ୍ରାୟ ୧ କିଲୋମିଟରରୁ ଅଧିକ ଦୂରତା ପର୍ଯ୍ୟନ୍ତ ଏହି ଶବ୍ଦ ଶୁଣାଯିବ । ଫଳରେ ଲୋକେ ଏହି ଶବ୍ଦ ଶୁଣି ସତର୍କ ହୋଇଯିବେ । ଆଗାମୀ ଦିନରେ ହାତୀ ଉପଦ୍ରବ କରୁଥିବା ସମସ୍ତ ଅଞ୍ଚଳରେ ଏହି ଯନ୍ତ୍ର ଲଗାଯିବ ବୋଲି ବନ ବିଭାଗ ପକ୍ଷରୁ କୁହାଯାଇଛି । ଗତ କିଛି ଦିନ ହେବ ଏହି ଅଞ୍ଚଳରେ ହାତୀ ଉପଦ୍ରବ ଦେଖିବାକୁ ମିଳିଛି । ହାତୀ ଆକ୍ରମଣରେ ଲୋକଙ୍କ ଜୀବନ ମଧ୍ୟ ଯାଉଛି । ଡ୍ରୋନ୍ ସାହାଯ୍ୟରେ ହାତୀର ଗତିବିଧି ଉପରେ ନଜର ରଖୁଛି ବନ ବିଭାଗ ।