ଭୁଲ ରକ୍ତ ନେଇଗଲା ୨ ବର୍ଷର ଶିଶୁର ଜୀବନ। ଓ-ନେଗେଟିଭ ବ୍ଳଡ଼ ଗ୍ରୁପର ପିଲାକୁ ଦିଆଯାଇଛି ଏବି-ପଜିଟିଭ ରକ୍ତ।
କନକ ବ୍ୟୁରୋ: ଭୁଲ ରକ୍ତ ନେଇଗଲା ନିଷ୍ପାପ ଶିଶୁର ଜୀବନ । ମାଲକାନଗିରି କୋରୁକୋଣ୍ଡା ଅଞ୍ଚଳର ୨ ବର୍ଷର ଶିଶୁ କନ୍ୟାଙ୍କ ବାପା ଚାଲିଯିବା ପରେ ତାଙ୍କ ମା’ ତାଙ୍କୁ ଠିକ ଭାବେ ଖାଇବାକୁ ଦେଉନଥିଲେ । ଗୋଟିଏ କୋଠରି ଭିତରେ ବନ୍ଦ କରି ମା’ କାମ ଧନ୍ଦା ପାଇଁ ଚାଲି ଯାଉଥିଲେ । ଆଉ ଖାଦ୍ୟ ପାଇଁ କାକୁତି ମିନତି କରିବାରୁ ଖୋଦ ଜନ୍ମଦାତ୍ରୀ ମା’ ଏହି ନିଷ୍ପାପ ଶିଶୁଟିକୁ କଚାଡ଼ି ଗୋଡ ଭାଙ୍ଗି ଘରେ ପକାଇ ରଖିଥିଲେ । ଚାଇଲ୍ଡ ଲାଇନ୍ର କର୍ମକର୍ତା ଖବର ପାଇ ଶିଶୁ କନ୍ୟାଟିକୁ ଉଦ୍ଧାର କରି ଗତ ଜୁଲାଇ ୧୮ ତାରିଖରେ ମାଲକାନଗିରି ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତି କରାଇଥିଲେ । ଏହାପରେ ଚିକିତ୍ସା ଆରମ୍ଭ ହୋଇଥିଲା । ଗୋଡ ପ୍ଲାଷ୍ଟର ମଧ୍ୟ କରା ଗଲା । ଶିଶୁ କନ୍ୟା ଦିବ୍ୟା ପୁଷ୍ଟିହିନତାର ଶିକାର ହୋଇଥିବା ଯୋଗୁ ତାଙ୍କୁ ତୁରନ୍ତ ରକ୍ତର ଆବଶ୍ୟକତା ପଡିଥିଲା । ରକ୍ତ ନମୁନା ସଂଗ୍ରହ ପରେ ମାଲାକନଗିରି ଡାକ୍ତରଖାନାରେ ପିଲାଟିକୁ ୫ ପ୍ୟାକେଟ ଏବି-ପଜିଟିଭ ରକ୍ତ ଦିଆଗଲା । ତଥାପି ଅବସ୍ଥା ସଙ୍କଟାପନ୍ନ ହେବାରୁ କୋରପୁଟ ସହୀଦ ଲକ୍ଷମଣ ନାୟକ ମିଡିକାଲ କଲେଜ ଓ ପରେ ଏମକେସିଜି ଦେଇ କଟକ ଶିଶୁ ଭବନକୁ ପଠାଗଲା ।
Kanak News is now on WhatsApp
Join and get latest news updates delivered to you via WhatsApp
ତେବେ କଟକ ଶିଶୁ ଭବନରେ ବାରମ୍ବାର ପରୀକ୍ଷା କରିବା ପରେ ପିଲାଟିର ରକ୍ତ ନମୁନା ଏବି ପଜିଟିଭ ନୁହେଁ ବରଂ ଓ- ନେଗେଡିଭ ବୋଲି ଜଣାପଡିଲା । ଆଉ କଟକ ଶିଶୁ ଭବନରେ ମଧ୍ୟ ଦୀର୍ଘ ଦିନର ଚିକିତ୍ସା ପରେ ପିଲା ଟି ଗତ ମାସ ୧୭ ତାରିଖରେ ପ୍ରାଣ ହରାଇଥିବା ଜଣାପଡିଛି । ତେବେ କେମିତି ମାଲକାନଗିରି ମେଡିକାଲରେ ରକ୍ତ ନମୁନାର ରିପୋର୍ଟ ଓ–ନେଗେଟିଭ ପରିବର୍ତ୍ତେ ଏବି-ପଜିଟିଭ ଆସିଲା, ସହିଦ ଲକ୍ଷ୍ମଣ ନାୟକ ମେଡିକାଲରେ କେମିତି ବ୍ଲଡ ରିପୋର୍ଟକୁ କ୍ରସ ଚେକ୍ କରାଗଲା ନାହିଁ ତାକୁ ନେଇ ଉଠିଛି ପ୍ରଶ୍ନ । ତେବେ ଏନେଇ କଟକ ଲାଲବାଗ୍ ଥାନା ଏକ ଅପମୃତ୍ୟୁ ମାମଲା ରୁଜୁ କରି ପୁରା ଘଟଣାର ତଦନ୍ତ ଜାରି ରହିଛି ।