ବୈଠକରୁ ବାହାରିଲାନି ସମାଧାନର ବାଟ । ମାର୍କେଟ ବିଲ୍ଡିଂକୁ ଅନିର୍ଦ୍ଧିଷ୍ଟ କାଳ ପାଇଁ ବନ୍ଦ ଘୋଷଣା କଲା ବ୍ୟବସାୟୀ ସଂଘ ।
କନକ ବ୍ୟୁରୋ: ଏବେ ଖୋଲିବନି ମାର୍କେଟ ବିଲ୍ଡିଂ । ବୈଠକରେ କୌଣସି ପ୍ରକାର ନିଷ୍କର୍ସ ବାହାରିନପାରିବା କାରଣରୁ ମାର୍କେଟକୁ ଅନିର୍ଦ୍ଧିଷ୍ଟ କାଳ ପାଇଁ ବନ୍ଦ ଘୋଷଣା କରାଯାଇଛି । ତେବେ ଲିଖିତ ପ୍ରତିଶ୍ରୁତି ମିଳିବା ପରେ ହିଁ ଯାଇ ମାର୍କେଟ ଖୋଲିବ ବୋଲି କହିଛନ୍ତି ସଭାପତି ପ୍ରଦ୍ୟୁମ୍ନ ଜେନା । ତେବେ ବିବାଦ ନେଇ ଗତକାଲି ମଧ୍ୟାହ୍ନରେ ବୈଠକ ବସିଥିଲା । ଏହାପରେ ସନ୍ଧ୍ୟାରେ ବିଏମସି ପକ୍ଷରୁ ଡାକବାଜି ଯନ୍ତ୍ର ସାହାର୍ଯ୍ୟରେ ଘୋଷଣା କରାଯାଇ ମାର୍କେଟ ବିଲ୍ଡିଂ ଭିତରେ ଥିବା ଉଠାଦୋକାନୀଙ୍କୁ ଉଚ୍ଛେଦ କରିଦିଆଯାଇଥିଲା । ହେଲେ ଏହାପରେ ମଧ୍ୟ ଲିଖିତ ପ୍ରତିଶ୍ରୁତି ନମିଳିବା ପର୍ଯ୍ୟନ୍ତ ଦୋକାନ ବନ୍ଦ ରହିବ ବୋଲି ଅଡିବସିଛନ୍ତି ସେ ଣ୍ଟ୍ରାଲ ମାର୍କେଟ ଆସୋସିଏସନର କର୍ମକର୍ତ୍ତା ।
Kanak News is now on WhatsApp
Join and get latest news updates delivered to you via WhatsApp
ସୂଚନାଯୋଗ୍ୟ ଯେ, ଉଠା ଦୋକାନୀଙ୍କ ଦୋରାତ୍ମ୍ୟ ବଢୁଥିବା ଦେଖି ମାର୍କେଟ ବିଲ୍ଡିଂ ବ୍ୟବସାୟୀ ସଂଘ ସ୍ୱତଃପ୍ରବୃତ ଭାବେ ମାର୍କେଟକୁ ବନ୍ଦ ଘୋଷଣା କରିଥିଲେ । ଏହାପରେ ବିଏମସି ତରଫରୁ ଉଠା ଦୋକାନୀଙ୍କୁ ଉଚ୍ଛେଦ କରାଯାଇଥିଲେ ମଧ୍ୟ ଏନେଇ ଲିଖିତ ପ୍ରତିଶ୍ରୁତି ନମିଳିବା ଯାଏଁ ମାର୍କେଟ ବନ୍ଦ ରହିବ ବୋଲି ବ୍ୟବସାୟୀ ସଂଘ କହିଛି ।
ତେବେ ସୂଚନା ଅନୁସାରେ, ମାର୍କେଟ୍ ବିଲ୍ଡିଂ ଭିତରେ ଦୁଇପାର୍ଶ୍ବରେ ଥିବା ଦୋକାନର ମଝି ସ୍ଥାନରେ ଉଠା ଦୋକାନୀମାନେ ବସୁଛନ୍ତି । ଏକ ଡ୍ରେସ୍ ସୋ’ରୁମ୍ ଆଗରେ ଜଣେ ମହିଳା ଚପଲ ଦୋକାନ କରି ବସୁଥିଲେ । ସେହି ସ୍ଥାନକୁ ସେ ୩ ଶହ ଟଙ୍କାରେ ଭଡ଼ା ନେଇଥିବା କହୁଛନ୍ତି । ଗତ କିଛି ମାସ ହେଲା ସେହି ସ୍ଥାନକୁ ସେ ଅନ୍ୟ ଜଣଙ୍କୁ ଭଡ଼ାରେ ଦେଇଥିଲେ । ସପ୍ତାହେ ତଳେ ମହିଳା ଜଣଙ୍କ ସେହି ଉଠାଦୋକାନୀଙ୍କୁ ଉଠି ଯିବାକୁ କହିଥିଲେ । କିନ୍ତୁ ସମ୍ପୃକ୍ତ ସୋ’ରୁମ୍ ତାଙ୍କୁ ଭଡ଼ା ଦେଇଥିବା ସେ କହିଥିଲେ । ଏହାକୁ ନେଇ ବିବାଦ ଉପୁଜିଥିଲା । ଏନେଇ ସେ ଥାନାର ଦ୍ବାରସ୍ଥ ମଧ୍ୟ ହୋଇଥିଲେ ।
ସେହିପରି ସୋମବାର ମହିଳାଜଣଙ୍କ ନିଜେ ସେଠାରେ ନିଜ ଦୋକାନ ଖୋଲିଥିଲେ। କିନ୍ତୁ ଦୋକାନ ଖୋଲିବାକୁ ଯିବା ସମୟରେ ସମ୍ପୃକ୍ତ ସୋ’ରୁମ୍ର ଏକ ସ୍କୁଟି ରହିଥିଲା। ମହିଳା ସମ୍ପୃକ୍ତ ସୋ’ରୁମ୍ ମାଲିକଙ୍କୁ ଯାଇ ଘଟଣା ସମ୍ପର୍କରେ ପଚାରିଥିଲେ । ସେମାନଙ୍କ ଭିତରେ ପାଟିତୁଣ୍ଡ ହେବାରୁ ସେ ସ୍କୁଟିକୁ ଠେଲି ଫୋପାଡ଼ି ଦେଇଥିଲେ । ଏହାକୁ ନେଇ ଗଣ୍ଡଗୋଳ ଉଗ୍ରରୂପ ଧାରଣ କରିଥିଲା । ଉଠାଦୋକାନୀ-ବ୍ୟବସାୟୀ ସଂଘ ମୁହାଁମୁହିଁ ହୋଇଥିଲେ । ଖବର ପାଇ ପୁଲିସ ଘଟଣାସ୍ଥଳରେ ପହଞ୍ଚିଥିଲା । ପୁଲିସ, ବିଏମ୍ସି କିଛି ଶୁଣୁ ନ ଥିବା ଅଭିଯୋଗ କରି ବ୍ୟବସାୟୀ ସଂଘ ସୋମବାର ଅପରାହଣ ୨ଟା ପରଠାରୁ ମାର୍କେଟ ବିଲ୍ଡିଂର ସମସ୍ତ ଦୋକାନ ବନ୍ଦ କରିଦେଇଥିଲେ ।