କନକ ବ୍ୟୁରୋ: ଉତ୍ତର ଆଣ୍ଡାମାନ ସାଗରରେ ସକ୍ରିୟ ଥିବା ଘୂର୍ଣ୍ଣିବଳୟ ୨୩ ତାରିଖ ବେଳକୁ ସାମୁଦ୍ରିକ ଝଡର ରୂପ ନେବ । ଆଉ ଦୀପାବଳି ବେଳକୁ ସମୁଦ୍ର ଭିତରେ ଅଧିକ ବଳ ଗୋଟାଇ ଆଗକୁ ଗତି କରିବ । ଏମିତି ଆକଳନ କରିଛି ଭାରତୀୟ ପାଣିପାଗ ବିଭାଗ । ଏନେଇ ସ୍ପଷ୍ଟ କରିଛନ୍ତି ନିଜେ ଆଇଏମଡି ଡିଜି ମୃତ୍ୟୁଞ୍ଜୟ ମହାପାତ୍ର । କନକ ନ୍ୟୁଜକୁ ସାକ୍ଷାତକାର ଦେଇ କହିଛନ୍ତି, କାଲି ରାତି କିମ୍ବା ପରଦିନ ସକାଳ ସୁଦ୍ଧା ଦକ୍ଷିଣ-ପୂର୍ବ ବଙ୍ଗୋପସାଗର ନିକଟସ୍ଥ ଆଣ୍ଡାମାନ ଦୀପପୁଞ୍ଜ ଅଂଚଳରେ ସୃଷ୍ଟି ହୋଇଥିବା ଘୂର୍ଣ୍ଣିବଳୟ ଲଘୁଚାପର ରୂପ ନେବ । ଲଘୁଚାପଟି ପଶ୍ଚିମ-ଉତ୍ତର-ପଶ୍ଚିମ ଦିଗରେ ଗତି କରି କେନ୍ଦ୍ରୀୟ ବଙ୍ଗୋଗସାଗର ନିକଟ ଏବଂ ଦକ୍ଷିଣ ବଙ୍ଗୋପସାଗରରେ ୨୨ତାରିଖରେ ଅବପାତରେ ପରିଣତ ହେବ । ଏହା ପଶ୍ଚିମ-ଉତ୍ତର-ପଶ୍ଚିମ ଦିଗରେ ଗତି କରିବ ଏବଂ ପଶ୍ଚିମ-କେନ୍ଦ୍ରୀୟ ବଙ୍ଗୋପସାଗର ଯାହାକି ଆନ୍ଧ୍ରପ୍ରଦେଶ ଉପକୂଳରୁ ୨ଶହ କିଲୋମିଟର ଦୂର ସମୁଦ୍ର ଭିତରେ କେନ୍ଦ୍ରୀଭୂତ ରହିବ । ସମୁଦ୍ର ଭିତରର ସ୍ଥିତି ଅନୁକୂଳ ଥିବାରୁ ସେହି ସ୍ଥାନରେ ଅବପାତଟି ବାତ୍ୟାର ରୂପ ନେବ ।
Kanak News is now on WhatsApp
Join and get latest news updates delivered to you via WhatsApp
କିନ୍ତୁ ବାତ୍ୟାଟି କେଉଁ ଅଞ୍ଚଳ ଦେଇ ଯିବ, କେଉଁ ସ୍ଥାନରେ ଅତିକ୍ରମ କରିବ ସେ ନେଇ ଭାରତୀୟ ପାଣିପାଗ ବିଭାଗ ପକ୍ଷରୁ କୌଣସି ପୂର୍ବାନୁମାନ କରାଯାଇନାହିଁ । ଘୂର୍ଣିର୍ବଳୟ ଅବସ୍ଥାରେ ଥିବାରୁ ଆଗାମୀ ଦିନରେ ଚିତ୍ର ସ୍ପଷ୍ଟ ହେବ ବୋଲି କହିଛନ୍ତି ଆଇଏମଡି ଡିଜି । ବାତ୍ୟାର ଗତିପଥ ଓ ତୀବ୍ରତା ନେଇ ଆଇଏମଡି ପକ୍ଷରୁ କୌଣସି ସ୍ପଷ୍ଟ ଚିତ୍ର ଦିଆଯାଇନଥିଲେ ବି ଇସିଏମଡବ୍ଲ୍ୟୁଏଫ, ଜିଏଫଏସ ଓ ଆଇକନ ଭଳି ପାଣିପାଗ ମଡେଲ ସମ୍ଭାବ୍ୟ ଗତିପଥ ଆକଳନ କରିଛନ୍ତି । ଆଉ ସେମାନଙ୍କ ମଡେଲକୁ ଆଧାର କରି ପାଣିପାଗ ସଂସ୍ଥା ୱିଣ୍ଡି ପକ୍ଷରୁ ସାଂକେତିିକ ଭାବରେ ବାତ୍ୟାର ଗତିପଥ ଦର୍ଶାଯାଇଛି ।
ଇସିଏମଡବ୍ଲ୍ୟୁଏଫର ଆକଳନ ଅନୁସାରେ ବାତ୍ୟାଟି ୨୫ତାରିଖରେ ଓଡିଶା ଉପକୂଳ ଦେଇ ସମୁଦ୍ର ଭିତରେ ଆଗକୁ ଗତି କରିବ । ଏହି ସମୟରେ ପାରାଦୀପ, ଧାମରା, ବାଲେଶ୍ୱରରେ ବାତ୍ୟାର ପ୍ରଭାବ ଅନୁଭୂତ ହେବ । ୨୬ତାରିଖରେ ଓଡିଶା , ବାଂଲାଦେଶ ମଝିରେ ବାତ୍ୟା ସ୍ଥଳଭାଗ ଅତିକ୍ରମ କରିପାରେ । ଜିଏଫଏସ ମଡେଲର ଆକଳନ ଅନୁସାରେ ୨୪ତାରିଖ ବେଳକୁ ବାତ୍ୟାଟି ଉତ୍ତର ଆନ୍ଧ୍ରପ୍ରଦେଶ ଓ ଦକ୍ଷିଣ ଓଡିଶା ଉପକୂଳ ନିକଟରେ ସମୁଦ୍ର ଭିତରେ ଅତିକ୍ରମ କରିପାରେ । ୨୫ତାରିଖରେ ପାରାଦୀପ, ଧାମରା, ବାଲେଶ୍ୱର ନିକଟରେ ସ୍ଥଳଭାଗ ଅତିକ୍ରମ କରିପାରେ । ବାତ୍ୟା ପ୍ରଭାବରେ ରାଜ୍ୟ ବିଭିନ୍ନ ସ୍ଥାନରେ ୨୩ରେ ସ୍ୱଳ୍ପ ୨୪ ଓ ୨୫ରେ ପ୍ରବଳ ବର୍ଷାର ସମ୍ଭାବନା ରହିଛି । ଅର୍ଥାତ ଦୀପାବଳିକୁ ବର୍ଷା ଭିଜେଇବ । ତେବେ ସମ୍ଭାବ୍ୟ ବାତ୍ୟା ସୁପରସାଇକ୍ଲୋନର ରୂପ ନେବ ନାହିଁ ବୋଲି କହିଛନ୍ତି ଆଇଏମଡି ଡିଜି । ଏଥିସହ ସମ୍ଭାବ୍ୟ ବାତ୍ୟାକୁ ଦେଇ ସତର୍କ କରିଛି ପାଣିପାଗ ବିଭାଗ ।