କୋଟିଆରେ ଅନୁପ୍ରବେଶ କରି ସହାୟତା ବାଣ୍ଟୁଛି ଆନ୍ଧ୍ର ପ୍ରଶାସନ। ମନ୍ତ୍ରୀ ପ୍ରମିଳା ମଲ୍ଲିକ କହିଲେ, ସରକାରଙ୍କ ହୋଇନି ଦୃଷ୍ଟିଗୋଚର।
କନକ ବ୍ୟୁରୋ: ଦୀର୍ଘଦିନଧରି କୋଟିଆ ପଞ୍ଚାୟତରେ ପଶି ଲୋକଙ୍କୁ ଲୋଭ ଦେଖାଉଛି ଆନ୍ଧ୍ର, କେତେବେଳେ ଭତା ବାଣ୍ଟୁଛି ତ ଆଉ କେତେବେଳେ ଜଙ୍ଗଲ ଜମି ପଟ୍ଟା ଦେଉଛି । ଏହା ସମସ୍ତେ ଜାଣିଛନ୍ତି । ଗଣମାଧ୍ୟମରେ ଏ ଖବର ଅନେକ ଥର ବାରମ୍ବାର ପ୍ରସାରିତ ହେଉଛି । ବିରୋଧୀ ଦଳ ଓ କଂଗ୍ରେସ ବିଧାୟକ ଏ ନେଇ ବିଧାନସଭାରେ ପ୍ରଶ୍ନ ଉଠାଉଛନ୍ତି । କିନ୍ତୁ ସରକାରଙ୍କ ପାଖରେ ଏ ନେଇ କିଛି ଖବର ନାହିଁ । ବିଭାଗୀୟ ମନ୍ତ୍ରୀ ଏ ସମ୍ପର୍କରେ କିଛି ବି ଜାଣିନାହାନ୍ତି ।
Kanak News is now on WhatsApp
Join and get latest news updates delivered to you via WhatsApp
ଗତକାଲି ବିଧାନସଭାରେ ଖଣ୍ଡପଡା ବିଧାୟକ ସୌମ୍ୟରଞ୍ଜନ ପଟ୍ଟନାୟକ ଏକ ଅଣତାରକା ପ୍ରଶ୍ନର ଉତ୍ତରରେ ମନ୍ତ୍ରୀ ପ୍ରମିଳା ମଲ୍ଲିକ ଏଭଳି କହିଛନ୍ତି । ଖଣ୍ଡପଡା ବିଧାୟକଙ୍କ ପ୍ରଶ୍ନ ଥିଲା, କୋଟିଆ ଗ୍ରାମପୁଞ୍ଜ ସମେତ ଓଡିଶାର ସୀମାନ୍ତବର୍ତୀ ଗାଁ ଲୋକଙ୍କୁ ଆନ୍ଧ୍ର ସରକାର ଭୋଟର ପରିଚୟ ପତ୍ର, ରାସନ କାର୍ଡ, ଜଙ୍ଗଲ ଜମି ପଟ୍ଟା, ଜାତି ପ୍ରମାଣପତ୍ର ଓ ବିଭିନ୍ନ ସରକାରୀ ଯୋଜନାର ସମାନ୍ତରାଳ ସହାୟତା ଦେଉଥିବା ସରକାର ଜାଣନ୍ତି କି, ଯଦି ହଁ ସରକାର କି ପଦକ୍ଷେପ ନେଇଛନ୍ତି ଜଣାନ୍ତୁ ।
ଏହା ଉତ୍ତରରେ ମନ୍ତ୍ରୀ ପ୍ରମିଳା ମଲ୍ଲିକ କହିଥିଲେ, ଏଭଳି କିଛି ଦୃଷ୍ଟିଗୋଚର ହୋଇନାହିଁ । ଜଣାପଡିଲେ କାର୍ଯ୍ୟାନୁଷ୍ଠାନ ହେବ । କୋଟିଆ ସମ୍ପର୍କରେ ସରକାରଙ୍କ ଏଭଳି ଉତ୍ତର ସମସ୍ତଙ୍କୁ ଆଶ୍ଚର୍ଯ୍ୟ କରିଛି । ଯାହାକୁ ନେଇ ଆଜି ଶୂନ୍ୟକାଳରେ ଉଦବେଗ ପ୍ରକାଶ କରିଥିଲେ ଉଭୟ ଶାସକ ଓ ବିରୋଧୀ । ଖୋଦ ଶାସକ ଦଳ ବିଧାୟକ ଅମର ଶତପଥୀ କହିଥିଲେ କୋଟିଆରେ କଣ ସ୍ଥିତି ରହିଛି ଏନେଇ ମନ୍ତ୍ରୀ ଗୃହରେ ଉତ୍ତର ରଖନ୍ତୁ ।