ଦିନରେ ତାତି ସକାଳେ କୁହୁଡି ! ୫ଟି ସହରର ପାରଦ ୩୮ଡିଗ୍ରୀ ଉପରେ, ସକାଳୁ ସକାଳୁ ରାଜଧାନୀରେ କୁହୁଡିର ଚାଦର
କନକ ବ୍ୟୁରୋ:ଦିନରେ ତାତି ସକାଳୁ କୁହୁଡି । ଆଜି ସକାଳୁ ସକାଳୁ ରାଜଧାନୀ ଭୁବନେଶ୍ୱର ତଥା ଆଖପାଖ ଅଂଚଳରେ ଘନ କୁହୁଡି ଦେଖିବାକୁ ମିଳିଛି । ରାତିରେ ଗରମ ହେଉଥିବା ବେଳେ ସକାଳେ କୁହୁଡିଆ ପାଗ ସହ ଥଣ୍ଡା ଅନୁଭୁତ ହେଉଛି । ତେବେ ଗତକାଲି ଅଚାନକ ଦିନକରେ ୩ ଡିଗ୍ରୀ ବଢ଼ିଥିଲା ତାପମାତ୍ରା । ଶୁକ୍ରବାର ୩୫ଦଶମିକ ତାପମାତ୍ରା ଥିବାବେଳେ ଶନିବାର ୩୮ଦଶମିକ୍ ୬ ଡିଗ୍ରୀରେ ପହଁଚିଥିଲା । ଅସହ୍ୟ ଗରମରେ ଛଟପଟ ହୋଇଛି ଜନଜୀବନ । ପାଣିପାଗ ବିଭାଗର ପୂର୍ବାନୁମାନ ଅନୁଯାୟୀ ପାରଦ ଆହୁରି ଉପରକୁ ଉଠିପାରେ । ଆସନ୍ତା ୧୩ରୁ ୧୪ତାରିଖ ବେଳକୁ ରାଜଧାନୀ ତାପମାତ୍ରା ୪୦ଡିଗ୍ରୀ ଛୁଇଁପାରେ ।
Kanak News is now on WhatsApp
Join and get latest news updates delivered to you via WhatsApp
ପାଣିପାଗ କେନ୍ଦ୍ର ନିର୍ଦ୍ଦେଶକ ଶରତ ଚନ୍ଦ୍ର ସାହୁଙ୍କ ସୂଚନା ଅନୁଯାୟୀ, ଗତ କିଛି ଦିନ ହେଲା ଉତ୍ତର ମଧ୍ୟପ୍ରଦେଶ, ଓଡ଼ିଶା ସୀମାବର୍ତ୍ତୀ ଅଞ୍ଚଳରେ ଆକାଶରେ ବାଦଲ ଥିଲା । ଏହାସହ ସମୁଦ୍ରରୁ ସ୍ଥଳଭାଗକୁ ପବନ ବହୁଥିଲା। ତେଣୁ ତାତି ଅଧିକ ଅନୁଭୂତ ହେଉନଥିଲା। କିନ୍ତୁ ଗତକାଲି ଓଡ଼ିଶା ସୀମାବର୍ତ୍ତୀ ଆକାଶରେ ବାଦଲ ନାହିଁ କି ସମୁଦ୍ର ଦିଗରୁ ସ୍ଥଳ ଭାଗକୁ ଜୋରରେ ପବନ ବହୁନି । ଏହାସହ ଉତ୍ତର ପଶ୍ଚିମ ଓ ପଶ୍ଚିମ ଦିଗରୁ ଘଣ୍ଟା ପ୍ରତି ୧୫ରୁ ୨୦କିମି ବେଗରେ ପବନ ବହୁଛି । ତେଣୁ ତାତି ହଠାତ୍ ବଢ଼ିଯାଇଛି ।
ଏହିଭଳି ପାଗ ଆସନ୍ତା ୧୫ତାରିଖ ପର୍ଯ୍ୟନ୍ତ ଲାଗି ରହିବ। ୧୩ତାରିଖ ବେଳକୁ ରାଜ୍ୟର ଅଧିକାଂଶ ସ୍ଥାନରେ ପାରଦ ୪୦ରୁ ୪୨ ଡିଗ୍ରୀ ପର୍ଯ୍ୟନ୍ତ ରହିବ ବୋଲି ଶ୍ରୀ ସାହୁ କହିଛନ୍ତି । ୧୬ତାରିଖ ବେଳକୁ କିଛି ମାତ୍ରାରେ ଖରା କମିବ। ଏହି ସମୟରେ ବର୍ଷା ଓ କାଳ ବୈଶାଖୀ ହେବାର ସମ୍ଭାବନା ଥିବାରୁ ପାରଦ ଖସିବ ବୋଲି ପାଣିପାଗ କେନ୍ଦ୍ର ପକ୍ଷରୁ କୁହାଯାଇଛି ।