ତେଲେଙ୍ଗାନା କଂଗ୍ରେସର ନୂଆ ଫର୍ମୁଲା, ବିଧାନସଭା ଟିକେଟ ପାଇଁ ଆବେଦନ କଲେ ଦେବାକୁ ପଡିବ ୫୦ ହଜାର ଟଙ୍କା ଆବେଦନ ଶୁଳ୍କ
କନକ ବ୍ୟୁରୋ : ଚଳିତ ବର୍ଷ ଶେଷ ଆଡକୁ ତେଲେଙ୍ଗାନାରେ ବିଧାନସଭା ନିର୍ବାଚନ ଅନୁଷ୍ଠିତ ହେବାକୁ ଯାଉଛି । ଏହା ପୂର୍ବରୁ କଂଗ୍ରେସର ତେଲେଙ୍ଗାନା ୟୁନିଟ୍ ବିଧାନସଭା ନିର୍ବାଚନକୁ ନେଇ ଜୋରଦାର ପ୍ରସ୍ତୁତି ଆରମ୍ଭ କରିଛି । ଦଳ ତରଫରୁ ଟିକେଟ ଆଶାୟୀଙ୍କ ଠାରୁ ଆବେଦନ ଗ୍ରହଣ କରାଯାଉଛି । ଏନେଇ ଦଳର ଜଣେ ବରିଷ୍ଠ ନେତା ସୂଚନା ଦେଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
କଂଗ୍ରେସର କର୍ଣ୍ଣାଟକ ୟୁନିଟ୍ ଭଳି ତେଲେଙ୍ଗାନା ୟୁନିଟ ତରଫରୁ ଆଶାୟୀ ଅନୁସୂଚିତ ଜାତି, ଅନୁସୂଚିତ ଜନଜାତି ଓ ଦିବ୍ୟାଙ୍ଗଙ୍କ ଠାରୁ ଆବେଦନ ପାଇଁ ୨୫ ହଜାର ଟଙ୍କା ଓ ସାଧାରଣ ବର୍ଗର ଆଶାୟୀଙ୍କ ଠାରୁ ୫୦ ହଜାର ଟଙ୍କା ଶୁଳ୍କ ନେବ ବୋଲି କୁହାଯାଉଛି । କର୍ଣ୍ଣାଟକ ବିଧାନସଭା ନିର୍ବାଚନ ପୂର୍ବରୁ କର୍ଣ୍ଣାଟକର କଂଗ୍ରେସ ୟୁନିଟ୍ ସାଧାରଣ ବର୍ଗର ଆଶାୟୀଙ୍କ ଠାରୁ ୨ ଲକ୍ଷ ଟଙ୍କା ଓ ଅନୁସୂଚିତ ଜାତି, ଅନୁସୂଚିତ ଜନଜାତି ଓ ଦିବ୍ୟାଙ୍ଗ ଆଶାୟୀଙ୍କ ଠାରୁ ୧ଲକ୍ଷ ଟଙ୍କା ଲେଖାଏଁ ଶୁଳ୍କ ନିଆଯାଇଥିଲା ।
ତେଲେଙ୍ଗାନା କଂଗ୍ରେସ ୟୁନିଟର ଜଣେ ସଦସ୍ୟ ମହେଶ କୁମାର ଗୌଡ କହିଛନ୍ତି କି, ଟିକେଟ ଆଶାୟୀଙ୍କ ଚୟନ ନେଇ ପୂର୍ବ ଉପ ମୁଖ୍ୟମନ୍ତ୍ରୀ ଦାମୋଦର ରାଜା ନରସିହ୍ମାଙ୍କ ଅଧ୍ୟକ୍ଷତାରେ ତିନି ଜଣିଆ ସଦ୍ୟସ୍ୟତା ଉପ କମିଟି ଗଠନ କରାଯାଇଛି । ମହେଶ କୁମାର ଗୌଡ ଏବେ ତେଲେଙ୍ଗାନା ପ୍ରଦେଶ କଂଗ୍ରେସ କମିଟର କାର୍ଯ୍ୟକାରୀ ଅଧ୍ୟକ୍ଷ ରହିଛନ୍ତି ।
ଏକ ଜାତୀୟ ଗଣମାଧ୍ୟମକୁ ସାକ୍ଷାତକାର ଦେବା ବେଳେ ମହେଶ କୁମାର ଗୌଡ କହିଛନ୍ତି କି, ଅଗଷ୍ଟ ୧୮ ତାରିଖ ଦ୍ୱିପ୍ରହର ସୁଦ୍ଧା ଆଶାୟୀଙ୍କ ଠାରୁ ଆସିଥିବା ଆବେଦନ ଫର୍ମ ଅପଲୋଡ କରାଯାଇଛି । ଏହାସହ ଅଗଷ୍ଟ ୨୫ ତାରିଖ ସୁଦ୍ଧା ଆଶାୟୀ ପ୍ରାର୍ଥୀଙ୍କୁ ନିୟମ ଅନୁସାରେ ୨୫ ହଜାର କିମ୍ବା ୫୦ ହଜାର ଟଙ୍କାର ଡିମାଣ୍ଡ ଡ୍ରାଫ୍ଟ ଜମା କରିବାକୁ ପଡିବ ।
ତେଲେଙ୍ଗାନା ପ୍ରଦେଶ କଂଗ୍ରେସ କମିଟର କାର୍ଯ୍ୟକାରୀ ଅଧ୍ୟକ୍ଷ ମହେଶ ଗୌଡ କହିଛନ୍ତି କି ଦଳ ତରଫରୁ ୨୦୧୪ ଓ ୨୦୧୮ ବିଧାନସଭା ନିର୍ବାଚନ ବେଳେ ଆଶାୟୀ ପ୍ରାର୍ଥୀଙ୍କ ଠାରୁ କୌଣସି ଶୁଳ୍କ ନେଇ ନଥିଲା । କେବଳ ୨୦୦୯ ବିଧାନସଭା ନିର୍ବାଚନ ବେଳେ ଦଳ ଟିକେଟ ଆଶାୟୀଙ୍କ ଠାରୁ ମାତ୍ର ୧୦ହଜାର ଟଙ୍କା ଶୁଳ୍କ ନେଇଥିଲା । ଆବେଦନ ଶୁଳ୍କ ଲାଗୁ ହେବା ପରେ କେବଳ ଗମ୍ଭୀର ଦାବିଦାର ଆବେଦନ କରିବେ ବୋଲି ସେ କହିଛନ୍ତି ।