ତାଲିବାନୀ ସରକାରର ନୂଆ ନିୟମ । ଏକାକୀ ଦୂର ଜାଗାକୁ ଯାତ୍ରା କରିପାରିବେନି ମହିଳା । ଦୂରଯାତ୍ରା ପାଇଁ ସାଙ୍ଗରେ ପୁରୁଷ ବନ୍ଧୁ ରହିବା ବାଧ୍ୟତାମୂଳକ ।
କନକ ବ୍ୟୁରୋ: ମହିଳାଙ୍କ ପାଇଁ ପୁଣି ନୂଆ ନିୟମ ଆଣିଲା ତାଲିବାନ । ଏଣିକି ଆଫଗାନିସ୍ତାନରେ ରହୁଥିବା ମହିଳାମାନେ କୌଣସି ଦୂର ଜାଗାକୁ ଏକାକୀ ଯାତ୍ରା କରିପାରିବେ ନାହିଁ । ଦୂର ଜାଗାକୁ ଯାତ୍ରା କରିବାକୁ ହେଲେ ମହିଳାଙ୍କୁ କୌଣସି ପୁରୁଷଙ୍କ ସହିତ ଯିବାକୁ ପଡିବ ବୋଲି ନୂଆ ନିୟମ ଜାରି କରିଛି ତାଲିବାନୀ ସଙ୍ଗଠନ । ତେବେ ମିଳିଥିବା ସୂଚନା ମୁତାବକ, ରବିବାର ଜାରି କରାଯାଇଥିବା ଏହି ଗାଇଡଲାଇନରେ ଆହୁରି କିଛି ନୂଆ ନିୟମକୁ ମଧ୍ୟ ସାମିଲ କରାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ନୂଆ ନିୟମ ମୁତାବକ, କୌଣସି ଗାଡି ମାଲିକ ନିଜ ଗାଡିରେ ହିଜାବ ପିନ୍ଧି ନଥିବା ମହିଳାଙ୍କୁ ଯାତ୍ରା ପାଇଁ ଅନୁମତି ଦେଲେ, ତାଙ୍କ ବିରୋଧରେ କଡା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ । କେବଳ ହିଜାବ ପିନ୍ଧିଥିବା ମହିଳାମାନେ ହିଁ ଗାଡିରେ ଯାତ୍ରା କରିପାରିବେ । ତେବେ ତାଲିବାନର ଏଭଳି ନିୟମକୁ ଏବେ ଚାରିଆଡେ ନିନ୍ଦା କରାଯାଇଛି ।
ଯେତେବେଳେ ତାଲିବାନୀମାନେ ଆଫଗାନିସ୍ତାନ ଉପରେ କବଜା କରିବା ସହିତ ସରକାର ଗଠନ କରିଥିଲେ । ସେତେବେଳେ ସେମାନେ କହିଥିଲେ ଯେ, ଏହି ସରକାରରେ ସେମାନେ ମହିଳାଙ୍କୁ ଉଚିତ୍ ସ୍ୱାଧୀନତା ପ୍ରଦାନ କରିବେ । ହେଲେ ବର୍ତ୍ତମାନ ଆଣିଥିବା ଏହି ଆଇନରେ ମହିଳାଙ୍କ ସ୍ୱାଧୀନତାକୁ ସଙ୍କୁଚିତ କରାଯାଇଥିବା ଦେଖିବାକୁ ମିଳୁଛି । ଏହାପୂର୍ବରୁ ତାଲିବାନୀ ସରକାର ସେଠାକାର ଟେଲିଭିଜନରେ ମହିଳା ଅଭିନେତ୍ରୀଙ୍କ ନାଟକ ଚଲାଇବାକୁ ମଧ୍ୟ ବାରଣ କରିଥିଲା ।
ତାଲିବାନର ଏହି ନୂଆ ନିୟମ ପରେ ମାନବାଧିକାର କମିଶନ ଏହାକୁ ନିନ୍ଦା କରିଛି । ନୂଆ ନିୟମରେ ମହିଳାଙ୍କୁ କଏଦୀ ଭଳି ବ୍ୟବହାର କରାଯାଇଛି ବୋଲି କୁହାଯାଇଛି । ମହିଳା ଅଧିକାର ସମୁହର ଆସୋସିଏଟ୍ ନିର୍ଦ୍ଦେଶକ ହୀଥର ବର୍ଥ କହିଛନ୍ତି, କୌଣସି ସ୍ଥାନକୁ ଯିବା ଜଣେ ବ୍ୟକ୍ତିର ସ୍ୱାଧୀନତା । ଏହି ନୂଆ ନିୟମ ଘର ଭିତରେ ମହିଳାଙ୍କ ପ୍ରତି ହିଂସାକୁ ବଢାଇବ ।
ଏହି ମାସରେ ତାଲିବାନୀମାନେ ନିଜ ସର୍ବୋଚ୍ଚ ନେତାଙ୍କ ଉଦ୍ଦେଶ୍ୟରେ ଏକ ନିର୍ଦ୍ଦେଶ ଜାରି କରିଥିଲେ । ଏହି ନିର୍ଦ୍ଦେଶରେ ମହିଳାଙ୍କ ଅନେକ ଅଧିକାରକୁ ପୁଣି ଲାଗୁ କରିବାକୁ କୁହାଯାଇଥିଲା । ହେଲେ ମହିଳାମାନଙ୍କର ଶିକ୍ଷାକୁ ନେଇ ଏହି ନିର୍ଦ୍ଦେଶରେ କିଛି ବି ଉଲ୍ଲେଖ କରାଯାଇନଥିଲା । ରବିବାର ଏହି ଘଟଣାକୁ ନେଇ ତାଲିବାନୀ ସରକାରରେ ଉଚ୍ଚଶିକ୍ଷା ମନ୍ତ୍ରୀ ଥିବା ଅବଦୁଲ ବକି ହକ୍କାନୀ ସାମ୍ବାଦିକମାନଙ୍କୁ କହିଛନ୍ତି, ଆମେ ମହିଳାଙ୍କ ଶିକ୍ଷା ବିରୋଧୀ ନୁହଁ । ଆମେ କେବଳ ଝିଅଙ୍କ ସହ ପୁଅଙ୍କ ଶିକ୍ଷାର ବିରୋଧୀ ଅଟୁ ।