ଆହତ କାରଣରୁ ରୋହିତ ଦିନିକିଆ ସିରିଜରୁ ବାଦ୍ ପଡିଲେ ମଧ୍ୟ କୋହଲିଙ୍କୁ ମିଳିବନି କ୍ୟାପଟେନ ଦାୟିତ୍ୱ! ଜାଣନ୍ତୁ କେଉଁ ଖେଳାଳୀଙ୍କୁ ଦାୟିତ୍ୱ ଦେଇପାରେ ବିସିସିଆଇ?
କନକ ବ୍ୟୁରୋ : ବିରାଟଙ୍କ ନେତୃତ୍ୱରେ ଏବେ ଦକ୍ଷିଣ ଆଫ୍ରିକାରେ ଟେଷ୍ଟ ସିରିଜ ଖେଳୁଛି ଟିମ୍ ଇଣ୍ଡିଆ । ତେବେ ଏହି ଟେଷ୍ଟ ସିରିଜ ଆରମ୍ଭ ପୂର୍ବରୁ ରୋହିତ ଶର୍ମା ଆହତ ହୋଇ ସିରିଜରୁ ବାଦ୍ ପଡିଥିଲେ । ରୋହିତଙ୍କ ବଦଳରେ ରାହୁଲଙ୍କୁ ଟେଷ୍ଟ ଟିମର ଉପ-ଅଧିନାୟକ ଦାୟିତ୍ୱ ଦିଆଯାଇଥିଲା । ତେବେ ଆହତ ସମସ୍ୟାରୁ ଏଯାବତ ମୁକୁଳିପାରିନଥିବା ରୋହିତ ଯଦି ଦିନିକିଆ ସିରିଜରୁ ବାଦ୍ ପଡନ୍ତି ତେବେ ନୂଆ ଅଧିନାୟକଙ୍କ ନେତୃତ୍ୱରେ ଟିମ୍ ଇଣ୍ଡିଆକୁ ମୈଦାନକୁ ଓହ୍ଲାଇବାକୁ ପଡିବ ।
Kanak News is now on WhatsApp
Join and get latest news updates delivered to you via WhatsApp
ରୋହିତ ଯଦି ସିରିଜରୁ ବାଦ୍ ପଡନ୍ତି ତେବେ ତେବେ କୋହଲିଙ୍କୁ ପୁଣିଥରେ ଅଧିନାୟକ ଦାୟିତ୍ୱ ଦେବାର ସମ୍ଭାବନା ଯଥେଷ୍ଟ କ୍ଷୀଣ । କାରଣ କୋହଲିଙ୍କ ଠାରୁ ଅଧିନାୟକ ପଦ ଯିବା ପରେ ଯେଉଁ ବିବାଦ ଦେଖାଦେଇଥିଲା ତାହାକୁ ନେଇ ବିସିସିଆଇ ବିରାଟଙ୍କ ଉପରେ ବେଶ ଖପ୍ପା ଅଛି । ଏହାବାଦ୍ ଥରେ ଅଧିନାୟକ ପଦରୁ ହଟାଯିବା ପରେ ପୁଣିଥରେ ଉକ୍ତ ଖେଳାଳୀଙ୍କ ଟିମ୍ ଇଣ୍ଡିଆର ଅଧିନାୟକ ଭାର ମିଳିବା ଖୁବ କ୍ୱଚିତ୍ ଦେଖିବାକୁ ମିଳେ ।
ଏଭଳି ସ୍ଥିତିରେ ରୋହିତଙ୍କ ଅନୁପସ୍ଥିତିରେ ରାହୁଲଙ୍କୁ ଦଳର ଅଧିନାୟକ କରାଯାଇପାରେ । କାରଣ ରୋହିତ ଓ ବିରାଟଙ୍କ ପରେ ଦଳରେ ରାହୁଲ ହିଁ ସିନିୟର ଖେଳାଳୀ ରହିଛନ୍ତି । ଏହାପୂର୍ବରୁ ମଧ୍ୟ ରାହୁଲଙ୍କୁ ମଧ୍ୟ ଅଧିନାୟକ ଭୂମିକାରେ ଅନେକଥର ଦେଖିବାକୁ ମିଳିଛି । ଖାସକରି ଆଇପିଏଲରେ ପଞ୍ଜାବ କିଙ୍ଗସର ଅଧିନାୟକ ଦାୟିତ୍ୱ ତୁଲାଇଛନ୍ତି ରାହୁଲ । ଏପରିକି ତାଙ୍କ ଅଧିନାୟକତ୍ୱରେ ଦଳ ମଧ୍ୟ ବେଶ ଭଲ ପ୍ରଦର୍ଶନ କରିଛି । ତେଣୁ ରୋହିତଙ୍କ ଅନୁପସ୍ଥିତିରେ ରାହୁଲ ହିଁ ଅଧିନାୟକ ପଦ ପାଇଁ ବଡ ଦାବିଦାର ଭାବେ ଉଭା ହୋଇପାରନ୍ତି ।
ଦକ୍ଷିଣ ଆଫ୍ରିକା ଗସ୍ତ ପୂର୍ବରୁ ରୋହିତ ଶର୍ମା ମଧ୍ୟ ମୁମ୍ବାଇରେ ଅଭ୍ୟାସ କରୁଥିଲେ । ତେବେ ବ୍ୟାଟିଂ ଅଭ୍ୟାସ କରୁଥିବା ବେଳେ ବଲ ବାଜିବାରୁ ରୋହିତ ଆହତ ହୋଇଥିଲେ ।ଯେଉଁଥିପାଇଁ ତାଙ୍କୁ ଦକ୍ଷିଣ ଆଫ୍ରିକା ବିପକ୍ଷ ଟେଷ୍ଟ ସିରିଜରୁ ବାଦ୍ ଦିଆଯାଇଥିଲା । ଗତ କିଛି ଦିନ ପୂର୍ବେ ବିରାଟଙ୍କ ସ୍ଥାନରେ ରୋହିତଙ୍କୁ ଦିନିକିଆ ଦଳର ନୂଆ ଅଧିନାୟକ ଦାୟିତ୍ୱ ଦେଇଛି ବିସିସିଆଇ । ଏହାପୂର୍ବରୁ କୋହଲି ଟି-୨୦ ଅଧିନାୟକ ଭାର ଛାଡିବା ପରେ ଏହାର ଦାୟିତ୍ୱ ମଧ୍ୟ ରୋହିତଙ୍କୁ ଦେଇଥିଲା ବୋର୍ଡ ।