ଦିଲ୍ଲୀ ଉପ ରାଜ୍ୟପାଳଙ୍କୁ ମହାଠକ ସୁକେଶ ଚନ୍ଦ୍ରଶେଖର ପୁଣି ଲେଖିଲେ ଚିଠି, କେଜ୍ରିୱାଲଙ୍କ ଇସ୍ତଫା ଦାବି
କନକ ବ୍ୟୁରୋ : ଗୋଟିଏ ପଟେ ହିମାଚଳ ଓ ଗୁଜରାଟ ନିର୍ବାଚନ ମୁଣ୍ଡ ଉପରେ ଥିବା ବେଳେ ଆମ୍ ଆଦମୀ ପାର୍ଟି ପାଇଁ ମୁଣ୍ଡବିନ୍ଧାର କାରଣ ପାଲଟିଛି ଜେଲରେ ଥିବା ମହାଠକ ସୁକେଶ ଚନ୍ଦ୍ରଶେଖର । ସୁକେଶଙ୍କର ଗୋଟିଏ ପରେ ଗୋଟିଏ ଚିଠି ଏବେ ଆମ୍ ଆଦମୀ ପାର୍ଟିର ଛବିକୁ ମଳିନ କରିବାରେ ଲାଗିଛି । ସୁକେଶ ଗୋଟିଏ ପରେ ଗୋଟିଏ ଖୁଲାସା କରୁଥିବା ବେଳେ ଏହାକୁ ଅସ୍ତ୍ର କରିବାରେ ଲାଗିଛି ବିଜେପି ।
Kanak News is now on WhatsApp
Join and get latest news updates delivered to you via WhatsApp
ଜେଲରେ ବନ୍ଦ ଥିବା ମହାଠକ ସୁକେଶ ଆମ୍ ଆଦମୀ ପାର୍ଟିର ରାଷ୍ଟ୍ରୀୟ ସଂଯୋଜକ ତଥା ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କ ଉପରେ ଗମ୍ଭୀର ଅଭିଯୋଗ ଆଣିଛନ୍ତି । ସେ ଜେଲରୁ ଥାଇ ଦିଲ୍ଲୀ ଉପରାଜ୍ୟପାଳ ବି.କେ ସକସେନାଙ୍କୁ ୪ ଟି ଚିଠି ଲେଖିଛନ୍ତି । ଏଥିରେ ସେ ଆମ୍ ଆଦମୀ ପାର୍ଟିର ଅଭିଯୋଗ ଉପରେ ଜବାବ ଦେବା ସହ କେଜ୍ରିୱାଲଙ୍କ ଇସ୍ତଫା ଦାବି କରିଛନ୍ତି ।
ଏବେ ଲେଖିଥିବା ଚିଠିରେ ଆମ୍ ଆଦମୀ ପାର୍ଟି ଉପରେ ଗୁରୁତ୍ୱର ଅଭିଯୋଗ ଆଣିଛନ୍ତି ସୁକେଶ । ସେ ଲେଖିଛନ୍ତି ଯେ ଗୋଆ ଓ ପଞ୍ଜାବ ନିର୍ବାଚନ ବେଳେ ଆମ୍ ଆଦମୀ ପାର୍ଟି ତାଙ୍କୁ ଚାନ୍ଦା ମାଗିଥିଲା ଓ ସେ ଦେଇଥିଲେ ମଧ୍ୟ । ଏହାସହ ସେ ଯଦି ମିଛ କହୁଛନ୍ତି ତେବେ ଅରବିନ୍ଦ କେଜ୍ରିୱାଲ ସତ୍ୟନ୍ଦ୍ର ଜୈନଙ୍କ ଉପରେ ତାଙ୍କ ଅଭିଯୋଗ ପ୍ରତ୍ୟାହାର କରିବାକୁ କେଜ୍ରିୱାଲ ତାଙ୍କ ଉପରେ କାହିଁକି ଚାପ ପକାଉଛନ୍ତି ବୋଲି ସୁକେଶ ପ୍ରଶ୍ନ କରିଛନ୍ତି ।
ଅନ୍ୟପଟେ ଜେଲ ପ୍ରଶାସନ ମାଧ୍ୟମରେ ତାଙ୍କୁ ଅଫର ଦେବା ସହ ଧମକ ଦିଆଯାଉଛି ବୋଲି ଦିଲ୍ଲୀ ଉପରାଜ୍ୟପାଳଙ୍କୁ ଲେଖିଥିବା ଚିଠିରେ ସୁକେଶ ଉଲ୍ଲେଖ କରିଛନ୍ତି ।