ଦୁଇଗୁଣା ବେଗରେ ବଢୁଛି ସମୁଦ୍ରର ଜଳସ୍ତର । ସତର୍କ ସୂଚନା ଦେଲା ସଂଯୁକ୍ତ ରାଷ୍ଟ୍ର । ଜଳମଗ୍ନ ହେବ ଅଧିକାଂଶ ଦ୍ୱୀପ ।
କନକ ବ୍ୟୁରୋ: ଦୁଇ ଗୁଣା ବେଗରେ ବଢୁଛି ସମୁଦ୍ରର ଜଳସ୍ତର । ଖୁବଶୀଘ୍ର ସମୁଦ୍ର ତଟବର୍ତ୍ତୀ ଅଞ୍ଚଳ ହେବ ଜଳମଗ୍ନ । ଏନେଇ ରିପୋର୍ଟ ପ୍ରକାଶ କରିବା ସହିତ ସତର୍କ ସୂଚନା ଦେଇଛି ସଂଯୁକ୍ତ ରାଷ୍ଟ୍ର । ରିପୋର୍ଟ ମୁତାବକ, ୧୯୯୩ରୁ ୨୦୦୨ ଭିତରେ ସମୁଦ୍ରର ଜଳସ୍ତର ଯେଉଁ ବେଗରେ ବୃଦ୍ଧି ପାଉଥିଲା, ୨୦୧୩ରୁ ୨୦୨୨ ଭିତରେ ଏହା ଦୁଇ ଗୁଣା ବେଗରେ ବୃଦ୍ଧି ପାଉଛି । ତେବେ ଗତବର୍ଷ ରେକର୍ଡ ସ୍ପିଡରେ ସମୁଦ୍ରର ଜଳସ୍ତର ବୃଦ୍ଧି ପାଇଥିବାବେଳେ, ଭବିଷ୍ୟତରେ ଏହା ବିଶ୍ୱ ପାଇଁ ବଡ ବିପଦ ସାଜିବ ବୋଲି କୁହାଯାଉଛି ।
Kanak News is now on WhatsApp
Join and get latest news updates delivered to you via WhatsApp
ସଂଯୁକ୍ତ ରାଷ୍ଟ୍ର ପାଣିପାଗ ବିଜ୍ଞାନରର ସୂଚନା ମୁତାବକ, ସମୁଦ୍ରର ଜଳସ୍ତର ବୃଦ୍ଧି ପାଇବାର ବଡ କାରଣ ହେଉଛି ତାପମାତ୍ରା ବୃଦ୍ଧି । ଗ୍ଲେସିୟର ତରଳିବା କାରଣରୁ ସମୁଦ୍ରର ଜଳସ୍ତର ବୃଦ୍ଧି ପାଉଛି । ତେବେ ୨୦୧୩ରୁ ୨୦୨୨ ଭିତରେ ସମୁଦ୍ରର ଜଳସ୍ତର ପ୍ରତିବର୍ଷ ୪.୬୨ ମିଲିମିଟର ବୃଦ୍ଧି ପାଉଥିଲା । ଯାହାକି ୧୯୯୩ରୁ ୨୦୦୨ ଭିତରେ ବଢୁଥିବା ଜଳସ୍ତରର ଦୁଇ ଗୁଣା ସ୍ପିଡ୍ ।
ଡବ୍ଲୁଏମଓ ସେକ୍ରେଟାରୀ ଜେନେରାଲ ପେଟେରୀ ଟାଲସଙ୍କ କହିବା ମୁତାବକ, ଗ୍ଲେସିୟର ତରଳିବା ଦ୍ୱାରା ସମୁଦ୍ରର ଜଳସ୍ତର ବିପଦଜନକ ଭାବେ ବୃଦ୍ଧି ପାଉଛି । ବହୁଳ ପରିମାଣରେ ଗ୍ରୀନ୍ ହାଉସ୍ ଗ୍ୟାସ ନିର୍ଗତ ହେଉଥିବା କାରଣରୁ ଏପରି ହେଉଛି । ତେବେ ଜଳସ୍ତର ବୃଦ୍ଧି କେବଳ ଏବେ ନୁହେଁ, ଆଗାମୀ ହଜାରେ ବର୍ଷ ଧରି ଜାରି ରହିବ ବୋଲି କୁହାଯାଉଛି । 
ସମୁଦ୍ରର ଜଳସ୍ତର ବୃଦ୍ଧି ପାଇଲେ ତଟୀୟ ଅଞ୍ଚଳ ପାଇଁ ବିପଦ ସୃଷ୍ଟି ହେବ । ବିଶେଷକରି ଅଧିକାଂଶ ଦ୍ୱୀପର ନକ୍ସା ଲିଭିଯିବ । ଆଣ୍ଟାକର୍ଟିକାରେ ଗତ ବର୍ଷ ଜୁନ୍ ଓ ଜୁଲାଇ ମାସରେ ତୀବ୍ର ବେଗରେ ବରଫ ତରଳିଛି ବୋଲି ରିପୋର୍ଟ ପ୍ରକାଶ ପାଇଛି । ତେବେ ପୃଥିବୀ ପୃଷ୍ଠର ତାପମାତ୍ରା ବୃଦ୍ଧି ପାଇବା ଦ୍ୱାରା ଏହାର ପ୍ରଭାବ ମଣିଷ ସମାଜ ଉପରେ ମଧ୍ୟ ପଡିଛି । ଗତବର୍ଷ ୟୁରୋପରେ ହିଟ୍ ୱେଭ୍ କାରଣରୁ ୧୫ ହଜାର ଲୋକ ପ୍ରାଣ ହରାଇଥିଲେ । ଆସନ୍ତା ୨୦୬୦ ମସିହା ପର୍ଯ୍ୟନ୍ତ ପାଣିପାଗରେ ଏଭଳି ପରିବର୍ତ୍ତନ ଦେଖିବାକୁ ମିଳିପାରେ ବୋଲି କୁହାଯାଉଛି ।
ଯଦି ଆଗାମୀ ଦଶନ୍ଧି ସୁଦ୍ଧା ତାପମାତ୍ରା ଆଉ ଦେଢ ଡିଗ୍ରୀ ବୃଦ୍ଧି ପାଏ, ତେବେ ଏହାର ଯଥେଷ୍ଟ ପ୍ରଭାବ ପଡିପାରେ । ସମୁଦ୍ରରେ ଜଳସ୍ତର ବୃଦ୍ଧି ପାଇବା ସହିତ ତଟୀୟ ଅଞ୍ଚଳ ଜଳମଗ୍ନ ହେବ ବୋଲି କୁହାଯାଉଛି ।