ମୋଦୀ ସାଙ୍ଗିଆ ମାମଲାରେ ‘ସୁପ୍ରିମ’ ରାୟ । ରାହୁଲଙ୍କ ଦଣ୍ଡାଦେଶ ଉପରେ ରହିତାଦେଶ ଲଗାଇଲେ ସୁପ୍ରିମକୋର୍ଟ । ପଢନ୍ତୁ, ମାମଲାକୁ ନେଇ କଣ କହିଲେ ସର୍ବୋଚ୍ଚ ଅଦାଲତ…
କନକ ବ୍ୟୁରୋ: ଦୀର୍ଘ ୪ମାସର ଲଢ଼େଇ ପରେ କଂଗ୍ରେସ ନେତା ରାହୁଲ ଗାନ୍ଧୀଙ୍କୁ ମିଳିଛି ଆଶ୍ୱସ୍ତି । ମୋଦୀ ସାଙ୍ଗିଆ ମାମଲାରେ ଗୁଜରାଟର ତଳକୋର୍ଟ ରାହୁଲଙ୍କୁ ଦେଇଥିବା ଦଣ୍ଡବିଧାନ ଉପରେ ରୋକ ଲଗାଇଛନ୍ତି ସୁପ୍ରିମକୋର୍ଟ । ରାହୁଲଙ୍କ ମନ୍ତବ୍ୟକୁ ଅପମାନଜନକ ବୋଲି ଖଣ୍ଡପୀଠ କହିଥିଲେ ବି ସର୍ବାଧିକ ଦଣ୍ଡବିଧାନକୁ ନେଇ ପ୍ରଶ୍ନ ଉଠାଇଛନ୍ତି ଆଉ ରାହୁଲଙ୍କ ସପକ୍ଷରେ ରାୟ ଦେଇଛନ୍ତି । ତେବେ ସୁପ୍ରିମକୋର୍ଟଙ୍କ ଏହି ନିଷ୍ପତ୍ତିକୁ ସ୍ୱାଗତ କରିଛି କଂଗ୍ରେସ । ଏହା ସତ୍ୟ ଓ ଗଣତନ୍ତ୍ରର ବିଜୟ ବୋଲି ଦଳ ପକ୍ଷରୁ କୁହାଯାଇଛି । ଅନ୍ୟପଟେ ସୁପ୍ରିମକୋର୍ଟଙ୍କ ରାୟ ଆସିବା ପରେ ଖୁସି ମନାଇଛନ୍ତି କଂଗ୍ରେସ ନେତା ଓ କର୍ମୀ ।
Kanak News is now on WhatsApp
Join and get latest news updates delivered to you via WhatsApp
ମାନହାନି ମାମଲାରେ କଂଗ୍ରେସ ନେତା ରାହୁଲ ଗାନ୍ଧୀଙ୍କୁ ସୁପ୍ରିମକୋର୍ଟରୁ ଆଶ୍ୱସ୍ତି ମିଳିବା ପରେ ଖୁସିରେ ବିଭୋର ହୋଇଛନ୍ତି ନେତା ଓ କର୍ମୀ । ସତେ ଯେମିତି କେନ୍ଦ୍ରର ମୋଦୀ ସରକାର ବିରୋଧରେ ବଡ ବିଜୟ ଲାଭ କରିଛି କଂଗ୍ରେସ । ଆଉ ମିଠା ବାଣ୍ଟି ଉତ୍ସବ ମନାଇଛନ୍ତି ଦଳୀୟ ନେତା ଓ କର୍ମୀ ।
- ମୋଦୀ ସାଙ୍ଗିଆ ମାମଲାରେ ସୁପ୍ରିମ ରାୟ
- ରାହୁଲଙ୍କ ଦଣ୍ଡାଦେଶ ଉପରେ ରହିତାଦେଶ
ମୋଦୀ ସାଙ୍ଗିଆ ମାମଲାରେ ରାହୁଲ ଗାନ୍ଧୀଙ୍କୁ ଗୁଜୁରାଟ ତଳ କୋର୍ଟ ଦେଇଥିବା ରାୟ ଉପରେ ରହିତାଦେଶ ଜାରି କରିଛନ୍ତି ସୁପ୍ରିମକୋର୍ଟ । ଗୁଜୁରାଟ ତଳ କୋର୍ଟର ରାୟକୁ ଚ୍ୟାଲେଞ୍ଜ କରି ରାହୁଲ କରିଥିବା ଆବେଦନର ଶୁଣାଣି କରି ତିନି ଜଣିଆ ଖଣ୍ଡପୀଠ ଏହି ରୋକ୍ ଲଗାଇଛନ୍ତି । ବିଚାରପତି ବି.ଆର. ଗଭାଇ, ପି.ଏସ୍.ନରସିହ୍ମା ଓ ସଞ୍ଜୟ କୁମାରଙ୍କୁ ନେଇ ଗଠିତ ଖଣ୍ଡପୀଠ ମାମଲାର ଶୁଣାଣି କରୁଥିଲେ । ଉଭୟ ପକ୍ଷରୁ ଯୁକ୍ତି ଶୁଣିବା ପରେ ଖଣ୍ଡପୀଠ କହିଛନ୍ତି….
- ଆବେଦନକାରୀ( ରାହୁଲ ଗାନ୍ଧୀ) ଦେଇଥିବା ମନ୍ତବ୍ୟ ନିଶ୍ଚିତ ଭାବରେ ଅପମାନ ଜନକ । ତେଣୁ ଆବେଦନକାରୀ ଭାଷଣଦେବାବେଳେ ଯତ୍ନବାନ ହେବାର ଆବଶ୍ୟକତା ରହିଛି
- ତଳ କୋର୍ଟ ରାହୁଲଙ୍କୁ ସେକ୍ସନ ୪୯୯ ଧାରାରେ ସର୍ବାଧିକ ଦଣ୍ଡାଦେଶ କରିଛନ୍ତି । ଗୋଟିଏ ଦିନ କମ୍ ଦଣ୍ଡ ଦେଇଥିଲେ ସଭ୍ୟପଦ ଯାଇନଥାନ୍ତା
- କିନ୍ତୁ ତଳକୋର୍ଟ ସର୍ବାଧିକ ଦଣ୍ଡାଦେଶ ପଛର କୌଣସି କାରଣ ଦର୍ଶାଇ ନାହାନ୍ତି
- ରାହୁଲଙ୍କ ସାର୍ବଜନୀନ ଜୀବନର ଅଧିକାର ପ୍ରଭାବିତ ହେବ
- ରାହୁଲଙ୍କୁ ପ୍ରତିନିଧି ବାଛୁଥିବା ଜନତାଙ୍କ ଅଧିକାର ବି ପ୍ରଭାବିତ ହେବ
- ରାହୁଲଙ୍କ ଆବେଦନର ଚୂଡାନ୍ତ ରାୟ ନ ଆସିବା ଯାଏଁ ଦଣ୍ଡାଦେଶ ଉପରେ ରହିତାଦେଶ ଜରୁରୀ
ଦଣ୍ଡାଦେଶ ଉପରେ ସୁପ୍ରିମକୋର୍ଟ ରୋକ୍ ଲଗାଇବା ପରେ ଏହାକୁ ସତ୍ୟର ବିଜୟ ବୋଲି କହିଛି କଂଗ୍ରେସ । କଂଗ୍ରେସ ସଭାପତି ମଲ୍ଲିକାର୍ଜୁନ ଖଡଗେ କହିଛନ୍ତି, ଏହା ଭାରତର ସାଧାରଣ ଲୋକଙ୍କ ବିଜୟ, ଗଣତନ୍ତ୍ରର ବିଜୟ ।
୨୦୧୯ରେ କର୍ଣ୍ଣାଟକର ଏକ ନିର୍ବାଚନୀ ପ୍ରଚାରରେ ରାହୁଲ ଗାନ୍ଧୀ ନୀରବ ମୋଦୀ, ଲଳିତ ମୋଦୀଙ୍କ ଉଦାହରଣ ଦେଇ ସବୁ ମୋଦୀ ସାଙ୍ଗିଆଧାରୀମାନେ ଚୋର କାହିଁକି ବୋଲି ପ୍ରଶ୍ନ କରିଥିଲେ । ରାହୁଲଙ୍କ ଏଭଳି ଟିପଣୀ ବିରୋଧରେ ଗୁଜୁରାଟରେ ମାମଲା ରୁଜୁ କରିଥିଲେ ପୂର୍ଣ୍ଣେଶ ମୋଦୀ । ଆଉ ସେହି ମାମଲାର ଶୁଣାଣି କରି କୋର୍ଟ ରାହୁଲଙ୍କୁ ୨ବର୍ଷ ଦଣ୍ଡାଦେଶ ଦେଇଥିଲେ । ଦଣ୍ଡାଦେଶ ପରେ ରାହୁଲଙ୍କ ସାଂସଦ ପଦ ଯାଇଥିଲା । ଆଉ ତାପରେ ରାହୁଲ ତଳକୋର୍ଟର ରାୟ ବିରୋଧରେ ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଥିଲେ ।