ରାୟଗଡ଼ାରେ ରୁଷ ନାଗରିକଙ୍କ ମୃତ୍ୟୁ ଘଟଣାର ତନାଘନା : ୧୨ ଜଣିଆ କ୍ରାଇମବ୍ରାଞ୍ଚ ଟିମ୍ କରୁଛନ୍ତି ଯାଞ୍ଚ
କନକ ବ୍ୟୁରୋ : ଦୁଇ ରୁଷ ପର୍ଯ୍ୟଟକଙ୍କ ମୃତ୍ୟୁ ଘଟଣାର ତନାଘନା ଚଲାଇଛି କ୍ରାଇମବ୍ରାଞ୍ଚ ଟିମ୍ । ରାୟଗଡାରେ ପହଞ୍ଚି କ୍ରାଇମବ୍ରାଞ୍ଚର ୧୨ ଜଣିଆ ଟିମ୍ ପୁରା ଘଟଣାର ଯାଞ୍ଚ କରୁଛନ୍ତି । ଆଜି ମଧ୍ୟ ତଦନ୍ତ ପ୍ରକ୍ରିୟା ଜାରି ରହିବ ବୋଲି ସୂଚନା ଦେଇଛନ୍ତି କ୍ରାଇମବ୍ରାଞ୍ଚ ଡିଏସପି । ଯେଉଁ ରୁମରେ ବିଦେଶ ପର୍ଯ୍ୟଟକ ରହିଥିଲେ ଓ ଯେଉଁସ୍ଥାନରୁ ତାଙ୍କର ମୃତ ଦେହପଡିଥିଲା, ସେ ସବୁ ସ୍ଥାନରେ ଫରେନସିକ୍ ଟିମ୍ ସହାୟତାରେ ତଦନ୍ତ କରାଯାଇଛି । ଆଜି ରୁଷ ପର୍ଯ୍ୟଟକ ପାଭେଲ ଆଣ୍ଟୋଭଙ୍କ ଶେଷକୃତ୍ୟ ହୋଇଥିବା ଶ୍ମଶାନକୁ ଯାଇ ନମୂନା ସଂଗ୍ରହ କରିବ ବୋଲି ସୂଚନା ମିଳିଛି ।
Kanak News is now on WhatsApp
Join and get latest news updates delivered to you via WhatsApp
ରୁଷୀୟ ସାଂସଦ ପାଭେଲ ଆଂଟୋଭଙ୍କ ମୃତ୍ୟୁ ଏକ ଅନ୍ତର୍ଜାତୀୟ ପ୍ରସଙ୍ଗ ହୋଇଥିବାରୁ, ତାଙ୍କର କେମିତି ଜୀବନ ଗଲା, ସେ ଆତ୍ମହତ୍ୟା କରିଛନ୍ତି ନାଁ ତାଙ୍କୁ କେହି ହତ୍ୟା କରିଛି, ତାର କାରଣ ଖୋଜିବାକୁ ତଦନ୍ତକୁ କ୍ରାଇମବ୍ରାଞ୍ଚ ଜୋରଦାର କରିଛି । ଗତକାଲି ପାଭେଲ ଯେଉଁ ଛାତ ଉପରୁ ପଡି ମୃତ୍ୟୁ ହୋଇଛି ବୋଲି କୁହାଯାଉଛି, ସେଠି ଯାଞ୍ଚ କରିଛନ୍ତି । ହୋଟେଲ ତଳେ ଯେଉଁଠି ପାଭେଲ ପଡିଥିଲେ, ସେହି ସ୍ଥାନର ଯାଞ୍ଚ କରିବା ସହ ବିଭିନ୍ନ ଆଙ୍ଗେଲ ଫଟୋ ଉଠାଇଛନ୍ତି ।
ଏଥିସହ ହୋଟେଲ ମ୍ୟାନେଜର, କର୍ମଚାରୀଙ୍କ ସମେତ ପୋଷ୍ଟମର୍ଟମ କରିଥିବା ଡାକ୍ତରଙ୍କୁ କ୍ରାଇମବ୍ରାଞ୍ଚ ଟିମ୍ ପଚରା ଉଚରା କରିଛନ୍ତି । ଆଜି ଶ୍ମଶାନରୁ ଫରେନସିକ୍ ଟିମ ସହାୟତାରେ ପାଭେଲ ଆଣ୍ଟୋଭଙ୍କ ଚିତାର ନମୂନା ସଂଗ୍ରହ କରି ଲାବକୁ ପଠାଯିବ ବୋଲି ସୂଚନା ମିଳିଛି । ରୁଷ ପର୍ଯ୍ୟଟକଙ୍କ ସନ୍ଦିଗ୍ଧ ମୃତ୍ୟୁ ପରେ ତରବରିଆ ଭାବେ ଶବସକ୍ରାର କରିବା ଘଟଣା ବଡ ସନ୍ଦେହ ସୃଷ୍ଟି କରୁଛି । ତେଣୁ ସବୁ ପ୍ରକାର ସମ୍ଭାବ୍ୟ ଦିଗକୁ ଆଖିରେ ରଖି କ୍ରାଇମବ୍ରାଞ୍ଚ ଟିମ୍ ତଦନ୍ତ ଚଲାଇଛି ।