କେମିତି ହେଲା ରୁଷ ପର୍ଯ୍ୟଟକଙ୍କ ମୃତ୍ୟୁ । ବ୍ୟବଛେଦ ରିପୋର୍ଟରୁ ସାମନାକୁ ଆସିଲା ମୃତ୍ୟୁର କାରଣ, ଉଠିଲା ପ୍ରଶ୍ନ ଦୁର୍ଘଟଣା ଜନିତ ବୋଲି କେମିତି ଜାଣିଲେ ଡାକ୍ତର?
କନକ ବ୍ୟୁରୋ : ରାୟଗଡା ରୁଷୀୟ ପର୍ଯ୍ୟଟକଙ୍କ ମୃତ୍ୟୁ କେମିତି ହେଲା ତାହା ଏବେ ରହସ୍ୟ ଘେରରେ । ଏହାରି ଭିତରେ ଦୁଇ ମୃତକଙ୍କ ଶବ ବ୍ୟବଛେଦ ରିପୋର୍ଟ ଆସିଛି । ରିପୋର୍ଟରେ ରୁଷ ସାଂସଦ ପାଭେଲଙ୍କ ମୃତ୍ୟୁକୁ ନେଇ ସନ୍ଦେହ ସୃଷ୍ଟି ହୋଇଛି । ଏପରିକି ଶବ ବ୍ୟବଛେଦ ରିପୋର୍ଟକୁ ନେଇ ବହୁ ଫରେନସିକ ଏକ୍ସପର୍ଟ ପ୍ରଶ୍ନ ଉଠାଇଛନ୍ତି । ବଡ କଥା ହେଲା ୨୫ ରୁ ୩୦ ଫୁଟ ଉଚ୍ଚରୁ ପାଭେଲ ଖସି ପଡିିଥିଲେ ବୋଲି ପୋଲିସ କହୁଛି । ହେଲେ ତାଙ୍କ ଶରୀରର ବାହ୍ୟ ଅଂଶରେ କୌଣସି ଆଘାତ ଲାଗିଲାନି କେମିତି? ଯାହାକୁ ନେଇ ପ୍ରଶ୍ନ ଘେରରେ ପୋଷ୍ଟମୋର୍ଟମ ରିପୋର୍ଟ ।
Kanak News is now on WhatsApp
Join and get latest news updates delivered to you via WhatsApp
ରାୟଗଡା ହୋଟେଲରେ ଦୁଇ ରୁଷୀୟ ପର୍ଯ୍ୟଟକଙ୍କର କେମିତି ମୃତ୍ୟୁ ହେଲା, ସେ ନେଇ ସସପେନ୍ସ ଲାଗି ରହିଥିବାବେଳେ କନକ ନ୍ୟୁଜ୍ ହାତରେ ଲାଗିଛି ଉଭୟଙ୍କ ଶବ ବ୍ୟବଛେଦ ରିପୋର୍ଟ । ଏ ହେଉଛି ରାୟଗଡା ଜିଲ୍ଲା ମୁଖ୍ୟ ଚିକିତ୍ସାଳୟ ପକ୍ଷରୁ ଦିଆଯାଇଥିବା ଦୁଇ ମୃତକଙ୍କ ଭିନ୍ନ ଭିନ୍ନ ଶବ ବ୍ୟବଛେଦ ରିପୋର୍ଟ ।
ସାମ୍ନାକୁ ଆସିଛି ପ୍ରଥମେ ମୃତ୍ୟୁ ହୋଇଥିବା ଭ୍ଲାଦିମିର ବିଦାନୋଭଙ୍କ ବ୍ୟବଛେଦ ରିପୋର୍ଟ ।ଏଥିରେ ସ୍ପଷ୍ଟ ଭାବରେ ଦର୍ଶାଯାଇଛି, ଭ୍ଲାଦିମିରଙ୍କ ଶରୀରର ବାହାର କି ଭିତର ଅଂଗରେ କୌଣସି ପ୍ରକାର କ୍ଷତ ଚିହ୍ନ ମିଳି ନାହିଁ । କିନ୍ତୁ କାର୍ଡିଆକ୍ ଫେଲ୍ୟୁର ବା ହୃଦଘାତ ଯୋଗୁଁ ବିଦାନୋଭଙ୍କର ମୃତ୍ୟୁ ହୋଇଛି । ତାଙ୍କ ପାକସ୍ଥଳୀରୁ ମିଳିଥିବା ଜଳୀୟ ଅଂଶରେ ଗଞ୍ଜେଇ, ଅଫିମ ପରି ନିଶା ଦ୍ରବ୍ୟର ବାସ୍ନା ମିଳିଛି । ..
ସେହିଭଳି ରୁଷୀୟ ସାଂସଦ ପାଭେଲ ଆଂଟୋଭଙ୍କ ଶବ ବ୍ୟବଛେଦ ରିପୋର୍ଟରେ ସ୍ପଷ୍ଟ ଭାବରେ ଦର୍ଶାଯାଇଛି, ପାଭେଲଙ୍କ ମୁଣ୍ଡ ଖପୁରୀ ଓ ମେରୁଦଣ୍ଡରେ କୌଣସି ଆଘାତ ଲାଗିନଥିଲା । ତାଙ୍କ ମାଂସପେଶୀ ଓ ହାଡରେ କୌଣସି ପ୍ରକାର ଆଘାତ ଲାଗିନଥିଲା । କିନ୍ତୁ ତାଙ୍କ ବାମ ପଟ କାନ୍ଧ ଓ ପିଞ୍ଜରା ହାଡ ଭାଂଗି ଯାଇଥିଲା । ଶରୀରର ଗୁରୁତ୍ୱପୂର୍ଣ୍ଣ ଅଂଗ ଲଙ୍ଗସ, ଲିଭର ଓ ସ୍ପ୍ଲିନରେ ଆଘାତ ଲାଗି ରକ୍ତସ୍ରାବ ହୋଇଥିଲା । ଆଉ ତାପରେ ବ୍ରେନ୍ ହାମରେଜ୍ ଯୋଗୁଁ ମୃତ୍ୟୁ ହୋଇଛି । ଏବଂ ଡାକ୍ତର ଏହା ଏକ ଆକ୍ସିଡେଂଟାଲ ଡେଥ୍ ବା ଦୁର୍ଘଟଣାଜନିତ ମୃତ୍ୟୁ ବୋଲି ଦର୍ଶାଇଛନ୍ତି ।
ଶବ ବ୍ୟବଛେଦ ରିପୋର୍ଟ ସାମନାକୁ ଆସିବା ପରେ ସନ୍ଦେହ ଆହୁରି ବଢ଼ି ଯାଇଛି । କ୍ୟାମେରା ସମ୍ମୁଖରେ କହି ନଥିଲେ ବି ଶବ ବ୍ୟବଛେଦ ରିପୋର୍ଟକୁ ନେଇ ଅନେକ ଫରେନସିକ୍ ବିଶେଷଜ୍ଞ ପ୍ରଶ୍ନ ଉଠାଇଛନ୍ତି ।
ପ୍ରଶ୍ନ ଉଠୁଛି,
– ୨୫ ରୁ ୩୦ ଫୁଟ ଉଚ୍ଚରୁ ପଡିିଥିଲେ ଥିଲେ ବି ଶରୀରର ବାହ୍ୟ ଅଂଶରେ କୌଣସି ଆଘାତ ଲାଗିଲାନି କେମିତି?
– ବାହ୍ୟ ଅଂଶ ଆଘାତପ୍ରାପ୍ତ ନହୋଇ ଭିତରେ ଥିବା ଅଂଗପ୍ରତ୍ୟଙ୍ଗରେ ଆଘାତ ଲାଗିଲା କେମିତି?
– ଭ୍ଲାଦିମିରଙ୍କ ଭିସେରା ନମୁନା ରଖାଯାଇଥିଲା ବେଳେ ପାଭେଲଙ୍କ ଭିସେରା ରଖାଗଲାନି କାହିଁକି?
– କେଉଁ ଆଧାରରେ ଡାକ୍ତରୀ ଟିମ୍ ଏହାକୁ ଦୁର୍ଘଟଣା ଜନିତ ବୋଲି ଉଲ୍ଲେଖ କଲେ?
ପାଭେଲଙ୍କ ମୃତ୍ୟୁକୁ ନେଇ ସସପେନ୍ସ ବଢ଼ୁଥିବାବେଳେ, କ୍ରାଇମବ୍ରାଂଚ ତଦନ୍ତକୁ ଜୋରଦାର କରିଛି । ରାୟଗଡାରେ ପହଁଚି କ୍ରାଇମବ୍ରାଂଚର ୧୨ ଜଣିଆ ଟିମ୍ ପୁରା ଘଟଣାର ଯାଂଚ କରୁଛନ୍ତି । ଯେଉଁ ରୁମରେ ବିଦେଶ ପର୍ଯ୍ୟଟକ ରହିଥିଲେ ଓ ଯେଉଁସ୍ଥାନରୁ ତାଙ୍କର ମୃତ ଦେହପଡିଥିଲା, ସେସବୁ ସ୍ଥାନରେ ଫରେନସିକ୍ ଟିମ୍ ସହାୟତାରେ ତଦନ୍ତ କରାଯାଇଛି । ରୁଷ ପର୍ଯ୍ୟଟକ ପାଭେଲ ଆଂଟୋଭଙ୍କ ଶେଷକୃତ୍ୟ ହୋଇଥିବା ଶ୍ମଶାନକୁ ଯାଇ ନମୂନା ସଂଗ୍ରହ କରିଛି ଫରେନସିକ୍ ଟିମ୍ । ଏପଟେ କଟକରେ, ମୃତ ରୁଷିୟ ପର୍ଯ୍ୟଟକଙ୍କ ଭିସେରା ଯାଂଚ ପ୍ରସଙ୍ଗରେ କ୍ରାଇମବ୍ରାଂଚ କାର୍ଯ୍ୟାଳୟ ପକ୍ଷରୁ ସୂଚନା ଦିଆଯାଇଛି । କୁହାଯାଇଛି, ପୁରା ଘଟଣା ଉପରେ ତଦନ୍ତ ଜାରି ରଖିଛି କ୍ରାଇମବ୍ରାଂଚ । ସବୁଦିଗକୁ ନେଇ ଯାଂଚ ପରେ ଭିସେରା ଟେଷ୍ଟ ଆବଶ୍ୟକତା ନଥିବା ଜଣାପଡିଛି ।
କିନ୍ତୁ ଏହା ଏକ ଅନ୍ତର୍ଜାତୀୟ ମାମଲା ହୋଇଥିବାରୁ ଇଂଟରପୋଲର ସହାୟତା ନେବାକୁ ଯୋଜନା କରୁଛି କ୍ରାଇମବ୍ରାଂଚ । ଇଂଟରପୋଲ ସହାୟତା ମିଳିଲେ ପାଭେଲଙ୍କ ମୃତ୍ୟୁ ମାମଲାର ତଦନ୍ତ ସହଜ ହେବ ବୋଲି ସୂଚନା ଦେଇଛି କ୍ରାଇମବ୍ରାଂଚ । କଟକରେ ଥିବା ଦୁଇ ରୁଷିୟ ନାଗରିକଙ୍କୁ ଶେଷ ଦିନରେ ପଚରାଉଚରା କରାଯାଇଛି । ତେବେ ଏପର୍ଯ୍ୟନ୍ତ ଯାହା ତଥ୍ୟ ମିଳିଛି ସେହି ଆଧାରରେ ବିଦାନୋଭ ଓ ପାଭେଲଙ୍କ ମୃତ୍ୟୁ ଏକ ଆତ୍ମହତ୍ୟା ବୋଲି ପୁଣି ଥରେ ସୂଚନା ଦେଇଛି କ୍ରାଇମବ୍ରାଂଚ ।