କନକ ବ୍ୟୁରୋ: ଜନତାର ସୁରକ୍ଷା ଓ ସ୍ଥିତି ନିୟନ୍ତ୍ରଣ ପାଇଁ ସବୁ କଥାରେ ଲୋଡ଼ା ପଡ଼ୁଥିବା ପୋଲିସ୍ ନିଜେ ଲହୁଲୁହାଣ । ଲୋକଙ୍କ ଆକ୍ରମଣର ଶିକାର ହୋଇ ଆହତ ହୋଇଛନ୍ତି ପୋଲିସ୍ ଅଧିକାରୀ ।
ବାଙ୍କିରେ ଗୋଷ୍ଠୀ ସଂଘର୍ଷ ମଝିରେ ଫସିଗଲା ପୋଲିସ୍ । ଟେକାପଥର ମାଡ଼ରେ ସବ୍ ଇନିସପେକ୍ଟର ଆହତ । ବାଙ୍କୀ ଥାନା ଗୟଳବାଙ୍କ ଗାଁରେ ଦୋଳମେଲଣରେ ଯାତ୍ରାକୁ ନେଇ ଦୁଇ ଗାଁ ମଧ୍ୟରେ ସଂଘର୍ଷ । ଗୟଳବାଙ୍କ ଓ ଗଭିପୁର ଗାଁର ଯୁବକଙ୍କ ମଧ୍ୟରେ ସଂଘର୍ଷ ପରେ ଉତ୍ତେଜନାମୂଳକ ସ୍ଥିତି ସୃଷ୍ଟି ହୋଇଥିଲା । ସେଠାରେ ସ୍ଥିତି ନିୟନ୍ତ୍ରଣ ପାଇଁ ପହଞ୍ଚିଥିଲା ପୋଲିସ୍ । ହେଲେ ଉଭୟ ଗୋଷ୍ଠୀର ସଙ୍ଘର୍ଷ ମଧ୍ୟରେ ଫସିଯାଇଥିଲେ ପୋଲିସ୍ କର୍ମଚାରୀ, ଆଉ ଖାକି କର୍ମଚାରୀଙ୍କ ଉପରେ ଦୁଇ ପଟରୁ ଟେକା-ପଥର ଓ ବୋତଲମାଡ଼ ହୋଇଥିଲା । ଏଥିରେ ଜଣେ ସବଇନିସପେକ୍ଟରଙ୍କ ସମେତ କିଛି ପୋଲିସ୍ କର୍ମଚାରୀ ଆହତ ହୋଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ସେପଟେ ବ୍ରହ୍ମପୁର ନିମଖଣ୍ଡି ଥାନା ଅନ୍ତର୍ଗତ ଶ୍ରୀକ୍ଷେତ୍ର ବିହାରରେ ଗୋଟିଏ ଘରେ କିଛି ଦୁର୍ବୃତ ଲୁଚି ରହିଥିବାର ଖବର ପରେ ବୁଧବାର ପୋଲିସ୍ କର୍ମଚାରୀ ସେଠାରେ ଚଢ଼ାଉ କରିଥିଲେ । ହେଲେ ଦୁର୍ବୃତମାନେ ପୋଲିସ୍ ଉପରେ ପାଲଟା ଆକ୍ରମଣ କରିବା ସହ ବୋମାମାଡ଼ କରିଥିଲେ । ଏଥିରେ ଜଣେ ପୋଲିସ୍ ଅଧିକାରୀ ଆହତ ହୋଇଥିଲେ । ମୋଟ୍ ୫ ଜଣଙ୍କୁ ଏହି ଘଟଣାରୁ ଗିରଫ କରାଯାଇଛି ।
ଗଞ୍ଜାମ ଜିଲ୍ଲା ଚିକିଟି ବ୍ଲକ ଲକ୍ଷ୍ମୀପୁର ଛକରେ ଜଣେ ଯୁବକଙ୍କୁ ଅପହରଣ କରାଯାଇଥିବାର ଖବର ପରେ ପୋଲିସ୍ ଅପହରଣକାରୀଙ୍କୁ ଧରିବାକୁ ରାସ୍ତା ବ୍ଲକ କରିଥିଲା । ହେଲେ ଅପହରଣକାରୀ ପୋଲିସ୍ ଉପରକୁ ଗାଡ଼ି ଚଢ଼ାଇଦେଇଥିଲେ, ଫଳରେ ଜଣେ ଏଏସଆଇ ଆହତ ହୋଇଛନ୍ତି । ଅବଶ୍ୟ ପରେ ଅପହରଣକାରୀଙ୍କୁ କାବୁ କରିନେଇଥିଲା ପୋଲିସ୍ ।