ଚଣ୍ଡିଗଡ ଯିବେ ପ୍ରଧାନମନ୍ତ୍ରୀ । ପ୍ରକାଶ ସିଂ ବାଦଲଙ୍କ ଶେଷ ଦର୍ଶନ କରିବା ସହ ଶ୍ରଦ୍ଧାଞ୍ଜଳି ଦେବେ ମୋଦୀ ।
କନକ ବ୍ୟୁରୋ : ପଞ୍ଜାବର ପୂର୍ବତନ ମୁଖ୍ୟମନ୍ତ୍ରୀ ପ୍ରକାଶ ସିଂ ବାଦଲଙ୍କ ପରଲୋକରେ ଦେଶରେ ଶୋକର ଛାୟା । ପ୍ରକାଶଙ୍କୁ ଶେଷ ଶ୍ରଦ୍ଧାଞ୍ଜଳି ଦେବାକୁ ଆଜି ଚଣ୍ଡିଗଡ ଯିବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ । ଅପରାହ୍ନ ୧୨ଟା ବେଳେ ଚଣ୍ଡିଗଡରେ ପହଞ୍ଚିବେ ପ୍ରଧାନମନ୍ତ୍ରୀ । ଶିରୋମଣି ଅକାଳୀ ଦଳର ମୁଖ୍ୟାଳୟରେ ପ୍ରକାଶ ସିଂ ବାଦଲଙ୍କ ପାର୍ଥିବ ଶରୀରକୁ ଶେଷ ଦର୍ଶନ ପାଇଁ ରଖାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ଏହାପୂର୍ବରୁ ପ୍ରକାଶ ସିଂ ବାଦଲଙ୍କ ପରଲୋକରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଶୋକବ୍ୟକ୍ତ କରିବା ସହ ଟ୍ୱିଟରେ ଲେଖିଥିଲେ, ପ୍ରକାଶ ସିଂ ବାଦଲଙ୍କ ପରଲୋକରେ ମୁଁ ବହୁତ ଦୁଃଖିତ । ଭାରତୀୟ ରାଜନୀତିରେ ବଡ ଚେହେରା ଥିଲେ ପ୍ରକାଶ । ଦେଶର ବିକାଶରେ ତାଙ୍କର ଯୋଗଦାନ ରହିଥିଲା । ପଞ୍ଜାବର ପ୍ରଗତି ପାଇଁ କଠିନ ପରିଶ୍ରମ କରିବା ସହ କଠିନ ସମୟରେ ରାଜ୍ୟକୁ ସାହାରା ଦେଇଛନ୍ତି । ପ୍ରକାଶଙ୍କ ପରଲୋକ ମୋର ବ୍ୟକ୍ତିଗତ କ୍ଷତି । ତାଙ୍କ ଠାରୁ ମୁଁ ବହୁତ କିଛି ଶିଖିଛି । ଏଭଳି କଠିନ ସମୟରେ ପରିବାର ଓ ସମ୍ପର୍କୀୟଙ୍କୁ ସମବେଦନା ଜଣାଇଛନ୍ତି ପ୍ରଧାନମନ୍ତ୍ରୀ ।
ପ୍ରକାଶ ସିଂ ବାଦଲଙ୍କୁ ବହୁତ ସମ୍ମାନ କରନ୍ତି ପ୍ରଧାନମନ୍ତ୍ରୀ ମୋଦୀ । ୨୦୧୯ରେ ଯେତେବେଳେ ବାରଣାସୀ ଲୋକସଭା ଆସନରୁ ପ୍ରଧାନମନ୍ତ୍ରୀ ମୋଦୀ ନାମାଙ୍କନପତ୍ର ଦାଖଲ କରିଥିଲେ ସେତେବେଳେ ପ୍ରକାଶଙ୍କ ପାଦ ଛୁଇଁ ଆଶୀର୍ବାଦ ନେଇଥିଲେ । ଏପରିକି ୨୦୧୫ରେ ଏକ କାର୍ଯ୍ୟକ୍ରମରେ ପ୍ରକାଶଙ୍କୁ ଭାରତର ନେଲସନ ମାଣ୍ଡେଲା ବୋଲି କହିଥିଲେ । ମୋଦୀ କହିଥିଲେ, ବାଦଲ ଏଭଳି ଜଣେ ମହାନ ନେତା ଯିଏ ଭାରତ ପାଇଁ ସଂଘର୍ଷ କରି ବିଭିନ୍ନ କାରଣରୁ ପାଖାପାଖି ୨ ଦଶକ ଜେଲରେ ରହିଛନ୍ତି ।
୯୫ ବର୍ଷ ବୟସରେ ପ୍ରକାଶ ସିଂ ବାଦଲ ଶେଷ ନିଶ୍ୱାସ ତ୍ୟାଗ କରିଛନ୍ତି । ଅସୁସ୍ଥତା କାରଣରୁ ପ୍ରକାଶ ସିଂ ବାଦଲଙ୍କୁ ସପ୍ତାହେ ତଳେ ପଂଜାବ ମୋହାଲିର ଏକ ଘରୋଇ ହସପିଟାଲରେ ଭର୍ତି କରାଯାଇଥିଲା । ସେ ଗତବର୍ଷ ଜୁନରେ ବି ହସପିଟାଲରେ ଭର୍ତି ହୋଇଥିଲେ । ଗତ ଜାନୁଆରୀରେ ସେ କରୋନାରେ ଆକ୍ରାନ୍ତ ହୋଇ ମେଡିକାଲରେ ଭର୍ତି ହୋଇଥିଲେ । ତାଙ୍କ ପରଲୋକରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ, ଲୋକସଭା ବାଚସ୍ପତି ଓମ୍ ବିର୍ଲା, ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ, କେନ୍ଦ୍ରମନ୍ତ୍ରୀ ଅନୁରାଗ ଠାକୁର ପ୍ରମୁଖ ବହୁ ନେତା ଶୋକ ପ୍ରକାଶ କରିଛନ୍ତି ।