୫ ବର୍ଷ ପାଇଁ ବ୍ୟାନ ହେଲା ପିଏଫ୍ଆଇ । କରୁଥିଲେ ଦେଶବିରୋଧି କାର୍ଯ୍ୟ
କନକ ବ୍ୟୁରୋ : ଗୋଟିଏ ସପ୍ତାହ ହେଲା ଦୁଇଟି ପର୍ଯ୍ୟାୟରେ ଦେଶବ୍ୟାପି ଚଢାଉ କରି ପପୁଲାର ଫ୍ରଂଟ୍ ଅଫ୍ ଇଣ୍ଡିଆର ୨୪୦ରୁ ଅଧିକ ନେତା ଏବଂ କର୍ମକର୍ତାଙ୍କୁ ଗିରଫ କରିବା ପରେ କେନ୍ଦ୍ର ସରକାର ଏହି ମୁସଲିମ୍ ରାଜନୈତିକ ଦଳକୁ ୫ ବର୍ଷ ପାଇଁ ବ୍ୟାନ୍ କରିଛନ୍ତି । ଆତଙ୍କବାଦୀ ଲିଙ୍କ୍ ତଥା ଦେଶବିରୋଧୀ କାର୍ଯ୍ୟ ଅଭିଯୋଗରେ ପିଏଫଆଇ ଏବଂ ଏହା ସହ ସହବନ୍ଧିତ ୮ ସଙ୍ଗଠନକୁ ବ୍ୟାନ କରିଛନ୍ତି କେନ୍ଦ୍ର ସରକାର । ଷ୍ଟୁଡେଂଟ୍ ଇସଲାମିକ୍ ମୁଭମେଂଟ ଅଫ୍ ଇଣ୍ଡିଆ, ଜମାତ-ଉଲ-ମୁଜ୍ଜାହିଦିନ ବାଂଲାଦେଶ ଏବଂ ଆଇଏସ୍ଆଇଏସ୍ ଭଳି ଆତଙ୍କବାଦୀ ସଙ୍ଗଠନ ସହ ପିଏଫଆଇ ଜଡିତ ଥିବା ସରକାରଙ୍କ ପକ୍ଷରୁ କୁହାଯାଇଛି । ଏହି ସଙ୍ଗଠନଗୁଡିକଠାରୁ ଆର୍ଥିକ ସହାୟତା ପାଇବା ସହ ତାଙ୍କ ଚିନ୍ତାଧାରାରେ ପିଏଫଆଇ କାର୍ଯ୍ୟ କରୁଥିଲା, ଯାହା ଦେଶର ଆଭ୍ୟନ୍ତରୀଣ ସୁରକ୍ଷା ପ୍ରତି ବିପଦ ସୃଷ୍ଟି କରୁଥିଲା ବୋଲି ଗୃହ ମନ୍ତ୍ରଣାଳୟ ପକ୍ଷରୁ କୁହାଯାଇଛି । ତେବେ ସରକାରଙ୍କ ଏଭଳି ପଦକ୍ଷେପ ପରେ ଦେଶରେ ବିଭିନ୍ନ ସ୍ଥାନରେ ଏହାକୁ ବିରୋଧ କରାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ପିଏଫଆଇ ନେତା ଏବଂ କର୍ମକର୍ତାମାନେ ଆତଙ୍କବାଦୀ ସଙ୍ଗଠନମାନଙ୍କର ଗୁପ୍ତ ଏଜେଣ୍ଡାରେ କାର୍ଯ୍ୟ କରୁଥିବା ଗୃହ ମନ୍ତ୍ରଣାଳୟକ ପକ୍ଷରୁ କୁହାଯାଇଛି । ସମାଜର ଏକ ନିର୍ଦ୍ଦିଷ୍ଟ ଗୋଷ୍ଠୀ ପ୍ରତି ଉଗ୍ର ହୋଇ ସେମାନେ କାର୍ଯ୍ୟ କରୁଥିଲେ । ହତ୍ୟା, ଦଙ୍ଗା ଭଳି ଅପରାଧିକ କାର୍ଯ୍ୟରେ ପିଏଫଆଇ କର୍ମକତାମାନେ ଜଡିତ ଥିଲେ ଏବଂ ଦେଶର ସମ୍ବିଧାନକୁ ସମ୍ମାନ ଦେଉନଥିଲେ ବୋଲି ସରକାରଙ୍କ ପକ୍ଷରୁ କୁହାଯାଇଛି । ସବୁଠୁ ବଡ କଥା ହେଉଛି ଚଢାଉ ବେଳେ ସେମାନଙ୍କ ଠାରୁ କିପରି ସହଜରେ ବଜାରରେ ମିଳୁଥିବା ଜନିଷର ବ୍ୟବହାର କରି ବୋମା ତଥା ଆଇଇଡି ବନାଇପାରିବେ ତାହା ଉପରେ ଲେଖାଥିବା ଏକ ପୁସ୍ତକ ଏବଂ ଆଇଏସ୍ଆଇଏସର ଦସ୍ତାବିଜ୍ ମଧ୍ୟ ଜବତ ହୋଇଛି । ପୂର୍ବରୁ କର୍ଣ୍ଣାଟକ, ଗୁଜରାଟ, ଉତ୍ତରପ୍ରଦେଶ ପିଏଫଆଇକୁ ବ୍ୟାନ କରିବାକୁ ସୁପାରିଶ କରିଥିଲେ । ତେବେ କେନ୍ଦ୍ରୀୟ ତଦନ୍ତକାରୀ ସଂସ୍ଥା ପାଖରେ ଥିବା ତଥ୍ୟ ଏବଂ ପ୍ରମାଣ ଆଧାରରେ ଏହାକୁ ବ୍ୟାନ କରାଯାଇଥିବା କହିଛନ୍ତି ଗୃହ ରାଷ୍ଟ୍ର ମନ୍ତ୍ରୀ ଅଜୟ ମିଶ୍ର ଟେନି ।
ରାଜ୍ୟ ପୋଲିସ ସହାୟତାରେ ଗତ ପ୍ରଥମେ ସେପ୍ଟେମ୍ବର ୨୨ ତାରିଖରେ ୧୫ଟି ରାଜ୍ୟରେ ଥିବା ପିଏଫଆଇ ଅଫିସ୍, ନେତା ଏବଂ କର୍ମକର୍ତାଙ୍କ ଘରେ ଚଢାଉ କରିଥିଲା କେନ୍ଦ୍ରୀୟ ତଦନ୍ତକାରୀ ସଂସ୍ଥା ଏନଆଇଏ ଓ ଇଡି । ଏହାପରେ ସୋମବାର ପୁଣି ଚଢାଉ କରାଯାଇଥିଲା । ତେବେ ପିଏଫଆଇ ବ୍ୟାନ ହେବା ପରେ ଆରଏସଏସକୁ ବ୍ୟାନ କରିବାକୁ ଦାବି କରିଛନ୍ତି ସିପିଆଇଏମ ଏବଂ କଂଗ୍ରେସ ।