କନକ ବ୍ୟୁରୋ : ରାଜସ୍ଥାନରେ ଦେଖାଦେଇଥିବା ରାଜନୈତିକ ସଙ୍କଟ ଭିତରେ ସୋମବାର ଦିଲ୍ଲୀ ଯାଇ କଂଗ୍ରେସ ଅନ୍ତରୀଣ ଅଧ୍ୟକ୍ଷ ସୋନିଆ ଗାନ୍ଧୀଙ୍କୁ ଭେଟିଛନ୍ତି ଅଶୋକ ଗେହଲଟ । କଂଗ୍ରେସ ସଭାପତିି ନିର୍ବାଚନ ପାଇଁ ସେପ୍ଟେମ୍ବର ୩୦ ତାରିଖ ନାମାଙ୍କନ ଦାଖଲର ଶେଷ ତାରିଖ ଧାର୍ଯ୍ୟ କରାଯାଇଥିବା ବେଳେ ଗହେଲଟଙ୍କୁ ସଭାପତି ପ୍ରାର୍ଥୀ କରିବା ନେଇ ଦ୍ୱନ୍ଦ୍ୱରେ ଅଛନ୍ତି ଗାନ୍ଧୀ ପରିବାର । ଗେହଲଟଙ୍କ ଜଣେ ଅନୁଗତ ତଥା ରାଜସ୍ଥାନର ଜଣେ କଂଗ୍ରେସ ନେତା ଦଳର ସଭାପତି ନିର୍ବାଚନ ପାଇଁ ପ୍ରସ୍ତୁତ ହେଉଥିବା ସୂଚନା ମିଳିଛି । ଯାହା ଗାନ୍ଧୀ ପରିବାରକୁ ବ୍ୟଥିତ କରିଛି । ଏସବୁ ଭିତରେ ସୋମବାର ସୋନିଆ ଗେହଲଟଙ୍କୁ ନିଜର ମତ ସ୍ପଷ୍ଟ କରିବାକୁ କହିଥିବା ସୂଚନା ମିଳିଛି ।
Kanak News is now on WhatsApp
Join and get latest news updates delivered to you via WhatsApp
କଂଗ୍ରେସ ସଭାପତି ପାଇଁ ଅଶୋକ ଗେହଲଟ ଗାନ୍ଧୀ ପରିବାରର ସବୁଠୁ ଅଧିକ ପସନ୍ଦ ରହିଥିଲେ ବି ରାଜସ୍ଥାନରେ ଦେଖାଦେଇଥିବା ବିବାଦ ପରେ ଦଳ ଏବେ ଦ୍ୱନ୍ଦ୍ୱରେ ଅଛି । ବିବାଦ ପଛରେ ଗେହଲଟଙ୍କ ପ୍ରମୁଖ ଭୂମିକା ଥିବା ସ୍ପଷ୍ଟ ବାରି ହୋଇପଡୁଥିବାରୁ ସେ ସଭାପତି ହେଲେ ରାଜସ୍ଥାନରେ ବିବାଦ ବଢିବ ନା କମିବ ତାକୁ ନେଇ ଚିନ୍ତାରେ ଅଛନ୍ତି କେନ୍ଦ୍ରୀୟ ନେତା । ତଥାପି ଗେହଲଟ ସଭାପତି ରେସରେ ଅଛନ୍ତି, କାରଣ ସେ ହେଉଛନ୍ତି ଗାନ୍ଧୀ ପରିବାରର ସବୁଠୁ ବିଶ୍ୱସ୍ଥ । ଏପଟେ ବରିଷ୍ଠ କଂଗ୍ରେସ ନେତା ଦିଗବିଜୟ ସିଂଙ୍କୁ ଦିଲ୍ଲୀ ଡକାଯାଇଛି । ଯଦି ଗେହଲଟ ସଭାପତି ନଲଢନ୍ତି ଦିଗବିଜୟଙ୍କୁ ସଭାପତି ଲଢିବା ପାଇଁ କହିପାରନ୍ତି ଗାନ୍ଧୀ ପରିବାର । ପୂର୍ବରୁ ନିର୍ବାଚନ ଲଢିବେ ନାହିଁ ବୋଲି ଦିଗବିଜୟ କହିଥିଲେ କିନ୍ତୁ ଏବେ ସ୍ଥିତି ଅଲଗା ଥିବାରୁ ସେ ହୁଏତ ମଇଦାନକୁ ଓହ୍ଲାଇପାରନ୍ତି ବୋଲି କୁହାଯାଉଛି ।
ଯଦି ଗେହଲଟ ସଭାପତି ରେସରୁ ବାଦ ପଡନ୍ତି ତେବେ ଗାନ୍ଧୀ ପରିବାରର ସମର୍ଥନରେ କିଏ ନାମାଙ୍କନ ଦାଖଲ କରିବ ତାହା ଉପରେ ନଜର ରହିଛି । ଆଉ ଯଦି ଗେହଲଟ ସଭାପତି ପାଇଁ ନାମାଙ୍କନ ଦାଖଲ କରନ୍ତି ତେବେ ରାଜସ୍ଥାନ ମୁଖ୍ୟମନ୍ତ୍ରୀ କିଏ ହେବ ତାକୁ ଚିନ୍ତାରେ ପଡିଯାଇଛନ୍ତି କଂଗ୍ରେସ ହାଇକମାଣ୍ଡ ।