ପେଟ୍ରୋଲ ପମ୍ପରେ ମାଗଣାରେ ମିଳିଥାଏ ଏସବୁ ସୁବିଧା, ଜାଣନ୍ତୁ ଓ ନିଜର ଅଧିକାର ଜାହିର କରନ୍ତୁ
କନକ ବ୍ୟୁରୋ : ସାଧାରଣ ଲୋକଙ୍କର ଧାରଣାରେ ପେଟ୍ରୋଲ ପମ୍ପରେ କେବଳ ପେଟ୍ରୋଲ, ଡିଜେଲ ଓ ମୋବିଲ ମିଳିଥାଏ । ହେଲେ ଆପଣ ଜାଣି ଆଶ୍ଚର୍ଯ୍ୟ ହେବେ ଯେ ପେଟ୍ରୋଲ ପମ୍ପ ମାଲିକମାନେ ତୈଳ କମ୍ପାନୀମାନଙ୍କ ସହ ଚୁକ୍ତି କରିବା ବେଳେ କେବଳ ତୈଳ ନୁହେଁ ଅନେକ ଗୁଡିଏ ସୁବିଧା ଲୋକଙ୍କୁ ଯୋଗାଇ ଦେବାକୁ ଚୁକ୍ତି କରିଥାନ୍ତି । ହେଲେ କିଛି ପେଟ୍ରୋଲ ପମ୍ପରେ ତୈଳ ବିକ୍ରି ବ୍ୟତୀତ ଅନ୍ୟାନ୍ୟ ସୁବିଧା ଗ୍ରାହକଙ୍କୁ ଯୋଗାଇ ଦେଉଥିବା ବେଳେ ଅଧିକାଂଶ ପେଟ୍ରୋଲ ପମ୍ପ କେବଳ ତୈଳ ବିକ୍ରି କରିଥାନ୍ତି । ତେବେ ଆସନ୍ତୁ ଜାଣିବା ପେଟ୍ରୋଲ ପମ୍ପରେ ତୈଳ ବ୍ୟତୀତ ଆପଣଙ୍କ କେଉଁ କେଉଁ ସୁବିଧା ମିଳିବା କଥା
Kanak News is now on WhatsApp
Join and get latest news updates delivered to you via WhatsApp
କୌଣସି ପେଟ୍ରୋଲ ପମ୍ପରେ ଆପଣ ଆପଣଙ୍କ ଗାଡିରେ ପ୍ରେସର ଦେବା କିମ୍ବା ପ୍ରେସର ଚେକ କରିବାର ମାଗଣା ସୁବିଧା ରହିଛି । ଆପଣଙ୍କୁ ଏ ବାବଦରେ ଗୋଟିଏ ବି ଟଙ୍କା ଦେବାକୁ ପଡିବ ନାହିଁ । ଏଥିପାଇଁ ପେଟ୍ରୋଲ ପମ୍ପ ମାଲିକ କର୍ମଚାରୀ ମଧ୍ୟ ନିଯୁକ୍ତ କରିବା ବାଧ୍ୟତାମୂଳକ ।
ପେଟ୍ରୋଲ ପମ୍ପରେ ଆପଣଙ୍କୁ ମାଗଣାରେ ବିଶୁଦ୍ଧ ପାନୀୟ ଜଳ ମିଳିପାରିବ । ପେଟ୍ରୋଲ ପମ୍ପ ମାଲିକମାନେ ତୈଳ କମ୍ପାନୀ ସହ ଏସବୁ ମୌଳିକ ସୁବିଧା ଯୋଗାଇ ଦେବାକୁ ଚୁକ୍ତି କରିଥାନ୍ତି ।
ପ୍ରତିଟି ପେଟ୍ରୋଲ ପମ୍ପରେ ମହିଳା, ପୁରୁଷ ଓ ଦିବ୍ୟାଙ୍ଗଙ୍କ ପାଇଁ ଭିନ୍ନ ଭିନ୍ନ ଶୌଚାଳୟ ନିର୍ମାଣ କରିବା ବାଧ୍ୟତାମୂଳକ । ଆପଣ ପେଟ୍ରୋଲ ପମ୍ପରୁ ପେଟ୍ରୋଲ କିଣନ୍ତୁ କି ନାହିଁ, ହେଲେ ପେଟ୍ରୋଲ ପମ୍ପ ତରଫରୁ ସମସ୍ତ ନାଗରିକଙ୍କ ପାଇଁ ଏସବୁ ସୁବିଧା ମାଗଣାରେ ଯୋଗାଇ ଦେବା ବାଧ୍ୟତାମୂଳକ ।
ଯଦି ଆପଣ କୌଣସି ଜରୁରୀ ପରିସ୍ଥିତିରେ ପଡିଯାଇଛନ୍ତି ତେବେ ଆପଣଙ୍କୁ ପେଟ୍ରୋଲ ପମ୍ପ ତରଫରୁ ମାଗଣା ଫୋନ କଲ ସୁବିଧା ଯୋଗାଇ ଦେବା ଅର୍ନିବାର୍ଯ୍ୟ । ଏଠାରେ ଆପଣଙ୍କୁ ଲ୍ୟାଣ୍ଡଲାଇନ କିମ୍ବା ମୋବାଇଲ ଫୋନ କଲର ସୁବିଧା ମାଗଣାରେ ମିଳିଥାଏ ।
ପେଟ୍ରୋଲ ପମ୍ପଗୁଡିକରେ ଫାଷ୍ଟଏଡ କିଟ୍ ରହିବା ବାଧ୍ୟତାମୂଳକ । ଯେଉଁଥିରେ ବ୍ୟାଣ୍ଡେଜ, ଅଏଣ୍ଟମେଣ୍ଟ ସହ ପେନ୍ କିଲର, ପାରାସିଟାମଲ ଭଳି ମେଡିସିନ ରହିଥାଏ । ଯାହାର ବ୍ୟବହାର ଆପଣ ଜରୁରୀ ପରିସ୍ଥିତିରେ ମାଗଣାରେ କରିପାରିବେ ।
ପେଟ୍ରୋଲ ପମ୍ପରେ ଅଗ୍ନିନିରାପତ୍ତା ବ୍ୟବସ୍ଥାକୁ ବାଧ୍ୟତାମୂଳକ କରାଯାଇଛି । ଆଖ ପାଖରେ କୌଣସି ଅଞ୍ଚଳରେ ଅଗ୍ନିକାଣ୍ଡ ଘଟିଲା ତେବେ ଏହାର ବ୍ୟବହାର ମାଗଣାରେ କରାଯାଇଥାଏ । ଏଥିପାଇଁ ପେଟ୍ରୋଲ ପମ୍ପ ତରଫରୁ ଜଣେ ଅପରେଟରଙ୍କୁ ନିଯୁକ୍ତି ଦେବା ବାଧ୍ୟତାମୂଳକ ।