କନକ ବ୍ୟୁରୋ: ଗତ ସୋମବାର ଫୁଲବାଣୀ ହାଟପଦା ନିକଟ ଆକ୍ସିସ୍ ବ୍ୟାଙ୍କ ପାଖରୁ ଅଜୟ ପାତ୍ର ନାମକ ବ୍ୟବସାୟୀଙ୍କ ଠାରୁ ୧୭ ଲକ୍ଷ ୫୦ ହଜାର ଟଙ୍କା ଝାମ୍ପି ନେଇଥିଲେ ଲୁଟେରା । ପୂରା ଫିଲ୍ମ ଷ୍ଟାଇଲରେ ବ୍ୟବସାୟୀଙ୍କୁ ପିଛା କରି ଟଙ୍କା ବ୍ୟାଗ ଛଡ଼ାଇ ନେଇଥିଲେ ୨ ଲୁଟେରା । ତା’ପରେ ପଲସର ବାଇକରେ ଫୁଲବାଣୀ ଗୋଚ୍ଛାପଡା ରାସ୍ତା ଦେଇ ବାଲନ୍ଦାପଡା ନିକଟ ଜଙ୍ଗଲକୁ ଯାଇ ଫେରାର ହେବାକୁ ଉଦ୍ୟମ କରିଥିଲେ । ଖବର ପାଇ ପୁଲିସ ଆରମ୍ଭ କରିଥିଲା ଅପରେସନ୍ ଲୁଟେରା । ଆରମ୍ଭ ହୋଇ ଯାଇଥିଲା ଲୁଟେରା ଓ ପୋଲିସ ମଧ୍ୟରେ ଛକାପଂଝା । ଜଙ୍ଗଲକୁ କର୍ଡନ କରି ଚାରିପଟୁ ଘେରି ରହିଥିଲା ପୋଲିସ । ଆଉ ତା’ପରେ ଯାହା ହୋଇଥିଲା ବଲିଉଡ୍ କାହାଣୀ ଭଳି । ଫେରାର ହେବାକୁ ଯେତେ ଚେଷ୍ଟା କରିଥିଲେ ବି ସଫଳ ହୋଇ ପାରିନଥିଲେ ଲୁଟେରା । ଆଉ ଏପଟେ ୨ ଲୁଟେରାକୁ ଖସାଇ ଆଣିବା ଲାଗି କାର ଧରି ପହଞ୍ଚି ଯାଇଥିଲେ ୪ ସହଯୋଗୀ । ପୋଲିସ ଆଖିରେ ଜଙ୍ଗଲରୁ ବାହାରି ସହଯୋଗୀଙ୍କ ସହ କାର୍ ଯୋଗେ କଳାହାଣ୍ଡି ଯାଉଥିବାବେଳେ ଅଧାବାଟରେ କାବୁ କରିନେଲା ପୋଲିସ ।
Kanak News is now on WhatsApp
Join and get latest news updates delivered to you via WhatsApp
ଗିରଫ ଲୁଟେରା ଗ୍ୟାଙ୍ଗଠାରୁ ଲୁଟ ହୋଇଥିବା ଟଙ୍କା, ପଲସର ବାଇକ୍, ଗୋଟିଏ କାର, ୭ଟି ମୋବାଇଲ ଫୋନ୍, ଗାଡି ଡିକି ଭାଙ୍ଗିବା ପାଇଁ ବ୍ୟବହୃତ ୨ଟି ଚାବି ଏବଂ ଦୁଇଟି ମାଷ୍ଟର ଚାବି ଜବତ ହୋଇଛି । ଗିରଫ ହୋଇଥିବା ଲୁଟେରା ଗ୍ୟାଙ୍ଗର ହେଲେ ଏ. କିଶୋର ଓରଫ ଏ.ଶ୍ରୀକାନ୍ତ ଏବଂ ଏ.ହରି ଓରଫ ଏଙ୍କେଟେସୁ, ଏମ୍ ଲିଲି ଓରଫ ନୀଳା, ସରସ୍ୱତୀ ଓରଫ ସାରସ, ଲିଟୁ ଗୌଡ, ଏବଂ ଏମ୍ ପାଣ୍ଡୁ । ଦୁଇ ମୁଖ୍ୟ ଅଭିଯୁକ୍ତଙ୍କ ଘର ଆସ୍କା ଥାନା ପାକଲାପ୍ଲଲୀରେ । ଏମାନଙ୍କ ନାମରେ ରାଜ୍ୟର ବିଭିନ୍ନ ଜିଲ୍ଲାରେ ମାମଲା ରହିଛି । ଏପରିକି ବିହାରରେ ବି ରହିଛି ଅପରାଧିକ ମାମଲା ।
୨ ମୁଖ୍ୟ ଅଭିଯୁକ୍ତଙ୍କ ସମେତ ୬ ଜଣ ଗିରଫ ହୋଇଥିବା ବେଳେ ଏମାନଙ୍କ ଗ୍ୟାଙ୍ଗରେ ଆଉ କିଏ କିଏ ଅଛନ୍ତି, କେଉଁ କେଉଁ ଅପରାଧରେ ଏମାନେ ଜଡିତ, ଜାଣିବା ପାଇଁ ତନାଘନା ଆରମ୍ଭ କରିଛି କନ୍ଧମାଳ ପୁଲିସ ।