କନକ ବ୍ୟୁରୋ : ୫ ବର୍ଷରେ ଦାରିଦ୍ର୍ୟରୁ ମୁକୁଳିଲେ ୧୩ କୋଟି ଲୋକ । ୨୦୧୫ରୁ ୨୦୨୧ ମାର୍ଚ୍ଚ ଶେଷ ସୁଦ୍ଧା ଦେଶର ପ୍ରାୟ ସାଢେ ୧୩ କୋଟି ଲୋକ ଉତ୍କଟ ଦାରିଦ୍ର୍ୟରୁ ବାହାରକୁ ଆସିଛନ୍ତି । ଉତ୍ତର ପ୍ରଦେଶ, ବିହାର, ରାଜସ୍ଥାନ, ଓଡ଼ିଶା ଏବଂ ମଧ୍ୟପ୍ରଦେଶ ଭଳି ରାଜ୍ୟରେ ଦାରିଦ୍ର୍ୟ ଦୂରୀକରଣ ହାର ଦ୍ରୁତତମ ରହିଛି । ରାଜ୍ୟ ଗୁଡ଼ିକ ମଧ୍ୟରେ ଉତ୍ତର ପ୍ରଦେଶରେ ସର୍ବାଧିକ ୩ କୋଟି ୪୩ ଲକ୍ଷ ଲୋକ ଦାରିଦ୍ର୍ୟରୁ ବାହାରକୁ ଆସିଥିବା ନୀତି ଆୟୋଗ ରିପୋର୍ଟରେ ପ୍ରକାଶ ପାଇଛି ।
Kanak News is now on WhatsApp
Join and get latest news updates delivered to you via WhatsApp
ସେହିପରି ଓଡ଼ିଶାର ୬୨ ଲକ୍ଷ ୬୨ ହଜାର ୮୫୨ ଜଣ ଲୋକ ଦାରିଦ୍ର୍ୟମୁକ୍ତ ହୋଇଛନ୍ତି ବୋଲି ନୀତି ଆୟୋଗ ରିପୋର୍ଟରୁ ଜଣାପଡ଼ିଛି । ଓଡ଼ିଶାରେ ଦାରିଦ୍ର୍ୟ ହାର ୨୯ ଦଶମିକ ୩୪ ପ୍ରତିଶତରୁ ୧୫ ଦଶମିକ ୮୬ ପ୍ରତିଶତକୁ ହ୍ରାସ ପାଇଛି । ଜିଲ୍ଲାଗୁଡ଼ିକ ମଧ୍ୟରେ ମାଲକାନଗିରିରେ ଦାରିଦ୍ର୍ୟହାର ରାଜ୍ୟରେ ସର୍ବାଧିକ ୪୫ ଦଶମିକ ୦୧ ପ୍ରତିଶତ ଥିବା ବେଳେ ପୁରୀରେ ସର୍ବନିମ୍ନ ୩ ଦଶମିକ ୨୯ ପ୍ରତିଶତ ରହିଛି ।
ରିପୋର୍ଟ ଅନୁସାରେ ଦାରିଦ୍ର୍ୟର ବିଭିନ୍ନ ଦିଗକୁ ଦେଖିଲେ ୨୦୧୫-୧୬ ଅବଧିରେ ଦେଶରେ ଦାରିଦ୍ର୍ୟହାର ୨୪ ଦଶମିକ ୮୫ ପ୍ରତିଶତ ରହିଥିଲା । ଏହା ୨୦୧୯-୨୦ ଅବଧିରେ ହ୍ରାସ ପାଇ ୧୪ ଦଶମିକ ୯୬ ପ୍ରତିଶତ ରହିଛି । ଦାରିଦ୍ର୍ୟ ଦୂରୀକରଣ କ୍ଷେତ୍ରରେ ଗ୍ରାମାଞ୍ଚଳ ଆଗରେ ରହିଛି । ଗ୍ରାମାଞ୍ଚଳରେ ଗରିବୀ ୩୨ ଦଶମିକ ୯୫ରୁ ଖସି ୧୯ ଦଶମିକ ୨୮ ରହିଛି । ସେହିପରି ସହରାଞ୍ଚଳରେଏହା ୮ ଦଶମିକ ୬୫ରୁ ୫ ଦଶମିକ ୨୭କୁ ଖସି ଆସିଛି ।