ଭାରତର ସୁଇସାଇଡ ଡ୍ରୋନ୍ । ଶତ୍ରୁର ଘରେ ପଶି କରିବ ଅତର୍କିତ ଆକ୍ରମଣ, କିଛି କ୍ଷଣରେ କରିଦେବ ଛାରଖାର । ଚୀନ ସୀମାରେ ହେଲା ସଫଳ ପରୀକ୍ଷଣ ।
କନକ ବ୍ୟୁରୋ : ଏଣିକି ଶତ୍ରୁ ଦେଶରେ ସର୍ଜିକାଲ ଷ୍ଟ୍ରାଇକ ପାଇଁ ଭାରତୀୟ ସେନାର ବ୍ରହ୍ମାସ୍ତ୍ର ସାଜିବ ସୁଇସାଇଡ ଡ୍ରୋନ । ଶତ୍ରୁର ଘରେ ପଶିବ, ଆତ୍ମଘାତୀ ଆକ୍ରମଣରେ କିଛି ମିନିଟରେ ସବୁକିଛି ଛାରଖାର କରିଦେବ । ସବୁଠୁ ବଡ କଥା ହେଲା ଏକ ସୁରକ୍ଷିତ ସ୍ଥାନରେ ବସି ଶତ୍ରୁ ଶିବିରରେ ବିଧ୍ୱଂସୀଳୀଳା ରଚିବ ଭାରତୀୟ ସେନା । ଆଉ ସେନା ଭାଷାରେ ଏହି ଅତ୍ୟାଧୁନିକ ଡ୍ରୋନର ନାଁ ରହିଛି ଲୟଟରିଙ୍ଗ ମ୍ୟୁନିସିଅନ୍ସ । ଗତ କିଛି ତଳେ ଭାରତୀୟ ସେନା ସ୍ୱଦେଶୀ ଜ୍ଞାନକୌଶଳରେ ନିର୍ମିତ ଲୟଟରିଙ୍ଗ ମ୍ୟୁନିସିଅନ୍ସକୁ ଚୀନ୍ ସୀମାବର୍ତ୍ତୀ ଅଞ୍ଚଳରେ ପରୀକ୍ଷଣ କରି ସାରିଛି । ଆଉ ଏହି ପରୀକ୍ଷଣ ସଫଳ ହେବା ସହ ଭାରତୀୟ ସେନାର ଶକ୍ତି ଆହୁରି ବଢିଛି । ଲଦାଖର ନୁବ୍ରା ଘାଟିରେ ଏହି ଡ୍ରୋନର ସଫଳ ପରୀକ୍ଷଣ ହୋଇଥିବା ବେଳେ ପଡୋଶୀ ଶତ୍ରୁ ଦେଶ ଗୁଡିକର ଚିନ୍ତା ବଢିଛି । ଆଉ ଏହା ପଛର ବଡ କାରଣ ହେଉଛି ଏହି ଡ୍ରୋନର ଘାତକ ଆକ୍ରମଣ ।
Kanak News is now on WhatsApp
Join and get latest news updates delivered to you via WhatsApp
ଏହି ଡ୍ରୋନକୁ ନିର୍ମାଣ କରିବା ପଛର ସବୁଠୁ ବଡ କାରଣ ହେଲା, ଅନ୍ତଜାର୍ତୀୟ ଅସ୍ତ୍ରଶସ୍ତ୍ର ବଜାରରେ ଭାରତକୁ ଆତ୍ମନିର୍ଭର ରୂପେ ଛିଡା କରାଇବା । ନାଗପୁର ଓ ବାଙ୍ଗାଲୋରର ଦୁଇ କମ୍ପାନି ଏହି ମାନବ ବିହୀନ ଡ୍ରୋନ ନିର୍ମାଣ କରିଛନ୍ତି । ଯାହାର ୩ଟି ମଡେଲ ରହିଛି । ଏଲଏମ୦, ଏଲଏମ୧ ଓ ହେକ୍ସାକପ୍ଟର । ଏଲଏମ୦ ଓ ଏଲଏମ୧ ଡ୍ରୋନ ୬୦ରୁ ୯୦ ମିନିଟ୍ ପର୍ଯ୍ୟନ୍ତ ବିନା ବାଧାରେ ଉଡିପାରିବ ।ଆଉ ୧୫ କିଲୋମିଟର ପରିଧି ମଧ୍ୟରେ ଥିବା ଟାର୍ଗେଟକୁ ବେଶ ସହଜରେ ଲକ୍ଷ୍ୟଭେଦ କରିପାରିବ । ୧ କିଲୋରୁ ୪ କିଲୋ ପର୍ଯ୍ୟନ୍ତ୍ର ଯୁଦ୍ଧାସ୍ତ୍ର ବହନ କରିପାରୁଥିବା ଏହି ଡ୍ରୋନ୍ ୪୫୦୦ ମିଟର ଉପରୁ ଆକ୍ରମଣ କରିପାରେ । ଆକାଶପଥରୁ ହିଁ ଶତ୍ରୁ ଶିବିରର ଟ୍ୟାଙ୍କ, ବଙ୍କର, ଯୁଦ୍ଧ ବାହନ, ଅସ୍ତ୍ର ଡିପୋ, ସେନା ଶିବିର ଉପରେ ଅନାୟସରେ ଘାତକ ଆକ୍ରମଣ କରିପାରିବ । ଏଲଏମ୧ ଓ ଏଲଏମ୦ ଡ୍ରୋନରେ ସ୍ଥାୟୀ ଭାବେ ପଙ୍ଖ ଲଗାଯାଇଛି । ଆଉ ଏହାର ତଳପାଶ୍ୱର୍ରେ ଯେଉଁ ବିସ୍ଫୋଟକ ରଖାଯାଇଥାଏ ତାହା ଶତ୍ରୁ ଶିବିରକୁ ଧ୍ୱଂସ କରିବାକୁ ଯଥେଷ୍ଟ ।
LM0 ଡ୍ରୋନକୁ ହାତରେ କିମ୍ବା ଟ୍ରାଏପୋଡ ଦ୍ୱାରା ଉଡା ଯାଇପାରିବ । ଏହାର ଓଜନ ୬ କିଲୋଗ୍ରାମ ହୋଇଥିବା ବେଳେ ୬୦ ମିନିଟ୍ ପର୍ଯ୍ୟନ୍ତ ଏହା ଉଡିପାରେ । ୧୫ କିଲୋମିଟର ପର୍ଯର୍୍ୟନ୍ତ ଭିଡ଼ିଓ ଫୁଟେଜ ସହ ଆକ୍ରମଣ କରିବାରେ ଏହି ଡ୍ରୋନ ମହାରଥ ହାସଲ କରିଛି । ସେହିଭଳି ଏହାର ଜିପିଏସ ଟାର୍ଗେଟ ରେଞ୍ଜ ହେଉଛି ୪୫ କିଲୋମିଟର । ସବୁଠୁ ବଡ କଥା ହେଲା ଏହାର ଲ୍ୟାଣ୍ଡିଂ ହାତରେ କରାଯାଇପାରେ । ଯେମିତି ଉରୀ ଫିଲ୍ମରେ ଗରୁଡ ଡ୍ରୋନ ଦ୍ୱାରା ହୋଇଥିଲା । ଏହାସହ ପାରାସୁଟ ଦ୍ୱାରା ମଧ୍ୟ ଏହାକୁ ଲ୍ୟାଣ୍ଡିଂ କରାଯାଇପାରିବ । ଏହି ଡ୍ରୋନ ଆତ୍ମଘାତୀ ବିସ୍ଫୋରଣ ହେବା ଦ୍ୱାରା ୨୦ ମିଟର ପରିଧିର ଅଞ୍ଚଳକୁ ଧ୍ୱଂସସ୍ତୁପରେ ପରିଣତ କରିଥାଏ । ଆକ୍ରମଣ ସମୟରେ ରିୟଲ ଟାଇମ ଭିଡ଼ିଓ ଫୁଟେଜ ମଧ୍ୟ ପ୍ରଦାନ କରିଥାଏ ଏହି ଡ୍ରୋନ୍ ।
ସେହିଭଳି LM1 ଡ୍ରୋନ ୪ କିଲୋଗ୍ରାମର ବିସ୍ଫୋଟକ ଭର୍ତ୍ତି କରି ଉଡାଣ ଭରିପାରିବ । ଏହା ଟ୍ୟାଙ୍କ ଧ୍ୱଂସ, ପ୍ରତିଆକ୍ରମଣ କ୍ଷେତ୍ରରେ କାମ କରିଥାଏ । ଏହାର ୩ଟି ମୋଡ ରହିଛି । ସବୁଠୁ ବଡ କଥା ହେଉଛି ଏହା ଉଭୟ ରାତି ଓ ଦିନରେ କାମ କରିପାରିବ । ଏହାର ଓଜନ ୧୧ କିଲୋଗ୍ରାମ ହୋଇଥିବା ବେଳେ ୯୦ ମିନିଟ୍ ପର୍ଯ୍ୟନ୍ତ ଉଡିପାରେ । ଭିଡ଼ିଓ ଲିଙ୍କ ରେଞ୍ଜ ଏହାର ୨୫ କିଲୋମିଟର ରହିଥିବା ବେଳେ ଜିପିଏସ ମାଧ୍ୟମରେ ୬୦ କିଲୋମିଟର ଦୂର ଟାର୍ଗେଟକୁ ନଷ୍ଟ କରିପାରିବ ଏହି ଡ୍ରୋନ୍ ।
ହେକ୍ସାକପ୍ଟର ଯେକୌଣସି ପରିସ୍ଥିତିରେ ଉଡାଣ ଭରିପାରିବ ଓ ଲ୍ୟାଣ୍ଡିଂ କରିପାରିବ । ଏହାକୁ ଛୋଟିଆ ସ୍ଥାନରୁ ମଧ୍ୟ ଉଡାଇ ହେବ । ଏହି ଡ୍ରୋନରେ ବିଭିନ୍ନ ପ୍ରକାରର ବିସ୍ଫୋଟକ ଖଞ୍ଜା ଯାଇପାରିବ । ପାଗ ଖରାପ ଥିଲେ ମଧ୍ୟ ଏହା ଉଡାଣ ଭରିପାରିବ । ଏହାର ଓଜନ ୧୪ କିଲୋଗ୍ରାମ ହୋଇଥିବା ବେଳେ ୩୦ରୁ ୪୫ ମିନିଟ୍ ପର୍ଯ୍ୟନ୍ତ ଏହା ଉଡାଣ ଭରିପାରିବ । ଏହା ସହର, ଜଙ୍ଗଲ ଓ ଘାଟି ଅଞ୍ଚଳରେ ବେଶ ସହଜରେ ଉଡାଣ ଭରିବା ସହ ଶତ୍ରୁ ଶିବିରକୁ ନଷ୍ଟ କରିଥାଏ । ଏହି ଡ୍ରୋନ କେବଳ ଶତ୍ରୁ ଶିବିରକୁ ନଷ୍ଟ କରିବନି ବରଂ ଭାରତୀୟ ସେନାର ବଜେଟ ବୋଝକୁ ମଧ୍ୟ କମ କରିବ । କାରଣ ଇସ୍ରାଏଲ ଓ ପୋଲାଣ୍ଡ ଠାରୁ କିଣାଯାଉଥିବା ଡ୍ରୋନ ଠାରୁ ଏହା ୪୦ ପ୍ରତିଶତ ଶସ୍ତା ରହିବ ।