ଘରେ ନଗଦ ଟଙ୍କା ରଖିବା ନେଇ କଣ ରହିଛି ନିୟମ ? ଆଇନ ଉଲଙ୍ଘନ କଲେ ୧୩୭ ପ୍ରତିଶତ ପର୍ଯ୍ୟନ୍ତ ଦେବାକୁ ପଡିପାରେ ଟ୍ୟାକ୍ସ
କନକ ବ୍ୟୁରୋ : ସାଧାରଣ ଲୋକଙ୍କ ମନରେ ଏଭଳି କିଛି ଭ୍ରାନ୍ତ ଧାରଣା ରହିଛି କି ଘରେ ନଗଦ ଟଙ୍କା ରଖିବାର ଗୋଟିଏ ସୀମା ରହିଛି । ହେଲେ ଆପଣଙ୍କୁ କହିବାକୁ ଚାହୁଁ ଯେ ଆପଣ ଯେତେ ଚାହିଁବେ ସେତେ ନଗଦ ଟଙ୍କା ଘରେ ରଖିପାରିବେ । ହେଲେ ଏହାନୁହେଁ ଯେ ଆପଣଙ୍କ ଘରେ ଆୟକର ଚଢାଉ ହେବ ନାହିଁ । ହେଲେ ଆୟକର ବିଭାଗର ଚଢାଉ ବେଳେ ଯଦି ଆପଣ ନଗଦ ଟଙ୍କାର ଅଧାର ଠିକଭାବେ ପ୍ରମାଣ କରିପାରୁଛନ୍ତି ତେବେ ଆପଣ ଯେତେ ଇଚ୍ଛା ସେତେ ନଗଦ ଟଙ୍କା ଘରେ ରଖିପାରିବେ । ଅର୍ଥାତ ଆପଣଙ୍କ ପାଖରେ ଏତେ ନଗଦ ଟଙ୍କା କେଉଁଠୁ ଆସିଲା ଓ ଏହାକୁ ନେଇ ଆପଣ ଘୋଷଣା କରିଛନ୍ତି କି ନାହିଁ ତାହା ହିଁ ମୁଖ୍ୟ କଥା । ଯଦି ଆପଣଙ୍କ ପାଖରେ ଥିବା ନଗଦ ଟଙ୍କାର ଆଇନଗତ ଆଧାର ଓ ସେ ଟଙ୍କା ଉପରେ ଆପଣ ଟ୍ୟାକ୍ସ ଦେଇଛନ୍ତି ତେବେ ଆପଣଙ୍କୁ ଡରିବାର କିଛି ନାହିଁ ।
Kanak News is now on WhatsApp
Join and get latest news updates delivered to you via WhatsApp
ଯଦି ଆୟକର ବିଭାଗ ଆପଣଙ୍କ ଉତ୍ତରରେ ସନ୍ତୁଷ୍ଟ ହେଉନାହାଁନ୍ତି କିମ୍ବା ଆପଣ ନଗଦ ଟଙ୍କାର ଯେଉଁ ଆଧାର ଉପରେ ଦସ୍ତାବିଜ୍ ଦାଖଲ କରିଛନ୍ତି ସେଥିରେ କିଛି ତୃଟି ରହିଛି ତେବେ ଆପଣଙ୍କୁ ଜରିମାନା ଦେବାକୁ ପଡିବ । ଏନେଇ ଆପଣଙ୍କ ଘରୁ ମିଳିଥିବା ମୋଟ ନଗଦ ଟଙ୍କା ଉପରେ ୧୩୭ ପ୍ରତିଶତ ପର୍ଯ୍ୟନ୍ତ ଟ୍ୟାକ୍ସ ଦେବାକୁ ପଡିପାରେ ।
ସେପଟେ ବ୍ୟାଙ୍କରେ ଟଙ୍କା ରଖିବା ନେଇ ମଧ୍ୟ କିଛି ନିୟମ ରହିଛି । ଯଦି ଆପଣ ବ୍ୟାଙ୍କରେ ୨୦ ଲକ୍ଷ ଟଙ୍କାରୁ ଅଧିକ ନଗଦ ଟଙ୍କା ଜମା କରିବାକୁ ଚାହୁଁଛନ୍ତି ତେବେ ଆପଣଙ୍କୁ ପ୍ୟାନକାର୍ଡ କିମ୍ବା ଆଧାରକାର୍ଡ ଦେଖାଇବାକୁ ପଡିବ । ଏସବୁ ଦେଖାଇବାରେ ଆପଣ ବିଫଳ ହେଲେ ଆପଣଙ୍କ ଉପରେ ଜରିମାନା ଲାଗିବ । ସେପଟେ ଗୋଟିଏ ବର୍ଷରେ ଯଦି ଆପଣ ବ୍ୟାଙ୍କରୁ ୧ କୋଟିରୁ ଅଧିକ ଟଙ୍କା ଉଠାଉଛନ୍ତି ତେବେ ଆପଣଙ୍କୁ ୨ ପ୍ରତିଶତ ଟିଡିଏସ ଦେବାକୁ ପଡିବ । ଏହାସହ ଯଦି ଆପଣ ଗୋଟିଏ ଦିନରେ ୫୦ ହଜାରରୁ ଅଧିକ ଟଙ୍କା ଉଠାଇବାକୁ ଚାହୁଁଛନ୍ତି ତେବେ ଆପଣଙ୍କୁ ବି ପ୍ୟାନକାର୍ଡ ଦେଖାଇବାକୁ ପଡିବ ।
ଅନ୍ୟପଟେ ଯଦି ଆପଣ ଜମି କିମ୍ବା ଘର କିଣିବା ବେଳେ ୩୦ ଲକ୍ଷରୁ ଅଧିକ ନଗଦ ଟଙ୍କା କାରବାର କରୁଛନ୍ତି ତେବେ ଆପଣଙ୍କ ଉପରେ ଯାଂଚ ବସିବ । ଆପଣ ସର୍ବାଧିକ ୨ ଲକ୍ଷ ପର୍ଯ୍ୟନ୍ତ ନଗଦ କାରବାର କରିପାରିବେ ।