କୃଷ୍ଣ ପ୍ରତିହାରୀ ହତ୍ୟା ମାମଲାରେ ନୂଆ ମୋଡ : ୨ ଷଡ଼ଯନ୍ତ୍ରକାରୀଙ୍କ ସହ ୪ ଜଣଙ୍କୁ ପୁଲିସ ଅଟକ ରଖିଥିବା ସୂଚନା
କନକ ବ୍ୟୁରୋ : ବରିଷ୍ଠ ସେବାୟତ କୃଷ୍ଣ ପ୍ରତିହାରୀ ହତ୍ୟା ମାମଲାରେ ୨ ଷଡ଼ଯନ୍ତ୍ରକାରୀଙ୍କ ସମେତ ୪ ଜଣଙ୍କୁ ପୁଲିସ ଅଟକ ରଖିଥିବା ସୂଚନା ମିଳିଛି । ସେମାନଙ୍କ ମଧ୍ୟରେ କାଳିଆ ସିଂହାରୀ ଓ ତାଙ୍କ ପୁଅ ଦୋଳଗୋବିନ୍ଦ ରହିଥିବା କୁହାଯାଉଛି । ବାବା ମହାପାତ୍ର ଓ ଅନ୍ୟ ଜଣେ ସହଯୋଗୀ ମଧ୍ୟ ଅଟକ ରହିଥିବା ସୂଚନା ମିଳିଛି । ଏତଲାକୁ ଭିତି କରି ଏମାନଙ୍କୁ ଅଟକ ରଖିଛି ପୁରୀ ପୁଲିସ । ଏ ନେଇ ସୂଚନା ଦେଇଛନ୍ତି ପୁରୀ ସିଟି ଡିଏସପି ଜନାର୍ଦ୍ଦନ ପାଢୀ । ତେଣୁ ପୁଣିଥରେ ଏହି ହତ୍ୟାକାଣ୍ଡ ପ୍ରତିଶୋଧ ପାଇଁ ହୋଇଥିବା ସଂଦେହ ଆହୁରି ଦୃଢ଼ ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ଗୋଟିଏ ପଟେ ରକ୍ତ ଭିଜା କାଗଜପତ୍ର ଜବତ, ଯାହା ଜମି ବିବାଦ ଆଡକୁ ଇଙ୍ଗିତ କରୁଥିବା ବେଳେ ଅନ୍ୟପଟେ କାଳିଆ ସିଂହାରୀ ଓ ଦୋଳଗୋବିନ୍ଦଙ୍କୁ ପୁଲିସ ଅଟକ ରଖିବା, ଗୁନ ସିଂହାରୀ ହତ୍ୟାକାଣ୍ଡର ପ୍ରତିଶୋଧ ଦିଗକୁ ସୂଚାଉଛି । ଏହି ହତ୍ୟାକାଣ୍ଡ ପାଇଁ ୩୦ ଲକ୍ଷ ଟଙ୍କା ସୁପାରୀ ଦିଆଯାଇଥିବା ବେଳେ ୨ ଲକ୍ଷ ଅଗ୍ରୀମ ଦିଆଯାଇଥିବା କୁହାଯାଉଛି । ତେବେ ହତ୍ୟାକାଣ୍ଡ ସହ ସିଧାସଳଖ ସଂପର୍କ ଥିବା ଅପରାଧୀଙ୍କ ପାଖରେ ପହଁଛି ପାରିନି ପୁରୀ ପୁଲିସ । ଗତ ୧୬ତାରିଖ ଦିନ ପୁରୀରେ ଘଟିଥିବା ଏହି ଗୁଳିକାଣ୍ଡ ସାରା ରାଜ୍ୟରେ ଚାଂଚଲ୍ୟ ଖେଳାଇ ଦେଇଥିଲା । ସ୍ପଷ୍ଟ ଦିବାଲୋକରେ ସହର ମଝିରେ ଜନଗହଳିପୂର୍ଣ୍ଣ ଅଂଚଳରେ ଘଟିଥିଲା ଏହି ଗୁଳିକାଣ୍ଡ । ସୁଆର ଓ ମହାସୁଆର ନିଯୋଗ ସମ୍ପାଦକ କୃଷ୍ଣଚନ୍ଦ୍ର ପ୍ରତିହାରୀଙ୍କର ଗୁଳିମାଡ଼ରେ ମୃତ୍ୟୁ ହୋଇଥିଲା ।
କୃଷ୍ଣ ପ୍ରତିହାରୀଙ୍କ ଭାଇ ନରସିଂହ ପ୍ରତିହାରୀ ପୁରୀ ଟାଉନ୍ ଥାନାରେ ଦାୟର କରିଥିବା ଏଫଆଇଆର୍ରେ ଟୁଟୁ, କୁନୁମୁନି, ବାବା ମହାପାତ୍ର, ଓ ହରିପଣ୍ଡା ଗୁଳିମାଡ଼ କରିଥିବା ଉଲ୍ଲେଖ କରିଥିଲେ । ରକ୍ତ ଜୁଡ଼ୁବୁଡ଼ କାଗଜ, ୩ ହଳ ଚପଲ ଓ ୪ଟି ଖୋକା ଜବତ କରିଥିଲା ଫରେନସିକ୍ ଟିମ୍ ଓ ପୁଲିସ । ଏହାକୁ ଆଧାର କରି ତଦନ୍ତ ଆଗକୁ ବଢ଼ାଇଥିଲା ପୁଲିସ । ୨୦୧୨ରେ ପୁରୀର ବହୁଚର୍ଚ୍ଚିତ ଗୁନ ସିଂହାରୀ ହତ୍ୟାକାଣ୍ଡ ମାମଲା ସହ ଏହି ହତ୍ୟାକାଣ୍ଡର ସଂପର୍କ ଥିବା ସଂଦେହ କରାଯାଇଥିଲା । କାରଣ ଗୁନ ସିଂହାରୀ ହତ୍ୟାକାଣ୍ଡରେ କୃଷ୍ଣ ପ୍ରତିହାରୀଙ୍କ ନାଁରେ ଅଭିଯୋଗ ହୋଇଥିଲା ।
ତାଙ୍କୁ ଅନ୍ୟତମ ଷଡଯନ୍ତ୍ରକାରୀ ବୋଲି କୁହାଯାଉଥିଲା ଏବଂ ପୋଲିସ ଗିରଫ ବି କରିଥିଲା । ଘଟଣାର ପ୍ରାୟ ୯ ବର୍ଷ ପରେ ନିର୍ଦ୍ଦୋଷରେ ତାଙ୍କୁ ଖଲାସ କରିଥିଲେ କୋର୍ଟ । ଏପଟେ କୃଷ୍ଣ ପ୍ରତିହାରୀଙ୍କୁ ଗୁଳିମାଡ଼ କରି ଅଭିଯୁକ୍ତମାନେ ଚାଲି ଯାଉଥିବା ବେଳେ କାଳିଆ ସିଂହାରୀ ଓ ଦୋଳଗୋବିନ୍ଦଙ୍କ ଶପଥ ପୂରଣ ହେଲା ବୋଲି କହିଥିବା ଏଫଆଇଆର୍ କପିରେ ଉଲ୍ଲେଖ କରିଥିଲେ କୃଷ୍ଣଙ୍କ ଭାଇ ନରସିଂହ ପ୍ରତିହାରୀ ।