ରାୟଗଡା କାଶୀପୁରରେ କଲବଲ କରୁଛି କଲେରା : ଗତ ୨୪ ଘଣ୍ଟାରେ ୩ ଜଣଙ୍କ ମୃତ୍ୟୁ, ମୋଟ୍ ମୃତ୍ୟୁସଂଖ୍ୟା ୧୨ ଛୁଇଁଲା
କନକ ବ୍ୟୁରୋ : କାଶୀପୁର ଟିକିରି ଅଞ୍ଚଳରେ କଲେରା ତା’ର କରାଳ ରୂପ ଦେଖାଉଥିବା ବେଳେ ମୃତ୍ୟୁ ସଂଖ୍ୟା ଉପରେ ରୋକ ଲାଗିପାରୁନାହିଁ । ଗତ ୨୪ ଘଂଟାରେ କାଶୀପୁର ଅଂଚଳରେ ୩ଜଣ ଗ୍ରାମବାସୀ ପ୍ରାଣ ହରାଇଥିବା ବେଳେ ଦୁଇ ଜଣଙ୍କ ଡାଇରିଆରେ ମୃତ୍ୟୁ ହୋଇଥିବା ସ୍ପଷ୍ଟ କରିଛି ପ୍ରଶାସନ । ଏହାକୁ ମିଶାଇ ମୋଟ ମୃତ୍ୟୁସଂଖ୍ୟା ୧୨ ଛୁଇଁଛି । ସେହିପରି ଆକ୍ରାନ୍ତଙ୍କ ସଂଖ୍ୟା ୩୧୮ରେ ପହଞ୍ଚିଛି ।
Kanak News is now on WhatsApp
Join and get latest news updates delivered to you via WhatsApp
ଟିକିରି ପଞ୍ଚାୟତରେ ଜାମୁଗୁଡ଼ା ଗାଁର ୫୬ ବର୍ଷିୟା ମହିଳା ସୁନି ମାଝୀ ଝାଡ଼ବାନ୍ତିରେ ଆକ୍ରାନ୍ତ ହୋଇଥିବା ବେଳେ ଗାଁରେ ପହଂଚିଥିବା ଭ୍ରାମ୍ୟମାଣ ସ୍ୱାସ୍ଥ୍ୟ ଟିମ୍ ଠାରୁ ଔଷଧ ଖାଇଥିଲେ ସୁନି ମାଝି । ବୁଧବାର ତାଙ୍କୁ ଅଟୋ ଯୋଗେ ଡାକ୍ତରଖାନା ନିଆଯିବାକୁ ଉଦ୍ୟମ କରାଯାଇଥିଲା । ତେବେ ବାଟରେ ପ୍ରାଣ ହରାଇଥିଲେ ସୁନି । ସେହିପରି ଶଙ୍କରଡ଼ା ଗ୍ରାମର ୫୦ ବର୍ଷିୟ ବୃଦ୍ଧ ଝାନୁ ମାଝୀ ଝାଡ଼ାବାନ୍ତିରେ ଆକ୍ରାନ୍ତ ହୋଇ ପ୍ରାଣ ହରାଇଥିଲେ । ଏଥିସହ ପାନବନ୍ଧ ଗ୍ରାମର ୨୭ ବର୍ଷିୟ ଯୁବକ ଝାଡ଼ାବାନ୍ତିରେ ଆକ୍ରାନ୍ତ ହୋଇ ଗାଁରେ ମୃତ୍ୟୁବରଣ କରିଛନ୍ତି ।
ତେବେ ପ୍ରଶାସନ କିନ୍ତୁ ବିଟାଙ୍କ ମୃତ୍ୟୁକୁ ଡାଇରିଆ ଜନିତ ମୃତ୍ୟୁ ଭାବେ ଗ୍ରହଣ କରିବାକୁ ନାରାଜ । ବିଟା ପେଟବ୍ୟଥା ଯୋଗୁ ମୃତ୍ୟୁ ହୋଇଥିବା ସ୍ୱାସ୍ଥ୍ୟ ବିଭାଗର ରିପୋର୍ଟରେ ଉଲ୍ଲେଖ ହୋଇଛି । ତେବେ ଗାଁରେ ଥିବା ଆକ୍ରାନ୍ତଙ୍କୁ ଡାକ୍ତରଖାନା ମୁହାଁ କରାଇବା ପ୍ରଶାସନ ପାଇଁ ଏକ ବଡ଼ ଚ୍ୟାଲେଞ୍ଜ ସୃଷ୍ଟି ହୋଇଛି ।