ସ୍ୱର୍ଣ୍ଣ ପଦକ ପାଇଁ ଆଜି ଲଢିବେ ନୀରଜ ଚୋପ୍ରା : ଜାଭେଲିନ୍ ଥ୍ରୋର ଫାଇନାଲ ମୁକାବିଲାରେ କରିବେ ଭାଗ୍ୟ ପରୀକ୍ଷା
ସେପଟେ କାଂସ୍ୟ ପଦକ ପାଇଁ ରିଙ୍ଗକୁ ଓହ୍ଲାଇବେ ବଜରଙ୍ଗ ପୁନିଆ
କନକ ବ୍ୟୁରୋ: ଅଲିମ୍ପିକ୍ସରେ ନୀରଜ ଚୋପ୍ରାଙ୍କ ପ୍ରଦର୍ଶନ ଉପରେ ସମସ୍ତଙ୍କ ନଜର ରହିଛି । କାରଣ ତାଙ୍କ ଠାରୁ ସ୍ୱର୍ଣ୍ଣ ପଦକ ଆଶା କରୁଛି ଭାରତ । ପୁରୁଷ ଜାଭେଲିନ୍ ଥ୍ରୋ ଫାଇନାଲରେ ଆଜି ଭାଗ ନେବେ ଭାରତର ଏହି ତାରକା ଖେଳାଳି । ୨୩ ବର୍ଷୀୟ ନୀରଜ ଚୋପ୍ରା ଭାରତ ପାଇଁ ପଦକ ଆଣିବେ ବୋଲି ଆଶା ରହିଛି । ଯଦି ସେ ପଦକ ହାସଲ କରନ୍ତି, ତେବେ ଆଥଲେଟିକ୍ସରେ ପଦକ ପାଇବା ପାଇଁ ଭାରତର ଶହେ ବର୍ଷର ଅପେକ୍ଷାର ଅନ୍ତ ଘଟିବ ।
Kanak News is now on WhatsApp
Join and get latest news updates delivered to you via WhatsApp
ବୁଧବାର ଦିନ ଟୋକିଓ ଅଲିମ୍ପିକ୍ସରେ ଦମଦାର ପ୍ରଦର୍ଶନ କରି ଜାଭେଲିନ୍ ଥ୍ରୋ ଫାଇନାଲରେ ପ୍ରବେଶ କରିଛନ୍ତି ଭାରତର ଏହି ଷ୍ଟାର ଆଥଲେଟ୍ । ଫାଇନାଲରେ ପହଂଚିବା ପାଇଁ କ୍ୱାଲିଫାଇଙ୍ଗ ରାଉଣ୍ଡରେ ୮୩.୫ ମିଟର ଟାର୍ଗେଟ୍ ରହିଥିଲା । କିନ୍ତୁ ନୀରଜ ଚୋପ୍ରା ୮୬.୫୯ ମିଟର ଥ୍ରୋ କରି ଗ୍ରୁପ୍ ‘ଏ’ର ପ୍ରଥମ ସ୍ଥାନରେ ରହି ଫାଇନାଲ ପାଇଁ ସ୍ଥାନ ପକ୍କା କରିନେଇଥିଲେ । ଏସିଆନ୍ ଗେମ୍ସ, କମନୱେଲ୍ଥ ଗେମ୍ସ, ଏସିଆନ୍ ଚାମ୍ପିଅନ୍ସିପ୍, ସାଉଥ ଏସିଆନ୍ ଗେମ୍, ୱାଲ୍ଡ ଜୁନିଅର ଚାମ୍ପିଅନ୍ସିପ୍ରେ ସ୍ୱର୍ଣ୍ଣ ପଦକ ଜିତି ସାରିଛନ୍ତି ନୀରଜ ।
ତେଣୁ ତାଙ୍କ ଠାରୁ ଟୋକିଓ ଅଲିମ୍ପିକ୍ସରୁ ଗୋଲ୍ଡ ମେଡାଲ ଆଶା କରୁଛି ଭାରତ । ଆଜି ଅପରାହ୍ଣ ସାଢ଼େ ୪ଟା ସମୟରେ ଜାଭେଲିନ୍ ଥ୍ରୋ ଫାଇନାଲ ଖେଳାଯିବ । ଅନ୍ୟପଟେ ୬୫ କେଜି ଫ୍ରି-ଷ୍ଟାଇଲ ବର୍ଗରେ ବ୍ରୋଂଜ ପଦକ ପାଇଁ ରେସଲିଂ ରିଙ୍ଗକୁ ଓହ୍ଲାଇବେ ବଜରଙ୍ଗ ପୁନିଆ ।